თერთმეტგზის მაგდალენა

რუპოლდინში მსოფლიო ჩემპიონატი სპრინტით გაგრძელდა. ქალებს შორის მასპინძელმა მაგდალენა ნოიერმა კიდევ ერთხელ დაამტკიცა, რომ დღეს ის ყველაზე ძლიერია სპორტის ამ სახეობაში და რა სამწუხაროა, რომ კარიერის ზენიტში მყოფი გერმანელი ამ სეზონის შემდეგ აქტიურ კარიერას ასრულებს.

ნოიერი სტარტის წინ ამბობდა, რომ მთავარი იყო სროლისას შეცდომა არ დაეშვა. და მან ეს ამოცანა წარმატებით გადაჭრა. სროლის სისწრაფით ის მეორე იყო, რბოლაში სისწრაფით კი მხოლოდ დარია დორმაჩოვას ჩამორჩა, მაგრამ გერმანელმა ბელარუსზე 28 წამით ნაკლები დახარჯა ათ გასროლაზე და ტიტული მას დარჩა.

ნოიერი მსოფლიოს 11-გზის ჩემპიონი გახდა. ხანდახან დაუჯერებელია, რომ 25 წლის სპორტსმენმა კარიერაში უკვე ამდენს მიაღწია და კიდევ უფრო რთულია იმის დაჯერება, რომ მაგდალენა დიდი სპორტიდან მიდის.

რა თქმა უნდა, აუცილებლად უნდა გამოვყოთ დორმაჩოვას გამოსვლა. ვერცხლის პრიზიორს სროლის სისწრაფეში მართლაც აქვს პრობლემები, მაგრამ სიზუსტის მხრივ გართულება არ ჰქონია და ეს უკვე პროგრესია. შესაძლოა, ნოიერის წასვლის შემდეგ სწორედ დორმაჩოვას ეპოქა დადგეს. ამის ყველა პირობა არსებობს.

სპრინტი. ქალები
1. მაგდალენა ნოიერი (გერმანია) - 21:07.0 (0+0); 2. დარია დორმაჩოვა (ბელარუსი) - +15.2 (0+0); 3. ვიტა სემერენკო (უკრაინა) - +37.6 (0+0); 4. ჰელენა ეკჰოლმი (შვედეთი) - +44.9 (0+0); 5. მარი ლორ ბრიუნე (ფინეთი) - +46.7 (0+0); 6. ტორა ბერგერი (ნორვეგია) - +52.4 (0+1).

* * *
მამაკაცთა სპრინტში მსოფლიოს ჩემპიონი გახდა ბიატლონისტი, რომელმაც სროლისას ორი შეცდომა დაუშვა. ასეთი რამ ამ დისციპლინაში იშვიათად ხდება. სპრინტში ერთი შეცდომითაც რთულია მოგება, რომ არაფერი ვთქვათ ორ აცილებაზე. რთული მეტეოროლიგიური პირობებისას ფრანგებმა საუკეთესოდ შეარჩიეს თხილამურები. საუკეთესო ათეულში სამი ფრანგი აღმოჩნდა, პირველ ადგილზე კი მარტენ ფურკადი გავიდა.

მსოფლიოს თასის საერთო ჩათვლის ლიდერმა თითო სასროლეთზე თითო შეცდომა დაუშვა, ისევე, როგორც მისმა მთავარმა კონკურენტმა ემილ ჰეგლე სვენდსენმა, რომელმაც ვერცხლი მოიპოვა. ფინიშზე ფრანგმა ნორვეგიელს 15 წამი მოუგო, რაც გადამწყვეტი ფაქტორი აღმოჩნდა.

ასეა თუ ისე, რბოლის ტემპით სვენდსენი და ფურკადი აშკარად ჯაბნიდნენ დანარჩენებს. კონკურენტები ნახევარ წამზე მეტით ჩამორჩნენ ამ დუეტს.

ძალიან სუსტად გამოვიდა გერმანიის ნაკრები. მასპინძელთაგან საუკეთესო - ანდრეას ბირნბაჰერი მე-16 ადგილზე გავიდა, გემპლი - მე-19-ზე, წინა ჩემპიონატის სპრინტის ტრიუმფატორი პაიფერი - 37-ეზე.

სპრინტი. კაცები
1. მარტენ ფურკადი (საფრანგეთი) - 24:18.6 (1+1); 2. ემილ ჰეგლე სვენდესენი (ნორვეგია) - +15.1 (1+1); 3. კარლ იუჰან ბერგმანი (შვედეთი) - +17.7 (0+0); 4. დანიელ მეზოტიჩი (ავსტრია) - +27.1 (0+0); 5. სიმონ ფურკადი (საფრანგეთი) - +35.4 (2+0); 6. ფრედრიკ ლინდსტრიომი (შვედეთი) - +35.6 (0+1).

ყოველდღიური სპორტული გაზეთი "ლელო"