ევრო 2016-ის 8 აღმოჩენა: თომას მონიე, ნოლიტო, რაფაელ გერეირო და სხვები

დიდი ტურნირები ყოველთვის გვთავაზობენ ახალ აღმოჩენებს. არც საფრანგეთში გამართული ევროპის ჩემპიონატი იყო გამონაკლისი.

დღევანდელი ჩვენი წერილი სწორედ ევროპის ჩემპიონატის რვა აღმოჩენას ეხება.

რაფაელ გერეირო (პორტუგალია)
22 წლის
ევროპის ჩემპიონატის წინ: საფრანგეთის ჩემპიონატში მეთხუთმეტე ადგილი დაიკავა "ლორიანთან" ერთად.
ფეხბურთელმა, რომელიც ფაბიო კოენტრაოს ტრავმის გამო მოხვდა პორტუგალიის ნაკრების ძირითად შემადგენლობაში, ევროპის ჩემპიონატზე გაიბრწყინა. სწორედ მის ზუსტ და გამოზომილ გადაცემას მოჰყვა უელსთან კრიშტიანო რონალდოს გოლი, რომელმაც პორტუგალია ფინალში გაიყვანა. მასთან კონტრაქტი "დორტმუნდმა" გააფორმა.

ჰალ რობსონ -კანუ (უელსი)
27 წლის
ევროპის ჩემპიონატის წინ: სამი გოლი გაიტანა "რედინგში", ჩემპიონშიპში, სანამ კლუბს თავისუფალი აგენტის სტატუსით დატოვებდა.
საფრანგეთში ის ჩავიდა, როგორც ყველასათვის უცნობი ფეხბურთელი. ყველაფერი მას შემდეგ შეიცვალა, რაც ბელგიასთან მატჩში კრუიფის სტილში შემობრუნდა და ულამაზესი გოლი შეაგდო. მასვე ეკუთვნის სლოვაკეთის ნაკრებთან გატანილი ბურთი. რამდენიმე კლუბი ცდილობს ხელში მის ჩაგდებას.

ნოლიტო (ესპანეთი)
29 წლის
ევროპის ჩემპიონატის წინ: იყო ვიგოს სელტას შესანიშნავი კომპანიის ნაწილი.
ესპანეთის ნაკრების ძირითადი შემადგენლობის ფეხბურთელი იყო ამ ჩემპიონატზე. მარჯვენა ფლანგზე იდგა. განსაკუთრებით კარგად ითამაშა თურქეთის ნაკრებთან მოგებულ შეხვედრაში (3:0). "ბარსელონას" აღზრდილი კარიერას "მანჩესტერ სიტიში" გააგრძელებს.

მაიკლ მაკგოვერნი (ჩრდ.ირლანდია)
31 წლის
ევროპის ჩემპიონატის წინ: "ჰამილტონთან" ერთად ძლივს შეინარჩუნა ადგილი შოტლანდიური ფეხბურთის ელიტაში.
ფეხბურთელისათვის, რომელმაც მთელი კარიერა შოტლანდიაში გაატარა, განსაკუთრებით წარმატებული იყო გერმანიასთან შეხვედრა. 26 მცდელობიდან ბუნდესნაკრებმა მხოლოდ ერთხელ აიღო მაკგოვერნის კარი. მისმა დიდებულმა თამაშმა ჩრდილოეთ ირლანდია სხვა არაერთ შემთხვევაშიც იხსნა.

ჰანეს ჰალდორსონი (ისლანდია)
32 წლის
ევროპის ჩემპიონატის წინ: თამაშობდა ნორვეგიულ "ბოდო-გლიმტში".
მხოლოდ სამი წელია, რაც ყოფილმა რეჟისორმა ფეხბურთის თამაში პროფესიონალურ დონეზე დაიწყო. ამის მიოუხედავად, ევროპის ჩემპიონატზე ისეთი ვარსკკვლავები გაამწარა, როგორებიც არიან კრიშტიანო რონალდომ, დავიდ ალაბა, ჰარი კეინი და სხვები. ყველაზე დიდი წვლილი შეიტანა იმაში, რომ ისლანდიამ ისტორიულ მეოთხედფინალს უწია.

არლინდ აიეტი (ალბანეთი)
22 წლის
ევროპის ჩემპიონატის წინ: "ფროზინონესთან" ერთად დაქვეითდა იტალიის სერია A-დან.
ევროპის ჩემპიონატის პირველ მატჩში, შვეიცარიასთან, სათადარიგო იყო. საფრანგეთთან დიდებულად ითამაშა. ასევე შესანიშნავი იყო რუმინეთთან მატჩში. ახალი კლუბი უკვე იპოვა - იტალიურ "ტორინოს" შეუერთდა.

მიხალ პაზდანი (პოლონეთი)
28 წლის
ევროპის ჩემპიონატის წინ: ევროპის წინა ჩემპიონატზე სათადარიგო იყო, გასულ სეზონში კი პოლონური ლიგა მოიგო "ლეგიასთან" ერთად.
როცა პაზდანს პირველად უხმეს პოლონეთის ნაკრებში, კლუბის სასტუმროს კონსიერჟმა ეს არ დაიჯერა. ეს ცენტრალური მცველი ეროვნულ გმირობამდე აღზევდა მას შემდეგ, რაც პოლონეთმა რამდენიმე შესანიშნავი მატჩი ჩაატარა. მათ შორის - გერმანიასთან.

ტომას მონიე (ბელგია)
24 წლის
ევროპის ჩემპიონატის წინ: "ბრიუგესთან" ერთად მოიგო ბელგიის ჩემპიონატი.
ირლანდიასთან სწორედ მან დაატანინა აქსელ ვიტსელს თავური მოწინააღმდეგის კარში. მარჯვენა მცველმა შესანიშნავი თამაში განაგრძო შვედეთთან და უნგრეთთან. შემთხვევითი არ არის, რომ ის "პარი სენ-ჟერმენმა" შეიძინა.

ყოველდღიური სპორტული გაზეთი "ლელო"