მარაკანას ჯადოსნობები
"მარაკანაზე" მატჩის დაწყებამდე საათნახევრით ადრე მივედით. თამაშის წინა დღეს ბელგრადში წინასამატჩო აჟიოტაჟი თითქოს არ იგრძნობოდა, მაგრამ გუშინ სიტუაცია ძირფესვიანად შეიცვალა.თითქოს, ნახევარი ბელგრადი მოწყდა და თავისიანების საქომაგოდ ზვავით წამოვიდა. ცხადი იყო, მასპინძლები დიდი ზეიმისთვის ემზადებოდნენ. სერბეთის ნაკრების მწვრთნელმა სლავოლიუბ მუსლინმა ძირითად შემადგენლობასთან დაკავშირებით რამდენიმე სიურპრიზი მოგვიმზადა. თვით სერბი ჟურნალისტებიც ნაკლებად ელოდნენ სასტარტო თერთმეტეულში დუშკო ტოშიჩისა და ნემანია გუდელის გამოჩენას. მუსლინმა ძირითადში გაამწესა ადემ ლიაიჩი - ერთ დროს ევროპის გამორჩეულ ტალანტს საქართველოს ნაკრების კართან კრეატიული თამაშით უნდა გაემწვავებინა სიტუაცია...
ვლადიმირ ვაისმა სიტყვა შეასრულა და უელსთან მატჩის შემდეგ ძირითად შემადგენლობაში კორექტივები შეიტანა. შანსი მიეცათ გიორგი მაკარიძეს, დავით ხოჭოლავას, გიორგი აბურჯანიასა და ჯაბა ჯიღაურს.
შემადგენლობისთვის თვალის ერთი გადავლებაც კი საკმარისია იმის სათქმელად, რომ მართლაც მრისხანე მეტოქის წინააღმდეგ ვაისმა საკმაოდ შემტევი შემადგენლობა აირჩია. ეს ალბათ იმადაც, რომ საქართველოს ნაკრებს თითქმის ყოველგვარი წნეხის გარეშე უნდა ეთამაშა...
შეხვედრის დაწყებამდე თითქმის ბოლომდე გადაჭედილმა "მარაკანამ" ერთხმად დასჭექა. მართლაც დიდებული მოსასმენია სერბი ქომაგების ხმაშეწყობილი სიმღერა და ისიც, თუ როგორ ასრულებენ ისინი ერთხმად ეროვნულ მელოდიებს...
თამამად ვიტყვი: მსოფლიოს არაერთ სტადიონზე ვყოფილვარ, მაგრამ ასეთი ქომაგობა არსად მინახავს. ახლა უკვე ზუსტად შეიძლება იმის თქმა, რატომ არის გულშემატკივარი სერბეთის ნაკრების მე-12 მოთამაშე...
ერთადერთი, რაშიც უნდა გავკიცხოთ ჩვენი მეტოქის ქომაგები, ის არის, რომ სტვენაში ჩაახშვეს ადგილობრივი დიქტორის ხმა, რომელმაც საქართველოს ნაკრების ფეხბურთელების გვარ-სახელები გამოაცხადა. სხვა მხრივ, ეს მართლაც დიდებული სანახაობა იყო, რომელიც კაცმა უთუოდ უნდა იხილო, თუ ამის შანსი და საშუალება გაქვს...
სამაგიეროდ, სერბმა ქომაგმა ტაში დაუკრა საქართველოს სახელმწიფო ჰიმნს, სერბეთის ჰიმნი კი მთელმა სტადიონმა ერთხმად იმღერა. კიდევ ერთი ბონუსი სერბებს - განსაკუთრებული ქომაგობისთვის.
ახლა ზუსტად ვიცი, რატომ იწყებოდა ძალიან ხშირად სერბთათვის მთავარი ამბები ამ სტადიონზე და, არცთუ იშვიათად, ეს არ იყო მხოლოდ საფეხბურთო წიაღსვლები...
მატჩი
სერბეთის ნაკრებმა თამაში აქტიურად დაიწყო და "რომას" მცველმა ალექსანდრ კოლაროვმა შორეული დარტყმით შეამოწმა გიორგი მაკარიძის საიმედოობა - საქართველოს ნაკრების მეკარე აუღელვებლად დაუხვდა "შორეულ მოსაკითხს".სასტარტო მღელვარებამ რომ გადაიარა, საქართველოს ნაკრებმა ბურთის დაჭერა შეძლო. დაახლოებით მეათე წუთისთვის მთელმა სტადიონმა ერთხმად დასჭექა, რომ კოსოვო სერბეთია...
მე-14 წუთზე სერბების კარისკენ პირველად გავიხედეთ. ვაკო გვილიამ შორიდან დაარტყა, მაგრამ არაზუსტად. ზოგადად, პირველი 15 წუთი ჩვენმა გუნდმა ტაქტიკურად ძალიან სწორად ითამაშა. მალევე ისევ გვილია მოექცა მოვლენების ეპიცენტრში, როცა მისი დარტყმული მეკარე ვლადიმირ სტოიკოვიჩმა უკუაგდო.
მე-5 წუთზე დაცვაში შეგვეშალა, მაგრამ ლიაიჩმა ფეხზე ვერ შეიმაგრა ბურთი. არადა, ეს რომ ექნა, გვარიან ხიფათს ვერ ავცდებოდით.
33-ე წუთზე ლიაიჩმა ძალიან სახიფათოდ შეასრულა ჯარიმა. ბურთი ზემოდან გადასცდა მაკარიძის კარს. საქართველოს ნაკრების პასუხმა არ დააყოვნა. ჯაბა ჯიღაურის დარტყმა და სტოიკოვიჩი საიმედოა. 36-ე წუთზე მშვენიერი საგოლე შანსი გვქონდა, თუმცა გიორგი ქვილითაიამ სვლაზე ვერ წაიღო ბურთი.
...და გიორგი მაკარიძე! საქართველოს ნაკრების მეკარემ "ფეხი დატოვა" და დუშან ტადიჩის უაღრესად სახიფათო დარტყმა მოიგერია.
ტაიმი სერბთა მომენტით დასრულდა. შეტევაში ჩართული ნიკოლა მაქსიმოვიჩის თავური არაზუსტია. სერბები თავიანთ ნაკრებს გასახდელში გამაყრუებელი სტვენით აცილებენ...
ფაქტია, რომ პირველ ტაიმში მუსლინის გეგმამ არ იმუშავა. საქართველოს ნაკრებმა კი დიდი კონცენტრაციითა და თავდადებით ითამაშა. რაც მთავარია, არ იყო ბავშვური შეცდომები...
მეორე ტაიმი მასპინძელთა სახიფათო შეტევით გაიხსნა. გუდელის დარტყმას სიზუსტე დააკლდა. იქვე, მაკარიძემ ითამაშა საიმედოდ. გამოჩნდა, რომ მუსლინმა შეგირდებს გაცილებით მკაცრი პრესინგი დაავალა, ვიდრე ეს იყო პირველ ნახევარში.
55-ე წუთზე მაკარიძემ ერთხელაც გადაგვარჩინა, როცა ალექსანდრ მიტროვიჩის თავური მოიგერია. სერბთა წნეხი აშკარად გაიზარდა. ვნახეთ საქართველოს ნაკრების ერთი კარგი შეტევა და მასპინძელთა მოძალებები, თუმცა ქართველი მცველები ძალიან დამაჯერებლად თამაშობდნენ.
70-ე წუთზე კიდევ ერთხელ გადავრჩით. დაახლოებით 12 მეტრიდან ნემანია მატიჩის მიერ დარტყმული ბურთი ძელთან მდგომმა ჯაბა კანკავამ ცარიელი კარიდან გამოიტანა. 73-ე წუთზე ქართველ მცველებს მიტროვიჩმა დაასწრო, მაგრამ უშედეგოდ.
74-ე წუთზე მაინც გავუშვით გოლი. თანაც ბურთი უწყინარ სიტუაციაში დავკარგეთ. სწრაფი კონტრშეტევა და მიტროვიჩის პასით შორეულ ძელთან გახსნილმა მისმა სეხნია პრიოვიჩმა ოსტატურად შეაგდო. კლასიკურ კონტრშეტევაზე დაგვიჭირეს, რომელიც შემტევი გუნდის შეცდომას მოჰყვება ხოლმე...
...და ქართველთა დიდებული შანსიც - ვაკო ყაზაიშვილი უაღრესად ხელსაყრელი სიტუაციიდან შემობრუნებით ურტყამს, თუმცა უშედეგოდ.
ვაისმა შეცვლებით სცადა სიტუაციის გამწვავება, მაგრამ ამ საქმიდანაც არაფერი გამოვიდა.
წავაგეთ მატჩი, რომელიც ჩვენი ლიდერების, თორნიკე ოქრიაშვილის, ჯანო ანანიძისა და ლევან მჭედლიძის ყოფნის პირობებში, შეიძლებოდა, არც წაგვეგო...
...ის, რაც მატჩის დასრულების შემდეგ "მარაკანაზე" მოხდა, ძალიან რთულად აღსაწერია. დაიწყო ნამდვილი ზეიმი და იმწამსვე ვიხილეთ ფოიერვერკების ზღვა. სერბებს მართლა გვარიანად სცოდნიათ წარმატების აღნიშვნა.
ისღა დაგვრჩენია, დაველოდოთ, რას იზამს მუნდიალზე სერბეთის საკმაოდ სიმპათიური ნაკრები. ფაქტია, ქართველებმა მაგრად ითამაშეს მასპინძელთა ნერვებზე, თუმცა ეს სანუგეშოდ არ კმარა...
მატჩის შემდეგ
ვლადიმირ ვაისი: თუ გოლი არ გაიტანე, თამაშს ვერ მოიგებ
სლავოლიუბ მუსლინი: საქართველომ უკეთ ითამაშა, ვიდრე ჩვენ
მუნდიალი 2018. საკვალიფიკაციო ეტაპი. ევროპა. D ჯგუფი. X ტური
10.09. ბელგრადი. რაიკო მიტიჩი. 52 000 მაყურებელი
სერბეთი-საქართველო 1:0
გოლი: 1:0 პრიოვიჩი (73)
სერბეთი (4-3-3): სტოიკოვიჩი - ივანოვიჩი, ნიკ. მაქსიმოვიჩი, დ. ტოშიჩი - მატიჩი, გუდელი, კოლაროვი - ლიაიჩი (60. პრიოვიჩი), მიტროვიჩი (76. მილივოიევიჩი), ტადიჩი (89. კოსტიჩი).
სათადარიგოები: იოვანოვიჩი, რაიკოვიჩი, ობრადოვიჩი, ნასტასიჩი, ნემ. მაქსიმოვიჩი, გაჩინოვიჩი, მილუნოვიჩი, ველიკოვიჩი
მწვრთნელი: სლავოლიუბ მუსლინი
საქართველო (4-1-2-2-1): მაკარიძე - კაკაბაძე, კაშია, ხოჭოლავა, ნავალოვსკი - კანკავა - გვილია, აბურჯანია (82. დვალიშვილი) - ყაზაიშვილი, ჯიღაური (86. ჰუფნაგელი) - ქვილითაია (77. მერებაშვილი).
სათადარიგოები: ლორია, კვასხვაძე, ლობჟანიძე, კვირკველია, კვეკვესკირი, ჭანტურია, დვალი, შერგელაშვილი, სხირტლაძე
მწვრთნელი: ვლადიმირ ვაისი
გაფრთხილება: ქვილითაია (20), მატიჩი (43), ნიკ. მაქსიმოვიჩი (70), პრიოვიჩი (75), გვილია (86)
არბიტრი: პაველ გილი (პოლონეთი).
სხვა მატჩები
უელსი-ირლანდია 0:1
გოლი: 0:1 მაკკლინი (57)
უელსი (4-1-4-1): ჰენესი - განტერი, ე. უილიამსი, ჩესტერი, დევისი - ალენი (37. ჯ. უილიამსი) - კინგი (65. ვუდბერნი), რემზი, ლოურენსი, ლედლი - რობსონ-კანუ (71. ვოუკსი).
ირლანდია (4-4-2): რენდოლფი - კრისტი, დაფი, კლარკი, უარდი - არტერი (78. უელანი), ბრეიდი, მეილერი, ჰენდრიკი - მაკკლინი, მერფი (90+2. ლონგი).
იხილეთ ვიდეო
მოლდოვა-ავსტრია 0:1
გოლი: 0:1 შაუბი (69)
მოლდოვა (4-2-3-1): ჩებანუ - ბორდიანი, ბოლოჰანი (86. პაირელი), ეპურეანუ, როზგონიუკი - იონიცა, ანტონი - პლატიცა (80. ამბროსი), კოციუკი, ივანოვი (70. კოჟოკარი) - გინსარი.
ავსტრია (4-2-3-1): ლინდნერი - ბაუერი, ლინჰარტი, დანსო, ვობერი - გრილიტჩი, ბაუმგარტლინგერი - შაუბი, კაინცი (59. ლაზარო), არნაუტოვიჩი (81. შიობესბერგერი) - ბურგშტალერი (45+2. იანკო).
გაძევება: იონიცა (55. მოლდოვა)
იხილეთ ვიდეო
(იბეჭდება მცირე ცვლილებით)
ყოველდღიური სპორტული გაზეთი "ლელო"
მაგრამ.... არ გვაქვს და გოლიც ვერ გავიტანეთ.
ჩვენს გუნდს ფიზიკური მომზადება აკლია. რაღაც ვერ დავინახე ვერც ერთი ძლიერად დარტყმული ბურთი. ვერც შორი პასები. ალბათ არა აქვთ მაგის ძალა.
არაა კომბინაციები, არ იხსნებიან მოძრაობაში ბურთის მისაღებად.
არ ვიცი, არ ვიცი. მწვრთნელი რას ასწავლის და რისთვის არის საჭირო.
დასკვნა: მწვრთნელმა იმუშავა მაღალ პროფესიონალურ დომეზე და მუშაობა უნდა გააგრძელოს. მისი პროფესიონალიზამი ემოციების ფონზე არ უნდა შევაფასოთ
ბოლო ორ თამაშში შეტევა საერთოდ იყო 0%,
პანიკური თამაში იყო მეტი არაფერი,
ცვლილებები დაგვიანებული და არასწორი, ჭანტურიას ატომ არ ენდობა საინტერესოა,
ვაისი არ არის ქართული ფეხბურთის სტილის მწვრთნელი