პაველ გოოგე: სიტუაცია სპორტის სასახლეში სინათლის ჩაქრობამაც დაამძიმა [VIDEO]

00:00 / 00:00

თბილისის "ვითაში" საქმე აშკარად ცუდადაა...
ორი ტურის წინ "ვითადან" სნაიპერი დარიუს კარტერი წავიდა, შემდეგ მატჩში განაცხადში ვეღარ ვნახეთ რალსტონ ტერნერი... გუშინ ვითელები ჩეხეთის ჩემპიონ "ნიმბურკს" პიერია ჰენრის გარეშე დაუპირისპირდნენ. გუნდს ნელ-ნელა აკლდებიან წამყვანი კალათბურთელები, არადა, სეზონი სულ ორი თვის დაწყებულია. თუნდაც ეს გვაფიქრებინებს, რომ საქმე ცუდადაა.

ნამატჩევს მთავარმა მწვრთნელმა პაველ გოოგემ სწორედ კალათბურთელთა "მიგრაციაზე" თქვა:

"დავიმატეთ ახალგაზრდა სტარატელევი, ბოლოს შეგვემატა უკრაინელი ალექსეი ჩიგრინოვი, მაგრამ იგი ჯერ ვერ ვათამაშეთ... სამაგიეროდ, ერთმანეთის მიყოლებით დაგვაკლდნენ კარტერი, ტერნერი; ახლა შევიტყვე, რომ ჰენრის კონტრაქტი გერმანულ კლუბთან გაუფორმებია.

ვითიბი ლიგა სხვა დონეა და მასში რომ ითამაშო, თუნდაც ჰენრის დონის მოთამაშე საჭიროა. ჩვენ პრესკონფერენციებზე ორ კვირაში ერთხელ ვხვდებით, ვსაუბრობთ რეალობაზე, ვიტოვებთ იმედს, რომ უკეთესობა იქნება, მაგრამ ჯერ არაფერი გამოსწორებულა... ხელფასის ნაწილი კი მივიღეთ, მაგრამ მომავალზე ჯერ ვერ ვფიქრობთ.

კლუბის პრეზიდენტი სიტუაციის გამოსწორებაზე კი ზრუნავს, მაგრამ ჯერ სასიკეთო არაფერი ჩანს.

ეს ყველაფერი დადებით შედეგს ვერ მოიტანს - "ნიმბურკმა" პირველივე პერიოდში 20-ქულიანი უპირატესობა დაიბევა და დიდი სხვაობით დაგვამარცხა.

სიტუაცია იმანაც დაამძიმა, რომ შესვენებისას სპორტის სასახლეში სინათლე ჩაქრა და მეორე ტაიმის დაწყება დაგვიანდა..."

ვითიბი ლიგა

13 დეკემბერი. თბილისი, სპორტის სასახლე

ვითა-ნიმბურკი 59:119

17:37, 12:24, 15:32, 15:26

ვითა: მაისურაძე (2ქ, 5მ), ჩლაიძე (20ქ, 3პ), ბოქოლიშვილი (4ქ, 3პ), შენგელია (10ქ, 5მ), სტარატელევი (17ქ), ბიბილური, ანიკიენკო (6ქ, 9მ).

ნიმბურკი: ბენდა, რენდლი (14ქ), ჰრუბანი (9ქ), ველში (7ქ, 4პ), ჰოუსკა (4ქ), დიქსონი (13ქ, 4პ), ვილჰელმსონი (12ქ), პეტერკა (4ქ), დე ზეეუვი (16ქ, 4პ), ვონი (12ქ, 6მ), სანტ-როოსი (13ქ, 6მ, 6პ), კრიჟი (15ქ, 8მ).

მსაჯები: ს. ჩებიშევი (უკრაინა), ს. ბელიაკოვი (რუსეთი), ე. ვეტროვი (რუსეთი).

(იბეჭდება მცირე ცვლილებით)

ყოველდღიური სპორტული გაზეთი "ლელო"

თეგები: