1998 წლის ოლიმპიური თამაშების ჩემპიონი, ლეგენდარული ჩეხი გოლკიპერი დომინიკ ჰაშეკი ისევ აპირებს კარიერის განახლებას. 47 (!) წლის მეკარემ, შესაძლოა, კონტრაქტი გააფორმოს ჰოკეის ეროვნული ლიგის კლუბებთან – “ბაფალო სეიბრზთან” ან “დეტროიტ რედ უინგზთან”. ამ ინფორმაციას ჩეხური ინტერნეტ-გამოცემა Hokej.cz ავრცელებს.
ვებგვერდის ცნობით, ჰაშეკი ცოტა ხნის წინ ამერიკის შეერთებულ შტატებში იმყოფებოდა, სადაც ამ კლუბების წარმომადგენლებთან გამართა მოლაპარაკებები. თავად ჰოკეისტმა განაცხადა, რომ აშშ-ში თავისი შვილის მოსანახულებლად ჩავიდა, რომელიც ამ ქვეყანაში სწავლობს.
მაგრამ ამასთან, ჰაშეკმა ისიც გაამხილა,
2010-11 წლების სეზონში ჰაშეკი კჰლ-ის ლიგაში მოსკოვის “სპარტაკში” თამაშობდა. ჩემპიონატის დასრულების შემდეგ ჩეხმა პაუზის აღება გადაწყვიტა. ჰაშეკმა არაერთხელ განაცხადა, რომ არ ითამაშებს ჩეხეთის ჩემპიონატში და უპირატესობას ჰოკეის ეროვნულ ლიგას ანიჭებს.
ჰაშეკს NHL-ში სწორედ “ბაფალოსა” და “დეტროიტის” შემადგენლობაში უთამაშია. 2002 და 2008 წლებში მან “რედ უინგზთან” ერთად ორჯერ მოიგო სტენლის თასი. ჩეხი ექვსჯერ გახდა ლიგის საუკეთესო მეკარე, გარდა ამისა, ორჯერ მოიპოვა სეზონის საუკეთესო მოთამაშის პრიზი.
ჩეხოსლოვაკიის ნაკრებთან ერთად “დომინატორმა” მსოფლიოს 1983 წლის ჩემპიონატზე ვერცხლის მედალი მოიპოვა. ჩეხეთის ნაკრებს 1998 წელს, ნაგანოს ოლიმპიადაზე ოქრო მოაგებინა, 2006 წელს ტურინის ოლიმპიადაზე ის ბრინჯაოს მედლის მფლობელი გახდა.
ყოველდღიური სპორტული გაზეთი "ლელო"
