ორივეგან 2:1: "ტორპედომ" და "თელავმა" მოიგეს

კრისტალბეთ ეროვნულ ლიგაში მე-16 ტურის ორი მატჩი გაიმართა და ორივე 2:1 დასრულდა. ორივეში მასპინძლებმა მოიგეს. "თელავმა" "სამგურალთან", ხოლო "ტორპედომ" - "გაგრასთან"...

თელავი 2:1 სამგურალი

თელაველებმა 7-მატჩიანი მოუგებელი სერია შეწყვიტეს. 2:1 მოუგეს "სამგურალს" და ქულებით გაუთანაბრდნენ.

პირველი ტაიმის ოთხწუთიან მონაკვეთში ჯერ თორნიკე მორჩილაძემ გაიტანა ჯეფერსონ ჯერალდოს ეფექტური გარღვევისა და პასის შემდეგ.

მეორე გოლი კი გუნდის კაპიტანმა დაჩი ცნობილაძემ მიითვალა თავურით. "სამგურალმა" 78-ე წუთზე დაძაბა მატჩი, კერძოდ, ნიკა კალანდარიშვილმა საჯარიმოს მისადგომებიდან ძლიერი დარტყმით გაიტანა - 2:1. წყალტუბოელებს სამმატჩიანი წაუგებელი სერია გაუცუდდათ.

ტორპედო 2:1 გაგრა

ქუთაისის "ტორპედომ" ზედიზედ მესამედ მოიგო, ხოლო წაუგებელი თამაშების სერია 11-მდე აიყვანა.

არადა, "გაგრამ" პირველივე წუთზე გაიტანა: 29-ე წამზე! კვლავ მათე ვაწაძე. მან წინა შეხვედრაში მაკრატელათი ულამაზესი გოლი მიითვალა, ამჯერად კი ქუთაისშიც მოახერხა თავის გამოჩენა. ვაწაძემ ელიტონ ჟუნიორის პასი ჩაჭრა, ნიკა სანდოხაძეს გასცდა და ზუსტადაც დაარტყა - 0:1.

"ტორპედოს" არაერთი მომენტი ჰქონდა და 86-ე წუთზე გაათანაბრა. ნიკოლა ნინკოვიჩის პასის მერე ფელიპე პირესმა ძლიერი დარტყმით გაათანაბრა, ხოლო მსაჯის მიერ დამატებულ დროში გამარჯვების გოლი გაიტანა მიმდინარე კრისტალბეთ ეროვნული ლიგის საუკეთესო ბომბარდირმა ბიორნ იონსენმა. კუთხურის მერე თავით და 2:1. იონსენს 9 გოლი მოუგროვდა.