ხვიჩა კვარაცხელიას კიდევ უფრო დიდ სცენაზე ვიხილავთ. ჩემპიონთა ლიგის ნახევარფინალში პსჟ "არსენალს" დაუპირისპირდება. გუნდები, რომელთაც ეს ტიტული არასდრის მოუგიათ, არადა ძალიან ახლოს კი იყვნენ, ფინალში დამარცხდნენ. პირველი მატჩი ლონდონში, "ემირეითს სთეიდიუმზე" (60 704) შედგება - დღეს, 29 აპრილს, 23:00 საათზე.

ტრავმებისა და პრობლემების მიუხედავად, "არსენალმა" გზიდან თვით მადრიდის "რეალი" ჩამოიცილა და ლიგის ნახევარფინალში სულ მესამედ ითამაშებს - პირველად 2009 წლის შემდეგ. არტეტას გუნდს ამ ტურნირზე 8-მატჩიანი წაუგებელი სერია აქვს, ამაზე კარგი შედეგი მხოლოდ 2006 წელს იყო, როცა "მეთოფეები" ფინალში "ბარსელონასთან" დამარცხდა.

ლუის ენრიკეს ბიჭები ინგლისელ მეტოქეებს მშვენივრად გაუმკლავდნენ, მაგრამ "ასტონ ვილასთან" იყო წუთები, რომლითაც დამტკიცდა, რომ პსჟ უძლეველი არაა და პრემიერლიგის ინტენსივობის გაძლება მათთვის მაინც რთულია. პრობლემები ლიგა 1-ში პირველმა წაგებამაც გამოაჩინა.

ეს გუნდები ერთმანეთს ლიგის ფაზის ეტაპზე, 1-ელ ოქტომბერს შეხვდნენ და ლონდონელებმა (2:0) გაიმარჯვეს. საერთოდაც, ერთმანეთში ხუთჯერ ითამაშეს და პარიზელებს არასოდეს მოუგიათ. მათ ახლა ნავსის გატეხვის იმედი აქვთ.

"არსენალს" პრობლემები არ ეყოფოდა (გაბრიელის, ჰავერცისა და ჟესუსის არყოფნა) და მას თომას პარტეის დისკვალიფიკაცია დაემატა. ცუდი ისაა, რომ "ექვსიანზე" მისი პირდაპირ შემცვლელ ჟორჟინიოსაც ტრავმა აქვს და ამ შემთხვევაში დეკლან რაისს უკან დახევა მოუწევს. "კრისტალ პალასთან" დაპირისპირება ტრავმის გამო მიკელ მერინომ გამოტოვა, რომელიც ახლა უფრო სიღრმიდან ითამაშებს.

პარიზელთა რიგებში ტრავმა არავის აწუხებს და შემადგენლობა ოპტიმალურია. მიუხედავად ყველაფრისა, ლუის ენრიკეს მხრიდან იმ სასტარტო შემადგენლობას უნდა ველოდოთ, რომელიც" ნიცასთან" ვნახეთ.

უსმან დემბელეს ამ სეზონში 32 გოლი და 12 საგოლე პასი აქვს, თუმცა უკვე 5 მატჩია, არ გაუტანია და ამან მის ხასიათზეც ნეგატიურად იმოქმედა. ხვიჩა კვარაცხელიაზე ბევრი იქნება დამოკიდებული, მას ენრიკეს ტაქტიკაში დიდი დატვირთვა აქვს, პოზიციების ხშირი ცვლითა და არაორდინალური გადაწყვეტილებებით განსხვავება უნდა შექმნას. დარწმუნებულები ვართ, მიკელ არტეტას ქართველის შეჩერების გეგმას განსაკუთრებულ ყურადღებას მიაქცევს.

სავარაუდო შემადგენლობები

არსენალი: რაია - უაითი, სალიბა, კივიორი, ლუკას-სკელი - ოდეგორი, რაისი, მერინო - საკა, ტროსარი, მარტინელი;

პსჟ: დონარუმა - ჰაკიმი, მარკინიოსი, პაჩო, მენდეში - ნევეში, ვიტინია, რუიზი - დუე, დემბელე, კვარაცხელია.

მსაჯი: ვინჩიჩი (სლოვენია).

ოთხშაბათი, 23:00 სთ

ბარსელონა - ინტერი.

ხვიჩა დაისვენებს - ქართველების ბევრი გადამწყვეტი დაპირისპირება

კვარაცხელიას დიდი მატჩი ფინალისთვის და ნაცნობი "ინტერის" მოლოდინი

კვარაცხელიასთან ერთად თუ მის გარეშე - მე-40 წაუგებელისთვის...

თეგები:

ხვიჩა კვარაცხელია, პსჟ

გაზიარება:

(0)

/

(0)