მოგება ზეიმის ფონზე

გუშინ, რეგულარულ ჩემპიონატში ერთადერთი შეხვედრა გაიმართა, რომელშიც "ანაჰაიმი" "სენტ ლუისს" მასპინძლობდა. მატჩის წინ კალიფორნიული პუბლიკა სპეციალური ცერემონიით მიესალმა "დაქსის" ფორვარდს კორი პერის, რომელმაც შარშან 50 გოლი გაიტანა, 98 ქულა დააგროვა და რეგულარული სეზონის MVP-ის ტიტული მიიღო, რაც აქამდე "ანაჰაიმის" არც ერთ ჰოკეისტს არ ღირსებია.

სეზონის სტარტზე "დაქსის" პირველი სამეული არც ისე დამაჯერებლად გამოიყურება, თუმცა ამ მატჩში ძალიან ძლიერად ითამაშა. მასპინძლებმა სტარტზევე გამოიყენეს რიცხობრივი უპირატესობა - ფრანსუა ბოშემენის ძლიერი დარტყმა მეკარე იაროსლავ ჰალაკმა მოიგერია, მაგრამ დამატებაზე ყველას აჯობა ბობი რაიანმა - 1:0.

მეორე პერიოდის დასაწყისში "ანაჰაიმს" სამი გოლის გატანა შეეძლო. "სენტ ლუისმა" მთლიანად წააგო სივრცე თავის კართან, საიდანაც თავისუფლად ურტყამდნენ კოლიანო, გეტცლაფი და პერი. სამივე შემთხვევაში ბრწყინვალედ ითამაშა ჰალაკმა. მეკარემ თავის გუნდს შანსი მისცა და "ბლუზმენებმა" პირველივე საპასუხო შეტევაში გაიტანეს - პიეტრანჯელომ ცისფერი ხაზიდან დაარტყა და ბერგლუნდმა შაიბას მიმართულება შეუცვალა.

ბოლო პერიოდის სტარტზე ჰალაკმა თავისი სეივების კოლექცია სელიანეს დარტყმის შემდეგ შეავსო, მაგრამ მარტო მეკარე მთელი 60 წუთი ვერ გაათრევდა ბოლომდე თავის გუნდს. კიდევ ერთი რიცხობრივი უპირატესობის გათამაშების შემდეგ მასპინძლებმა დასარტყმელ პოზიციაზე გაიყვანეს ბოშემენი - ძლიერი დარტყმა, რიკოშეტი და 2:1 "ანაჰაიმის" სასარგებლოდ.

იქვე "ბლუზმენები" კიდევ ერთხელ დაჯარიმდნენ და კორი პერიმ სეზონში პირველი გოლი გაიტანა. "სენტ ლუისს" მატჩის გადარჩენის შანსი რაიანმა მოუსპო, რომელმაც ერთი ერთზე გასვლა გამოიყენა. საფინალო სირენამდე სტუმრებმა მეტოქის სამ გოლს მხოლოდ ალექს სტინის შაიბით უპასუხეს.

"ანაჰაიმმა" ოთხიდან მესამე შეხვედრა მოიგო, "სენტ ლუისს" კი ხუთიდან მხოლოდ ორი მოგება აქვს.

ანაჰაიმი-სენტ ლუისი 4:2
1:0, 0:1, 3:1
გოლები: 1:0 რაიანი-1 (ბოშემენი-1, სბისა-1), 1:1 ბერგლუნდი-2 (პიეტრნაჯელო-2, ჰასკინსი-2), 2:1 ბოშემენი-1 (რაიანი-1, სბისა-2), 3:1 პერი-1 (სელიანე-1, გეტცლაფი-1), 4:1 რაიანი-2 (გეტცლაფი-2, ბრუკბანკი-1), 4:2 სტინი-3 (არნოტი-3, ჯეკმენი-1).

ყოველდღიური სპორტული გაზეთი "ლელო"