"კლან 13"-ის კიდევ ერთი დიდი წარმატება მსოფლიო ასპარეზზე [VIDEO]

AutoSharing Option
AUTO PLAY
PUBG-ის თამაშით მსოფლიოში მილიონობით ადამიანი არის დაკავებული. ამ სათამაშო პროცესში ადამიანები როგორც მობილური ტელეფონებით, ისე კომპიუტერებით არიან ჩართულნი.

აღსანიშნავია, რომ, როგორც სპორტის სხვა სახეობებში, ამ თამაშშიც საკმაოდ ბევრი შეჯიბრება იმართება. ტურნირებში გუნდები სხვადასხვა კლანის სახელით არიან ჩართულნი.

სამწუხაროდ, ქართული გუნდები უმაღლესი დონის ტურნირებზე ხშირად ვერ მონაწილეობენ, თუმცა ერთ-ერთმა ქართულმა კოლექტივმა, სახელად "კლან 13", სახელი ევროპის მასშტაბით გაითქვა.

"კლან 13"-მა კიდევ ერთხელ მოახერხა საქართველოს საზღვრებს გარეთ სამშობლოს სახელის გატანა, ამჯერად PMCS-ის ტურნირზე. აქ მოსახვედრად კლანმა ორი საკვალიფიკაციო ეტაპი გადალახა, სადაც ორჯერ
მოუწია ტოპ 4-ში მოხვედრა.

26 ოქტომბერს "13-ებმა" PMCS-ის ტურნირზე მეორე ადგილი დაიკავეს და ევროპის ერთ-ერთი ტოპ-ჩემპიონატის ფინალში გავიდნენ, რაც უდიდესი მიღწევაა.

ქართული გუნდი ამ შეჯიბრების ფინალურ სტადიაზე 31 ოქტომბერსა და 1-ელ ნოემბერს იასპარეზებს.

ამ გამარჯვების შემდეგ Sportall.ge კლანის ლიდერ შოთა მექვაბიძეს დაუკავშირდა და მცირე ინტერვიუ ჩაწერა.

- 26 ოქტომბერს საკმაოდ დიდ წარმატებას მიაღწიეთ. რას მიიჩნევთ ამის განმაპირობებელ მიზეზად?
- 26-ში მოპოვებული წარმატების განმაპირობებელი მიზეზი თავდაუზოგავი ვარჯიში, მიზანზე ორიენტირებულობაა. წამით არ გვიფიქრია იმაზე, გავიდოდით თუ არა ტოპ 4-ში, რათა ფინალში გვეთამაშა. ჩვენი მიზანი ჯგუფიდან ტოპ 1 ადგილით იყო გასვლა.

- როგორ შეაფასებდით მოწინააღმდეგეებს? მათ შორის ორი ქართული გუნდი - onyx და 300 არაგველი - იყო?
- მოწინააღმდეგე გუნდები, რა თქმა უნდა, საკმაოდ ძლიერები იყვნენ, სუსტი გუნდი ამ ეტაპზე აღარ არსებობს. როცა ყველა ძლიერია, პრიორიტეტი სწორი თამაში და ნაკლები შეცდომა ხდება, რაც ჩვენმა გუნდმა საკმაოდ კარგად გააკეთა.

- იყო რაიმე დეტალი, რის შეცვლასაც შეეცდებით ფინალში?
- ფინალისთვის აუცილებელია სტაბილურობა, არ გვაქვს უფლება არც ერთი თამაშის ჩაგდების. პრიორიტეტიც სწორედ ესაა. ურთულესი ფინალი გველის წინ.

- ვინ გამოიჩინა თავი "კლან 13-იდან" ყველაზე მეტად?
- კლანიდან ჯგუფურ თამაშებში პირადად ჩემთვის თავი ოთომ გამოიჩინა (insaneTT ), ძალიან ბევრისთვის წარმოუდგენელი მომენტები დადო ამ დონის ტურნირზე, მაგრამ საბოლოო ჯამში, თითოეული მოთამაშის თამაში გამორჩეული და განსაკუთრებული იყო.

- რას ურჩევდით დამწყებ გუნდებს, რომლებსაც მაღალი მიზნებისთვის ბრძოლა უნდათ?
- დამწყებ გუნდებს წარმატებისთვის შრომას, ვარჯიშს და მიზანდასახულობას ვურჩევ. არასდროს დაკმაყოფილდეთ და არასდროს გქონდეთ მიზნად მინიმუმი, ყოველთვის პირველობა უნდა იყოს მიზანი და მოტივატორი.

- რა შეცვალეთ crew challeng-ის ტურნირის შემდეგ, რაც დაგეხმარათ ტურნირზე, რომლის ფინალურ სტადიაზეც გახვედით და საპატიო მე-7 ადგილიც დაიკავეთ?
- crew challeng-ში მიღწეული წარმატების შემდეგ ბევრჯერ მოგვიწია გუნდის და მოთამაშეების შეცვლა, სხვადასხვა მიზეზის გამო სტაბილური გუნდის შენარჩუნება ვერ ხერხდებოდა, რაც აისახა ჩვენ მიერ ჩაგდებულ პატარა ტურნირებზე, მაგრამ კიდევ ერთხელ ვიმეორებ, "კლანის" თითოეული წევრის შრომისა და მონდომების შედეგია ეს წარმატება, რასაც ამ ტურნირზე მივაღწიეთ.

- გეგმავთ თუ არა ცვლილებებს და თუ კი, რას?

- ცვლილებები ყოველთვის საჭიროა, რათა მოსაბეზრებელი არ გახდეს ერთფეროვანი სიტუაცია. ცვლილებები იგეგმება, როგორც თიმის, ასევე მთლიანად "კლანისთვის", რაც, იმედი მაქვს, უფრო მეტ წარმატებას მოგვიტანს.

- რა არის თქვენი პროგრამა-მინიმუმი PMCS-ის ტურნირზე?

- პროგრამა-მინიმუმი და ჩვენი მიზანი ამ ტურნირზე არის მხოლოდ და მხოლოდ ტოპ 1! საპრიზო ადგილი ტოპ 7 გუნდს შორისაა, მაგრამ ჩვენი მთავარი მიზანი მხოლოდ და მხოლოდ ტოპ 1-ია.

- შეაფასეთ ქართული გუნდები, როგორც კიბერსპორტსმენები...

- ქართული გუნდები დღითი დღე ვითარდებიან. მსოფლიოს მასშტაბით უფრო და უფრო მეტ წარმატებას აღწევენ. თითოეურ ქართულ კლანს აქვს წარმატების შანსი. მთავარი შრომა და მონდომებაა. რამდენიმე თვის წინ ბევრი ვერ წარმოიდგენდა, გასართობად თამაში და საქართველოს შიდა ტურნირებზე ერთმანეთთან შეჯიბრება საზღვრებს გარეთ ჩვენი სახელის გატანით და ჩვენი გამარჯვებებით თუ გაგრძელდებოდა, მაგრამ ფაქტია, ქართულ გუნდებს ეს შეგვიძლია.

altCLAN 13 - ევროპის პრიზიორები საქართველოდან

მკითხველის კომენტარები / 1 /
ჩემი აზრით კლან 13 საუკეთესოა საქართველოში და არამარტო მათ უდიდესი პოტენციალი აქვთ და რაც ყველაზეთავარია ასეთი შეკრული გუნდი იშვიათია წარმატებას და თქვენი იდეების განხორციელებას გისურვებთ ბიჭებო თქვენ ნამდვილად დაამტკიცეთ რომ საუკეთესოები ხართ მე მხოლოდ თქვენი ბალენშიკი ვარ
შალვა ბრეგვაძე
15:08 29-10-2020
0

სიახლეები პოპულარული