
ცნობილმა პრომოუთერმა ლუ დიბელამ ავთანდილ ხურციძისა და ბილი ჯო სონდერსის მომავალ ბრძოლაზე აზრი გამოთქვა
ცნობილმა პრომოუთერმა ლუ დიბელამ, რომელიც ავთანდილ ხურციძის საქმეებს განაგებს, BoxingScene-სთან ინტერვიუში ქართველი პროფესიონალი მოკრივის მომავალ ბრძოლაზე ისაუბრა, რომელიც 8 ივლისს, ლონდონში უნდა გაიმართოს.
ხურციძე ბრიტანელ ბილი ჯო სონდერსს WBO-ს ვერსიით საშუალო წონაში მსოფლიოს ჩემპიონის ქამრისთვის დაუპირისპირდება.
"ბილი ჯო ძალიან გამოცდილი მოკრივეა, მაგრამ არასდროს იცი, რას შემოგვთავაზებს. რაც შეეხება ხურციძეს, მას უფრო სწყურია მოგება, ვიდრე - სონდერსს. ის დაუნდობელია შეტევაში და ბრძოლის ნებისმიერ ეტაპზე სახიფათოა.
შესაძლოა, ხურციძე მეოთხე-მეხუთე რაუნდებში ნოკდაუნში რამდენჯერმე აღმოჩნდეს კიდეც, მაგრამ მაინც შეტევაზე იქნება დაგეშილი და ბრძოლას გამარჯვებამდე მიიყვანს. ის საშიშია პირველიდან მეთორმეტე რაუნდის ჩათვლით", - ამბობს დიბელა.