ბერძენ-რომაელები კარავაევზე გამოვლენ

საქართველოს ბერძნულ-რომაული სტილით მოჭიდავეთა ნაკრები გუშინ მინსკში გაფრინდა, სადაც ხვალ ოლიმპიური და მსოფლიოს ორგზის ჩემპიონ ოლეგ კარავაევის სახელობის საერთაშორისო ტურნირში იჭიდავებს. ბეგი დარჩიამ იქ ლაშა გოგიტაძე (55), რევაზ ლაშხი (60), ანტონ მამაგეიშვილი (66), გენადი გოგიშვილი (74), ვლადიმერ გეგეშიძე (84), მიხეილ ქაჯაია (96) და გურამ ფერსელიძე (120) წაიყვანა.

ამ შემადგენლობაში ერთი ცვლილებაა, რისი გაკეთებაც დარჩიას იძულებით მოუხდა - კოჭი ვერ მოირჩინა ევროპის ბრინჯაოს პრიზიორმა სოსო ჯაბიძემ (96) და მის ნაცვლად გუნდში ქაჯაია ჩართო. ჯაბიძეს კოჭი მაშინაც აწუხებდა, როცა დარჩიამ შემადგენლობა დაასახელა - სამი კვირის წინ, თუმცა ექიმებზე დაყრდნობით იმედოვნებდა, რომ ტრავმა მოუშუშდებოდა. ეს არაა ერთადერთი ტრავმა, რამაც გუნდის დაკომპლექტებაზე გავლენა მოახდინა - იმავე მიზეზით მინსკში მსოფლიოს ვერცხლისა და ევროპის ბრინჯაოს პროზიორ მანუჩარ ცხადაიას (66) და ოლიმპიურ, მსოფლიოსა და ევროპის ჩემპიონ მანუჩარ კვირკველიას (74) წასვლა ადრევე გამოირიცხა. გაცივდა და სრულყოფილად ვერ ივარჯიშა ევროპის ორგზის და მსოფლიოს ჩემპიონმა, ოლიმპიადის ვერცხლის მედალოსანმა რამაზ ნოზაძემ (96). მისი წასვლაც ამ მიზეზით გამოირიცხა.

კარავაევის ტურნირი გუნდური შეჯიბრებაა, თუმცა აქამდე ჩვეულებრივი ფორმატით ტარდებოდა. რეფორმა გაისად მინსკშივე გასამართ მსოფლიოს თასს უკავშირდება - მასპინძლები იმ შეჯიბრებისთვის რეპეტიციას ახლავე გადიან. თუმცა გუნდურობაა იმის მიზეზი, რომ დარჩიამ უფრო დიდი შემადგენლობა არ წაიყვანა - იქ მხოლოდ ერთი სათადარიგოა დასაშვები. ამასთან, ჩვენებისთვის მთავარი შეჯიბრება მაინც 22-24 დეკემბერს გასამართი საქართველოს ჩემპიონატია. ზოგმაც იმ ტურნირისთვის უკეთ მომზადების მიზნით ითხოვა გათავისუფლება - ვისაც წონის დაკლება უწევს ან გადაღლილობის საფრთხე არსებობდა (თუმცა ამის საშიშროება ნაკლებად გვგონია, რადგან ჩვენები არ არიან შეჯიბრებებით გადატვირთულები).

წინასწარი მონაცემებით, ტურნირში ჩვენს გარდა ბელარუსის, რუსეთის, აშშ-ს, აზერბაიჯანის, სომხეთის, უკრაინის და საფრანგეთის გუნდები გამოვლენ. კარავაევის მემორიალი კომერციულია - გამარჯვებული ნაკრები 60 ათას დოლარს მიიღებს.


ყოველდღიური სპორტული გაზეთი
"ლელო"