ჰოკეის ეროვნული ლიგის პლეი ოფი მეკარეების დომინირებით მიმდინარეობს. პირველი რაუნდის მეორე დღეს კიდევ ორი "შათაუტი" დაფიქსირდა და ამის წყალობით სტუმარმა გუნდებმა შეძლეს გამარჯვების მოპოვება.
აღმოსავლეთი
ბოსტონი-მონრეალი 0:2
0:1, 0:0, 0:1
გოლები: 0:1 ჯონტა-1 (გომესი-1), 0:2 ჯონტა-2 (გომესი-2).
სერია: 0:1
რიგით მესამე "შათაუტის" ავტორი გახდა კერი პრაისი. არადა, ასეთ გმირობას მისი მეტოქე გოლკიპერისგან - ტიმ ტომასისგან უფრო ელოდნენ. ბოსტონელი მეკარე ლიგის ლიდერი გახდა გაშვებული გოლების, მოგერიებული დარტყმებისა და მოგებათა პროცენტული მაჩვენებლის მიხედვით, ხოლო ცხრა "შათაუტით" ის რეგულარულში მეორე ადგილზე გავიდა.
პრაისს შარშან
ყველაზე საინტერესო ის არის, რომ პრაისმა ბოლო ორ მატჩში "ბოსტონის" წინააღმდეგ საშინლად ითამაშა - სწორედ ის იცავდა თავს 6:8 და 0:7 წაგებულ მატჩებში.
ფილადელფია-ბაფალო 0:1
0:0, 0:0, 0:1
გოლი: 0:1 კალეტა-1 (გრანიანი-1, გოსტადი-1).
სერია: 0-1
ამ სერიაში "ბაფალო" ყველას განწირული ჰგონია. ამ გუნდის ერთადერთი პლუსი ვანკუვერის ოლიმპიადის საუკეთესო მოთამაშე - მეკარე რაიან მილერია. სწორედ ამერიკელმა გოლკიპერმა მოაგებინა გუშინ პირველი თამაში "სეიბრზს". მის ანგარიშზე 35 სეივი მოდის.
მილერმა სასწაულები მოახდინა მეორე პერიოდში - თითქმის 50 წამი გაუმკლავდა "ფილადელფიას", რომელსაც ორით მეტი ჰოკეისტი ჰყავდა ყინულზე და 20 წუთის განმავლობაში 16 დარტყმა მოიგერია. ხოლო, როცა "ბაფალომ" მეტოქის შტურმი მოიგერია და დროებით ინიციატივა მოიპოვა, პატრიკ კალეტამ მატჩში ერთადერთი გოლი გაიტანა და "ბაფალოს" ამ სერიაში საკუთარი მოედნის უპირატესობა მოაპოვებინა.
არადა, "ბაფალოს" სტენლის თასზე საერთოდ არ ელოდებოდნენ - სადღაც იანვრის შუაში ეს გუნდი პლეი ოფის ზონას 10 ქულით იყო დაცილებული, მაგრამ რეგულარულის ბოლო 13 მატჩში მხოლოდ ერთი წააგო და მეშვიდე ადგილიდან გავიდა სტენლის თასზე.
რა თქმა უნდა, "ფილადელფიასთვის" ერთი მატჩის წაგება არაფერს ნიშნავს. შარშან ამ გუნდმა 0:3-დან გადაარჩინა "ბოსტონთან" სერია და შემდეგ ფინალშიც გააღწია. ასე რომ, აქ ჯერ ყველაფერი წინ არის.
დასავლეთი
სან ხოსე-ლოს ანჯელესი 3:2 (ო)
1:0, 1:2, 0:0, 1:0
გოლი: 1:0 ჰიტლი-1 (ქლოუ-1, ი.უაიტი-1), 1:1 დ.ბრაუნი-1 (ჯასტინ უილიამსი-1), 2:1 კუტური-1 (ქლოუ-2, მიურეი-1), 2:2 ჯასტინ უილიამსი-1 (რ.სმიტი-1), 3:2 პაველსკი-1 (ველვუდი-1, ქლოუ-3).
სერია: 1-0
ერთადერთი გუნდი, რომელმაც გუშინ შინ მოიგო, "სან ხოსე" იყო. ცნობილია, რომ "შარქსი" მაღალ დონეზე გამოდის რეგულარულ ჩემპიონატში და შემდეგ პლეი ოფში ვეღარ აჩვენებს კარგ თამაშს - ბოლო ექვსი სეზონის განმავლობაში ამ გუნდმა ხუთჯერ წააგო პირველი წრის სერია. მაგრამ, როგორც ჩანს, "ზვიგენების" სამწვრთნელო შტაბმა წელს ტაქტიკა შეცვალა. რეგულარულის მსვლელობისას კარგა ხანი "შარქსის" პლეი ოფში მოხმედრა-არმოხვედრის საკითხი იდგა დღის წესრიგში, მაგრამ ბოლოს გუნდმა კარგი ტემპი აკრიფა და საბოლოოდ, დასავლეთში მეორე ადგილი დაიკავა.
წინა წლებში პლეი ოფში კიდევ უფრო უარესი შედეგები ჰქონდა "ლოს ანჯელესს". ეს გუნდი 1993 წელს უეინ გრეტცკის წყალობით ფინალში მოხვდა, მაგრამ იქედან მოყოლებული 18 წლის განმავლობაში პლეი ოფის ერთადერთი სერია მოიგო.
"კინგზისთვის" შეხვედრა კატასტროფულად დაიწყო - 28 წამზე დენი ჰიტლიმ გახსნა ანგარიში. რომ არა სტუმრების მეკარის ჯონათან კუიკის ბრწყინვალე თამაში (42 დარტყმა მოიგერია), მატჩის ბედი კარგა ხნით ადრე გადაწყდებოდა, ასე კი "ლოს ანჯელესმა" შეხვედრა ოვერტაიმში გადაიყვანა, მაგრამ იქ ჯო პაველსკის ფაქტორი არ გაითვალისწინა და დამარცხდა. პაველსკი ის ჰოკეისტია, ვინც შარშან სტენლის თასზე "შარქსის" პირველ რვა მატჩში ცხრა გოლი გაიტანა. ახლა ამ ფორვარდმა, როგორც ჩანს, ახალი შედეგიანი სერია დაიწყო.
