გუშინ ჰოკეის ეროვნულ ლიგაში მხოლოდ სამი მატჩი გაიმართა და მათგან აღსანიშნავი იყო "ტამპა ბეისა" და "ნეშვილის" შეხვედრა. ამ გუნდებმა სეზონი კარგად დაიწყეს და ეს მატჩიც საკმაოდ მაღალ დონეზე ჩაატარეს.
"ტამპას" ამჟამინდელი მეკარე დენ ელისი თავის ყოფილ გუნდს უპირისპირდებოდა. მასპინძლების რიგებში კვლავ ვერ ვიხილეთ საიმონ განიე, ამიტომაც "ლაითნინგის" შეტევით სამეულებში ამჯერადაც საჭირო გახდა გარკვეული ცვლილებების შეტანა. მაგალითად, ლეკავალიემ დროის დიდი ნაწილი ბერგენჰაიმთან და პურსელთან ერთად ითამაშა.
"პრედატორზმა" შეხვედრა უფრო აქტიურად დაიწყო, დიდ დროს ატარებდა მეტოქის ზონაში, მაგრამ საკუთარი კართან პირველი მომენტისას
თუმცა "ნეშვილი" შემთხვევით არ მიიჩნევა ლიგის ერთ-ერთ ყველაზე უხერხულ მეტოქედ. სტუმრებმა ინიციატივა ხელთ იგდეს და ელისის კარს შეუტიეს. ისინი ძირითადად ცისფერი ხაზიდან დარტყმებს ანიჭებდნენ უპირატესობას და რიკოშეტებისა და დამატებების იმედი ჰქონდათ. ტაქტიკამ ორჯერ გაამართლა. ანგარიში კაპიტანმა ში უებერმა გაათანაბრა - მან მეკარის მოგერიებულს დაამატა. სტუმრები წინ სერგეი კოსტიცინმა გაიყვანა, რომელიც მეკარის საჯარიმოში ყველაზე კარგად გაერკვა სიტუაციაში.
მეორე პერიოდი მთლიანად "ლაითნინგს" დარჩა, რაშიც "ნეშვილის" სამმა გაძევებმაც ითამაშა დიდი როლი. რიცხობრივი უპირატესობისას "ტამპა ბეის" თამაში სტემკოსის ძლიერ დარტყმაზეა აგებული, რაც "პრედატორზში" კარგად იცოდნენ და ამიტომაც ბომბარდირს უებერი მიამაგრეს. ოლიმპიურმა ჩემპიონმა კარგად გაართვა თავი ამოცანას და შარშანდელი სეზონის საუკეთესო სნაიპერს სამი გაძევების განმავლობაში მხოლოდ ორჯერ დაარტყმევინა. "ნეშვილმა" ყველა საფრთხე მოიგერია, პერიოდის ბოლოს კი თანაბარი შემადგენლობებისას კოდი ფრანსონი გაექცა მცველებს და მეკარე ეინისი ლამაზი ფინტით მოატყუა - 3:1.
ბოლო პერიოდში სტუმრები კარგად იცავდნენ თავს და ტემპის დაგდებაც გამოსდიოდათ. "ტამპას" მაინც ჰქონდა მომენტები, მაგალითად, ლეკავალიეს ერთი ერთზე გასვლა, მაგრამ იმ დღეს ბრწყინვალე იყო "ნეშვილის" შვედი მეკარე ანდრეს ლინდბეკი. სტუმრებმა გაუძლეს მეტოქის შეტევებს და შეტევაზეც იზრუნეს. მეოთხე გოლისას მარტინ ერატისგან ყველა დარტყმას ელოდა, მან კი შესანიშნავი პასით უილსონს გაატანინა - 4:1.
თითქოს ეს "ლაითნინგის" დასასრულს ნიშნავდა, მაგრამ მასპინძლებმა ერთწუთიან ინტრევალში გაიმარჯვეს - ჯერ სენტ ლუისმა გაიტანა მაღალ კუთხეში, შემდეგ კი ჰოლმა მეტოქე მცველს გაარტყა შაიბა და რიკოშეტით შეაგდო შაიბა. მასპინძლებს ოთხი წუთი რჩებოდათ თამაშის გადასარჩენად და შტუმრზე წავიდნენ. თანაც რიცხობრივი უპირატესობა მიიღეს, მაგრამ "ნეშვილმა" გაძლო და რეგულარული ჩემპიონატის ლიდერი გახდა.
"ნიუ ჯერსის" შემადგენლობაში დაბრუნდა ილია კოვალჩუკი, გოლიც გაიტანა, მაგრამ "ეშმაკებმა" მორიგი მატჩი წააგეს. რამდენიმე წამყვანი ჰოკეისტის არყოფნაში "რეინჯერსი" მაინც კარგად გამოიყურება, რაც აღნიშნულმა შეხვედრამ დაადასტურა. "ნიუ ჯერსი" კონფერენციის ბოლო ადგილზე რჩება, ნიუიორკელებმა კი აღმოსავლეთის მეექვსე ადგილზე გადაინაცვლეს.
მოულოდნელი შედეგით დაასრულა კანადაში მეორე მატჩი "სან ხოსე შარქსმა". ერთი დღით ადრე "ედმონტონის" განადგურების შემდეგ, "ზვიგენებმა" კალგარიში ოთხი უპასუხო შაიბა მიიღეს. თანაც ყველა გოლი ამ მატჩში პირველ პერიოდში, 11 წუთის ინტერვალით გავიდა, ხოლო კალიფორნიელთა მეკარემ ნიემიმ ხუთ დარტყმაში გაუშვა სამი შაიბა, რის შემდეგაც თავისი ადგილი თანამემამულე ნიიტიმიაკის დაუთმო. "კალგარი" თავის დივიზიონის ლიდერად რჩება და ორი ქულით უსწრებს "ვანკუვერსა" და "კოლორადოს".
ტამპა ბეი-ნეშვილი 3:4
1:2, 0:1, 2:1
გოლები: 1:0 ბერგენჰაიმი-3 (კუბინა-2), 1:1 უებერი-1 (ბუიონი-2, კ. ო'რაილი-5), 1:2 ს. კოსტიცინი-1 (სპალინგი-1, სმიტსონი-1), 1:3 ფრანსონი-2 (ლეგუანდი-3, ტუტუ-3), 1:4 უილსონი-2 (ერატი-3, დუმონი-4), 2:4 სენტ ლუისი-3 (სტემკოსი-7, ჰედმანი-6), 3:4 ჰოლი-1 (ტომპსონი-1, ლუნდინი-2).
რეინჯერსი-ნიუ ჯერსი 3:1
0:0, 2:0, 1:1
გოლები: 1:0 როჟსივალი-2 (ფედოტენკო-2, ეივერი-5), 2:0 კელეჰანი-1 (დუბინსკი-3, როჟსივალი-4), 2:1 კოვალჩუკი-3 (ზუბრუსი-5, კორენტი-2), 3:1 დუბინსკი-4 (კელეჰანი-5).
კალგარი-სან ხოსე 4:0
4:0, 0:0, 0:0
გოლები: 1:0 ბურკი-5 (ჰაგმანი-1, ბ. მორისონი-6), 2:0 იგინლა-2 (ტანგეი-2, ი. უაიტი-2), 3:0 კონროი-2 (მეიერი-1, ჯეკმენი-1), 4:0 ბურკი-6 (ტანგეი-3, სტაიანი-6).
ყოველდღიური სპორტული გაზეთი
"ლელო"
