ევრო 2016. ჯგუფური ეტაპის სიმბოლური ნაკრები და შეჯამება "ლელოს" ვერსიით

ევროპის პირველობაზე ორდღიანი შესვენებაა. ამოვისუნთქოთ და გასულ ბატალიებს გადავხედოთ.

მაშ ასე, როგორ აფასებს ევრო 2016-ის ჯგუფურ ეტაპს ჩემპიონატზე მომუშავე "ლელოს" ჯგუფი.

- დაასახელეთ ევრო 2016-ის III ტურის სიმბოლური ნაკრები, საუკეთესო ფეხბურთელი და მწვრთნელი.
ნიკოლოზ ნეფარიძე: კურტუა - კიმიხი, აიეტი, ჩორლუკა, ევრა - რემზი, ჯუჯაკი, პერიშიჩი - ბეილი, კალინიჩი, რონალდო. ფეხბურთელი - რონალდო, მწვრთნელი - ანტე ჩაჩიჩი.

ალეკო კაკაურიძე: ჰალდორსონი - კიმიხი, თოფალი, აიეტი, ევრა - ბეილი, ბრეიდი, რემზი, ჯუჯაკი - რონალდო, ბიოდვარსონი. საუკეთესო ფეხბურთელი - გარეთ ბეილი. საუკეთესო მწვრთნელი - ანტე ჩაჩიჩი.

გიორგი კაკაბაძე: ჰალდორსონი - კიმიხი, ჩორლუკა, პაზდანი, სკულასონი - ნაინგოლანი, რაკიტიჩი - ჯუჯაკი, ბეილი, აზარი - რონალდო. საუკეთესო ფეხბურთელი - რონალდო, მწვრთნელი - ლარს ლაგერბაკი.

ლაშა წიკლაური: ზომერი - კიმიხი, არნასონი, თოფალი, ევრა - ბრეიდი , იოზილი - პერიშიჩი, რემზი, ჯუჯაკი - რონალდო. საუკეთესო ფეხბურთელი - რონალდო. საუკეთესო მწვრთნელი - ლარს ლაგერბაკი.

გოტფრიდ ლენცი: ჰალდორსონი - კიმიხი, ჩორლუკა, ჰუმელსი, ვრსალიკო - ბადელი, რაკიტიჩი - ჯუჯაკი, რემზი, რონალდო - კალინიჩი. საუკეთესო ფეხბურთელი - რაკიტიჩი, საუკეთესო მწვრთნელი - ჩაჩიჩი.

- დაასახელეთ ევრო 2016-ის ჯგუფური ეტაპის სიმბოლური ნაკრები, საუკეთესო ფეხბურთელი და მწვრთნელი.
ნ. ნ: ჰალდორსონი - სრნა, პიკე, შერი, როდრიგესი - კროოსი, მოდრიჩი, ინიესტა, პაიე - ბეილი, მორატა. საუკეთესო ფეხბურთელი - გარეთ ბეილი. საუკეთესო მწვრთნელი - ბერნდ შტორკი.

ა. კ: ჰალდორსონი - უოკერი, ჰუმელსი, ბონუჩი, ოლსონი - მოდრიჩი, კანტე, ინიესტა, პაიე - რონალდო, ბეილი. საუკეთესო ფეხბურთელი - გარეთ ბეილი. საუკეთესო მწვრთნელი - ლარს ლაგერბაკი (ისლანდია).

გ. კ: ჰალდორსონი - უოკერი, პაზდანი, ბონუჩი, სკულასონი - მოდრიჩი, კანტე, აზარი, პაიე - ბეილი, მორატა. საუკეთესო ფეხბურთელი - დიმიტრი პაიე. საუკეთესო მწვრთნელი - ბერნდ შტორკი.

ლ. წ: ჰალდორსონი - სრნა, ჰუმელსი, პაზდანი, როდრიგესი - ინიესტა, კროოსი, მოდრიჩი - პაიე, პერიშიჩი, ბეილი. საუკეთესო ფეხბურთელი - გარეთ ბეილი. მწვრთნელი - ანტონიო კონტე.

გ. ლ: ჰალდორსონი - სრნა, ბონუჩი, ბოატენგი, როდრიგესი - მოდრიჩი, რაკიტიჩი - პაიე, ინიესტა, ბეილი - მორატა. საუკეთესო ფეხბურთელი - გარეთ ბეილი. საუკეთესო მწვრთნელი - ლარს ლაგერბაკი.

- დაასახელეთ ჯგუფური ეტაპის საუკეთესო მატჩი.
ნ. ნ: პორტუგალია-უნგრეთი. კარგი იყო ბელგია-შვედეთიც.
ა. კ: პორტუგალია-უნგრეთი.
გ. კ: პორტუგალია-უნგრეთი.
ლ. წ: ეს იყო ბელგია-იტალია.
გ. ლ: საუკეთესო იყო ესპანეთი-ხორვატიის დაპირისპირება.

- როგორ მოგწონთ ევრო 2016?
ნ. ნ: ევროპის ჩემპიონატი მომწონს. გოლების ნაკლებობა ორი მიზეზით აიხსნება: ერთი ობიექტურია - გაიზარდა გუნდების რაოდენობა და შედარებით ნაკლები კლასის გუნდები უფრო ყურადღებით თამაშობენ დაცვაში, მეორე მიზეზი კი ფორმატია. ჩემი აზრით, გუნდების რაოდენობა 32-მდე უნდა გაიზარდოს. როგორც ამ პირველობამ აჩვენა, ამით საერთო კლასი დიდად არ უნდა დაეცეს, სამაგიეროდ, აღარ იქნება ეს მახინჯი ფორმატი (მესამეადგილოსნებს ვგულისხმობ). პლუს, ჩვენი შანსიც მოიმატებს. პირველობაზე რამდენიმე ულამაზესი გოლი გავიდა.

ა. კ: ევროპის ჩემპიონატი მომწონს. ახალი ფორმატი (ანუ რაოდენობა) მეტ ფეხბურთს ნიშნავს, ისლანდიასა და უნგრეთს ნიშნავს, ჩვენს შანსს ნიშნავს. უშუალოდ ფორმატი კი არ მომწონს, მესამეადგილოსანთა გასვლის წესს ვგულისხმობ. არ მომწონს ისიც, რომ ბევრი გუნდი ზედმეტად პრაგმატულად უდგება საქმეს.

გ. კ: ევროპის ჩემპიონატს პლუსებიც აქვს და მინუსებიც, მთლიანად კი დადებითად შევაფასებდი. გუნდების რაოდენობის გაზრდასაც მივესალმები, მაგრამ ჯგუფიდან გასვლისა და დაწყვილების სისტემაზე სამუშაოა. პრაგმატული ფეხბურთის მნიშვნელობის ზრდა თანამედროვე ფეხბურთში ისედაც შეინიშნებოდა და ეს ახალი ფორმატის ბრალი ნაკლებადაა.

ლ. წ: მთლიანობაში, კარგი ჩემპიონატია, რომელმაც კიდევ ერთხელ დაგვანახა, რომ ფეხბურთის თამაში მართლა ყველამ ისწავლა და საერთო დონე საკმაოდ მაღალია. ფორმატი ოპტიმალურია, თუმცა, ჩემი აზრით, ჯგუფური ეტაპის შემდეგ წილისყრა უნდა ტარდებოდეს და სწორედ ასე იქმნებოდეს პლეი ოფის ბადე. ასეთ შემთხვევაში, ჯგუფში მოასპარეზე გუნდები ნაკლებად იფიქრებდნენ იმაზე, თუ ვინ ვის უნდა დაეჯახოს მერვედფინალში.

ცალკე სალაპარაკო თემაა ის ბრწყინვალე საფეხბურთო ატმოსფერო, რაც საფრანგეთში სუფევს - ტერორისტული საფრთხეების ფონზე, იყო ვარაუდი, რომ მატჩები ნახევრად ცარიელი ტრიბუნების ფონზე ჩატარდებოდა, მაგრამ რეალობა სხვაგვარი გამოდგა. სტადიონები სავსეა, ქვეყანაში კი დიდი საფეხბურთო ზეიმია. ჯერჯერობით, გულშემატკივრობაში ჩემპიონები ჩრდილოირლანდიელები და ირლანდიელები არიან.

გ. ლ: ევროპის ჩემპიონატს არაფერი დაეწუნება, გარდა იმისა, რომ ფინალის გზაზე ერთ მხარეს ისეთი გრანდები განლაგდნენ, როგორებიც გერმანია, საფრანგეთი, ესპანეთი, იტალია და ინგლისია, მეორე მხარეს კი - შედარებით სუსტები. კარგი იქნებოდა, ჯგუფური ეტაპის შემდეგ წილისყრა რომ ტარდებოდეს. ცუდია, რომ უკვე მერვედფინალში გველის ევროპის ჩემპიონატის ფინალის გამეორება. მთავარი აღმოჩენა, რა თქმა უნდა, ისლანდიის ნაკრებია.

- რას ველოდოთ პლეი ოფში, ვინ გახდება ტურნირის საუკეთესო ფეხბურთელი, ბომბარდირი?
ნ. ნ: საფრანგეთი, გერმანია და ესპანეთი ისევ სამი მთავარი ფავორიტია, მაგრამ ისე მოხდა, რომ სამივე ბადის ერთ მხარესაა, რაც ბადის მეორე მხარეს გუნდებს დიდებულ შანსს აძლევს. საუკეთესო ფეხბურთელი შეიძლება რონალდო გახდეს, თუ შეძლებს მერვედფინალში გაბრწყინებას. ბეილსაც აქვს შანსი, მაგრამ მისი ნაკრებიც შედარებით სუსტია. ამიტომ მთავარი კანდიდატები ისევ პაიე და ინიესტა მგონია. ბომბარდირი - რონალდო ან ბეილი.

ა. კ: ვფიქრობ, რომ მეოთხედფინალში შვეიცარია, უელსი, პორტუგალია, საფრანგეთი, გერმანია, ბელგია, ესპანეთი და ინგლისი გავლენ. მთავარი ფავორიტი საფრანგეთია, ხოლო საუკეთესო ფეხბურთელობის მთავარ კანდიდატად ფრანგების ლიდერი დიმიტრი პაიე მესახება. ბომბარდირის წინასწარმეტყველება ძალიან ძნელია.

გ. კ: თავს შევიკავებ.

ლ. წ: მერვედფინალში უკან დასახევი გზა არავის ექნება და შესაბამისად, უშეღავათო ბრძოლების მოწმენი გავხდებით. ყველაზე საინტერესო მატჩი იტალიას და ესპანეთს შორის შედგება, რადგან ერთმანეთს ორი საფეხბურთო ფილოსოფია დაუპირისპირდება. თუ არსებულ ტენდენციებს გავითვალისწინებთ, მაღალია სენსაციების ალბათობა და ბადეც ისეა გაწერილი, რომ ყველა ლოგიკით, მოულოდნელი ფინალი უნდა ვიხილოთ. ჯგუფური ეტაპის შემდეგ ფავორიტის სტატუსი შეინარჩუნეს გერმანიამ და საფრანგეთმა, აი, ესპანეთმა, ინგლისმა და ბელგიამ კი ცოტა დააბნიეს გულშემატკივრები. სამაგიეროდ, იტალიამ აიმაღლა იმიჯი და იქამდე ლამის აუტსაიდერად შერაცხული, ფავორიტებში გაერია. დადებითად შეფასდა ხორვატიის ნაკრების ასპასრეზობა, პორტუგალიამ კი გააწბილა გულშემატკივარი. დღეს, სწორედ ასეთი რეალობაა და რა იქნება ხვალ, ამას დრო გვიჩვენებს - მას შემდეგ, რაც "ლესტერი" გახდა ინგლისის ჩემპიონი, ვფიქრობ, ფეხბურთში პროგნოზების კეთება ფუჭი საქმე გახდა. ეს ეხებათ როგორც გუნდებს, ისე ფეხბურთელებს.

გ. ლ: ჯგუფურ ეტაპზე ნაჩვენები თამაშის მიხედვით, ფავორიტი ხორვატიაა. ამ გუნდმა, უბრალოდ, საუკეთესო ფეხბურთი აჩვენა. თუმცა არ გვინახავს გერმანიის ნაკრების რეალური ძალა და ზოგადად, პლეი ოფში ყველაფერი შეიძლება მოხდეს. ამ ეტაპზე საუკეთესოები ლუკა მოდრიჩი და გარეთ ბეილი არიან. ბომბარდირობის უკეთესი შანსი კი ლუკაკუსა და მორატას აქვთ. გააჩნია, როგორ ითამაშებენ მათი გუნდები.

მაშ ასე:



ჯგუფური ეტაპის სიმბოლური ნაკრები "ლელოს" ვერსიით ასეთია: ჰალდორსონი (ისლანდია, 5 მოხვედრა სიმბოლურში) - სრნა (3), ბონუჩი (იტალია, 3), ჰუმელსი (გერმანია, 2), როდრიგესი (შვეიცარია, 3) - მოდრიჩი (ხორვატია, 5), კროოსი (გერმანია, 2) ინიესტა (ესპანეთი, 4) - პაიე (საფრანგეთი, 5), მორატა (ესპანეთი, 3), ბეილი (უელსი, 5).
საუკეთესო ფეხბურთელი: გარეთ ბეილი (4)
საუკეთესო მწვრთნელი: ლარს ლაგერბაკი (ისლანდია, 2) და ბერნდ შტორკი (უნგრეთი, 2).

ყოველდღიური სპორტული გაზეთი "ლელო"