საქართველოს ახალგაზრდული ნაკრები თავისუფალ ჭიდაობაში უკანასკნელ წლებში განსაკუთრებით წარმატებულია. ახლახან ბათუმში საქართველოს წლევანდელი ახალგაზრდული ჩემპიონატი ჩატარდა, სადაც ახალი ნაკრების ბირთვი უნდა გამოკვეთილიყო.ჩემპიონატის შესაფასებლად და ნაკრების მიმდინარე სეზონის გეგმებზე გუნდის მთავარ მწვრთნელი ნუგზარ სხირელი გვესაუბრება.
- ჩემპიონატის წინაც განვაცხადე, რომ შარშან ახლგაზრდულ ნაკრებში უფრო რჩეულებმა მოიყარეს თავი. თუმცა ამჟამინდელი გამარჯვებულები და პრიზიორებიც არ არიან მაინცდამაინც სუსტები. სხვათა შორის, ჩემპიონატზე, კენჭისყრისას მე განთესვის წინააღმდეგი წავედი და მესამე ადგილოსნების გამოსავლენად დამატებითი შერკინებაც არ დავუშვი.
- ახალგაზრდების წლევანდელი ჩემპიონატი გამორჩეული იყო იმით, რომ
- საუკეთესონი უწინდელივით მხოლოდ სამი-ოთხი ქალაქის წარმომადგენლები არ გამხდარან. ამჯერად ქვეყნის შვიდი რეგიონის 15 ქალაქიდან მოხვდნენ სამეულებში. ეს რეგიონებში მომუშავე მწვრთნელების დამსახურებაა. განსაკუთრებით ახალგაზრდა საგარეჯოელი მწვრთნელი რამაზ ასაბაშვილი მინდა გამოვყო. მისი აღზრდილია 74 კგ-ში ევროპისა და მსოფლიოს შარშანდელი ტრიუმფატორი დავით ხუციშვილი, რომელიც წლეულს უკვე დიდებში ასპარეზობს. აგერ ახლა იმავე წონაში ისევ ასაბაშვილის კიდევ ერთი შეგირდი ბექა პეტრიაშვილი გახდა ჩემპიონი. მისივე მოსწავლეა 50 კგ-ში გამარჯვებული ლევან როჭიკაშვილიც. ადრეც მითქვამს და კიდევ გავიმეორებ, რომ ეს შრომისმოყვარე ახალგაზრდა საგარეჯოელი სპეციალისტი იმსახურებს სამუშაო პირობების გაუმჯობესებას. ნაყოფიერად მუშაობს ხაშურში გია კვინიკაძე. მას შარშან ერთი ჩემპიონი ჰყავდა, წლეულს უკვე სამი პრიზიორი გაუხდა.
- კვინიკაძის ყველაზე წარმატებული შეგირდი ლაშა ტალახაძე ახლა სხვა წონაში გამოდიოდა...
- ტალახაძემ შარშან 50 კგ-ში იჭიდავა და საქართველოს ჩემპიონობის გარდა ევროპაზე ბრინჯაო და მსოფლიოზე ვერცხლი მოიპოვა. ლაშამ, რატომღაც, ახლა 55 კგ-ში გამოვიდა და ფინალის მიღმა დარჩა. ამიტომ რეკომენდაცია მივეცი, ისევ ძველ წონას დაუბრუნდეს და უახლოეს საერთაშორისო ტურნირებზე მას როჭიკაშვილთან ერთად გამოვცდი.
- 55-ში ლიდერს, ლადო ხინჩეგაშვილს, ისევე, როგორც 84-ში დათო მარსაგიშვილს არ უჭიდავიათ...
- ეს ფალავნები თავიანთი წონის ლიდერები არიან. ისინი უფროსების ნაკრებშიც სჭრიდებათ და სწორედ ჩვენი ყველა ნაკრების მწვრთნელთა საბჭოს გადაწყვეტილებით გამოტოვეს ახალგაზრდული ჩემპიონატი. შესაბამისად ახალგაზრდების ევროპის და მსოფლიოს ჩემპიონატებზე, თუ რაიმე გაუთვალისწინებელი არ მოხდა, ისინი იჭიდავებენ. საქართველოს ჩემპიონები ლაშა ლომთაძე (55) და ალექსანდრე ამინაშვილი (84) კი სამაგიეროდ საერთაშორისო ტურნირებსა და გერმანიის მსოფლიოს თასზე გამოვლენ.
- მომდევნო 60 და 66 კგ წონით კატეგორიებში ოქროს მედლები გორელებს ერგოთ. წლეულს კიდევ უფრო შთამბეჭდავი იყო თქვენი შეგირდების შედეგი.
- გეთანხმებით, ჩვენი დარბაზის აღზრდილებმა ამ ჩემპიონატზე 2 ოქროს ამდენივე ვერცხლის და 4 ბრინჯაოს მედალი მოიპოვეს. 66 კგ-ში საპრიზო სამეულში სულაც შიდა ქართლელები მოხვდნენ. საინტერესოა, რომ მათგან თითქმის ნახევარი სიჭაბუკის ასაკშია. ასე რომ, გაისად ახალგაზრდებში მათგან უფრო წარმატებულ სეზონს უნდა ველოდოთ.
- უკანასკნელი ორი-სამი წელიწადია ნაკრებში 96 კგ წონით კატეგორიას ერთ-ერთ ყველაზე სუსტ რგოლად მიიჩნევდით. ამჯერად რა მდგომარეობაა?
- გამოკვეთილ ლიდერს ვერ ვხედავთ. ფავორიტობისათვის საბრძოლველად, ვფიქრობ, საპრიზო სამეულს მივცემ შანსს სხვადასხვა საერთაშორისო ტურნირებზე.
- რთული მდგომარეობაა მძიმე წონაშიც...
- რა თქმა უნდა. ერთდროულად ორი ძლიერი და წარმატებული ფალავანი გიორგი საკანდელიძე და ლევან ბერიანიძე დიდების ნაკრებში გადავიდნენ. ამ ეტაპზე მათი სრულფასოვანი შემცვლელები არ ჩანან, ვნახოთ რა შედეგს აჩვენებენ საერთაშორისო არენაზე ჩემპიონი ასლანიშვილი და ვერცხლის პრიზიორი გზირიშვილი.
- მძიმე წონაში მესამე საპრიზო ადგილზე 16 წლის გორელი ფალავანი გენო პერტიაშვილი გავიდა...
- მისი ასაკიდან გამომდინარე ეს შეიძლება სენსაციადაც ჩაითვალოს, მაგრამ თუ გავითვალისწინებთ გენოს შესაძლებლობებს სულაც არ უნდა იყოს მოულოდნელობა. მეტად პერსპექტიული მოჭიდავეა. ამჯერად ჭაბუკთა ნაკრებში ლიდერია წონაში, სამომავლოდ მისი წარმატებებისა ძალიან მეიმედება.
- ნაკრების მიერ დაგეგმილ წლევანდელ საერთაშორისო ტურნირებზეც გვითხარით...
- ევროპის ჩემპიონატამდე ტრადიციულად რიგის (19-20 მარტს), ბაქოს (20-23 აპრილს) და შემდგომ თურქეთის საერთაშორისო ტურნირებზე ვაპირებდით ასპარეზობას. თურქეთი ამოვარდება, ვინაიდან ფილა-მ მაისის ბოლოს გერმანიაში მსოფლიოს თასის გათამაშება დაგეგმა, სადაც აუცილებლად უნდა გამოვიდეთ, თურქებს კი მსოფლიოს თასთან ძალიან ახლოს აქვთ შეჯიბრება დანიშნული, რაც ხელს არ გვაძლევს. ამიტომ, 6-8 მაისს რუმინეთის საერთაშორისო ტურნირზე გამოსვლა დავგეგმეთ. მით უფრო, რომ იქ გამოსვლა მსოფლიოს ჩემპიონატისათვის აკლიმატიზაციაშიც შეგვიწყობს ხელს. ეს შეჯიბრება სწორედ რუმინეთში, ივლისშია დეგეგმილი, ევროპის ჩემპიონატი კი - ივნისის ბოლოს სერბეთში. ნაკრების შემადგენლობა მხოლოდ გერმანიის მსოფლიოს თასის მერე გახდება ცნობილი.
- ვიცით, რომ სპორტის სამინისტრო ძალიან გეხმარებათ.
- სამინისტრომ, რის საშუალებაც აქვს, მაქსიმალურად ხელი შეგვიწყო, როგორც შეკრებების, ისე ტურნირების დროს. არ მახსოვს მსგავსი ხელშეწყობა და გულისხმიერი მიდგომა, როგორც ახლა. ადრე მწვრთნელებს ხელფასიც არ გვქონდა. ფაქტობრივად ბოლო წლებში ვიგრძენით მწვრთნელებად თავი, ახლა ჩვენი სპორტის მესვეურები მუდამ გვეკითხებიან აზრს, თუ რა და როგორ სჯობს. მოკლედ, უკეთესობისკენ რადიკალურადაა ვითარება შეცვლილი, რაც, ცხადია, დიდი სტიმულია.
.
