რამაზ სვანაძე - 21-წლამდელთა ნაკრების მთავარ მწვრთნელთან ახალი კონტრაქტი გაფორმდა

საქართველოს 21-წლამდელთა ნაკრების მთავარ მწვრთნელს, რამაზ სვანაძეს, და საქართველოს ფეხბურთის ფედერაციას შორის ახალი ხელშეკრულება გაფორმდა. მიმდინარე კონტრაქტი 42 წლის სპეციალისტთან ერთი წლით გაგრძელდა, რომელიც კიდევ ერთი წლით გახანგრძლივების შესაძლებლობას ითვალისწინებს.

რამაზ სვანაძე 21-წლამდელთა ნაკრების მთავარ მწვრთნელად 2021 წლის თებერვლიდან მუშაობს. მას შემდეგ, მისი ხელმძღვანელობით, ახალგაზრდულმა ნაკრებმა 20 მატჩი ჩაატარა, საიდანაც 10 მოიგო, 4-ჯერ დამარცხდა და 6 მატჩი ფრედ დასრულდა.

ამ პერიოდში 21-წლამდელთა ნაკრების ყველაზე დასამახსოვრებელი მატჩები ევროპის ჩემპიონატის ფინალურ ეტაპს უკავშირდება, სადაც რამაზ სვანაძის გუნდმა ჯგუფში პორტუგალიას, ბელგიას და ნიდერლანდებს აჯობა და პირველი ადგილი დაიკავა. "დინამო არენაზე" გამართულ მეოთხედფინალში კი გუნდი ტურნირს ისრაელთან პენალტების სერიაში მარცხით გამოეთიშა.

რამაზ სვანაძე ეროვნული გუნდების სტრუქტურაში 2018 წლიდან მუშაობს, ჯერ 18 წლამდე, შემდეგ კი 19 წლამდე ასაკობრივ გუნდებს ხელმძღვანელობდა. ამ პერიოდში 19-წლამდელებმა საკვალიფიკაციო რაუნდის ჯგუფური ეტაპი წარმატებით, პირველი ადგილით დაძლიეს, ხოლო 2020 წელს გასამართი ელიტ რაუნდი პანდემიის გამო აღარ ჩატარდა.

ალექსანდრე იაშვილი: “ძალიან მიხარია, რომ რამაზ სვანაძემ თავის სამწვრთნელო შტაბთან ერთად მიმდინარე ციკლის ბოლომდე გააგრძელა ხელშეკრულება. ჩვენ ისე მოვდივართ და ისეთი ურთიერთობა გვაქვს, ხელს რომ ჩამოვართმევთ, ვიცით, რომ ერთმანეთს ვენდობით, გვსიამოვნებს ერთად მუშაობა და ამიტომ ვადას არ აქვს აქ მნიშვნელობა. რამაზისთვისაც და ჩვენთვისაც, მთავარი ის არის, რომ ვემსახუროთ ჩვენს ქვეყანას და ეროვნულ გუნდებს.