12 ოქტომბერს, ევროპის ჩემპიონატის შესარჩევ ეტაპზე საქართველოს ფეხბურთელთა ნაკრები ირლანდიას დაუპირისპირდება - გუნდს, რომელიც ვერასდროს ვერ დავამარცხეთ და ბოლო წლებია საკვალიფიკაციო ეტაპებზე საქართველოს ნაკრები ბონუსად ერგება.
ევრო 2020-ის შესარჩევი ეტაპის ჯგუფში ირლანდია 11 ქულით პირველ ადგილზეა. ხოლო თუ თბილისში კიდევ აიღეს სამი ქულა, ამით ლიდერობას განიმტკიცებენ.
რადგან "მწვანე არმიას" ყველაზე რთული თამაშები შვეიცარიასთან და დანიასთან ელის, საქართველოსთან შეხვედრა მათთვის ორმაგად მნიშვნელოვანია, რადგან ქულების დაკარგვის შემთხვევაში ევროპის ჩემპიონატის მიღმაც კი შეიძლება დარჩნენ.
ქართველები კი, თუ ევროპის ჩემპიონატზე პირდაპირი წესით ვერ გავდივართ,
ხშირად მეტოქეს ვუფუჭებთ შანსს. აი, მაგალითზე შოტლანდიის ნაკრების გახსენება შეგვიძლია.
ამ სტატიაში ვეცდებით, მიმოვიხილოთ ირლანდიის ნაკრების თამაში და მოვძებნოთ წარმატების გასაღები.
შეგვიძლია თუ არა ირლანდიის დამარცხება?
"მწვანე ბიჭები" რვა შეხვედრაა, არ დამარცხებულან. ბოლოს ერთა ლიგაზე შინ უელსთან 0:1 წააგეს. თუმცა საინტერესოა, როდის დამარცხდნენ ისეთ გუნდთან, რომელიც ჩვენსა და ირლანდიის ნაკრებს შორის სხვაობას უფრო უკეთესად ასახავს.
ეს იყო 13 წლის წინ, 2006 წელს. მათ ევროპის ჩემპიონატის შესარჩევში დათმეს, კვიპროსთან 2:5 წააგეს. რაც შეეხება არაოფიციალურ შეხვედრებს, 2016 წელს შინ 1:2 დამარცხდნენ ბელორუსთან. სხვა შემთხვევაში ირლანდიელებს მარცხი აქვთ ან მათი დონის გუნდთან, ან უფრო ძლიერთან.
ჩვენს ჯგუფში 5 შეხვედრა ჩაატარეს, 3 მოიგეს დ 2 ფრედ ითამაშეს. მათი სტატისტიკა ასეთია:
- 6 გოლი
- 66 დარტყმა კარის მიმართულებით
- 35 კუთხური
- პასების სიზუსტე 77%
- ბურთის ფლობა 53%
- "სეივები" 10
- 57 ჯარიმა, 5 ყვითელი ბარათი
ირლანდიელებს მკაცრად დისციპლინირებული გუნდი ჰყავთ, რომლის თამაში მთლიანად ეყრდნობა შედგენილ სქემას და შედეგზეა ორიენტირებული. მათ არ სჩვევიათ გადახვევა, მაგალითად, შეხვედრების უმრავლესობას იგებენ 1-ბურთიანი სხვაობით, ხოლო თუ მათი დონის გუნდს ეთამაშებიან, ფრის შემთხვევაში არ ცდილობენ შეხვედრის კიდევ უფრო გამწვავებას და აქცენტს აკეთებენ შედეგის შენარჩუნებაზე.
აი, თუნდაც შვეიცარიასთან შინ და დანიასთან გასვლითი შეხვედრა ავიღოთ, ირლანდიელებმა მეტოქეს ბურთი დაუთმეს და მთელი აქცენტი თავისუფალი ზონების ამოვსებაზე გააკეთეს. ისინი ზედმეტ რისკზეც არ მიდიოდნენ, მათ სტილში არ იყო მრავალფეროვანი შეტევები. იყვნენ 100%-იანი შანსის მოლოდინში ან ერჩივნათ მათი ფიზიკური მონაცემების ხარჯზე, უბრალოდ, მეტოქე კარებთან არ მიეშვათ.
ორივე შეხვედრაში მატჩის დასრულებამდე დაახლოებით 15 წუთით ადრე გაუშვეს გოლი და შემდეგ დაიწყეს აქცენტის გაკეთება შეტევაზე. ორივე შემთხვევაში გოლი 10 წუთში გაიტანეს, შემდეგ კი თამაში საწყის ტემპში გააგრძელეს.
აღსანიშნავია ისიც, რომ ირლანდიას გოლების 75%-ზე მეტი შეხვედრის მეორე ტაიმში გააქვს. ეს განმაპირობებელია იმით, რომ მათ ძალიან კარგი ფიზიკური მომზადება აქვთ. მათი ფიზიკური მომზადება 10 ქულიდან შეგვიძლია 9-ით შევაფასოთ, მეორე ტაიმში კი შედარებით უფრო დაღლილი მეტოქისთვის გოლი უფრო მარტივად გააქვთ.
თუ საქართველოს ნაკრებისა და ირლანდიელთა ურთიერთშეხვედრებს გადავხედავთ, 10 შეხვედრაში 18 გოლიდან 11 გოლი მეორე ტაიმში გაგვიტანეს.
აი, ბოლო მატჩში, როდესაც დუბლინში დავმარცხდით, მეტოქემ პირველ ტაიმში სტანდარტული დარტყმით გოლი გაგვიტანა. ამის მიზეზი ისიც იყო, რომ ჩვენი კედელი ცოტა უფრო წინ რომ მდგარიყო, ასე კარგად ჰარიჰეინი ვერ დაარტყამდა. რა გააკეთა ირლანდიამ შემდეგ? გააგრძელა შეტევების განხორციელება? არა, მათ ეს ანგარიში აკმაყოფილებდათ და ბურთი დაგვითმეს...
მეორე ტაიმის განმავლობაში საქართველოს ნაკრებს ბურთის ფლობა 57% ჰქონდა, მეტოქეს ჩვენი კარების მიმართულებით ზუსტად არც კი დაურტყამს და ეს არ გამომდინარეობდა ჩვენი გუნდის კარგი თამაშით. ეს ირლანდიელების ზოგადი ტაქტიკაა, გაიტანე ერთი და იმყოფინე. მათ გუნდს კი შეეძლო ფიზიკურად ჩვენი გაძლება, მით უმეტეს, იმ ფონზე, რომ მეორე ტაიმის მეორე ნახევარში ქართველ ფეხბურთელთა ნაწილს დაღლა დაეტყო და ირლანდიელებმა თავიც აღარ აიტკიეს.
ევერტონი, ბარნლი, ვულვზი, სტოკ სიტი, ბორნმუთი და ა.შ. VS ანორთოსისი, ტობოლი, სან ხოსე, შტურმი, გენტი და ა.შ.
ირლანდიის ნაკრების ფეხბურთელები რომ ინგლისის ჩემპიონატებში არიან დანაწილებულნი, ეს ამ ფეხბურთელების დამსახურება არ არის. ეს გეოგრაფიულმა მდებარეობამ განაპირობა. მათ პატარაობიდანვე კარგი კლუბების აკადემიებში აღზრდა მოუწიათ. ამავდროულად, ირლანდია დიდი ბრიტანეთთან ახლოსაა და მათთვის მარტივია პრემიერლიგაში თამაში.არადა, სამწუხარო რეალობა გვაქვს ქართველი ფეხბურთელების დიდი ნაწილისთვის. არათუ ინგლისის პრემიერლიგა, არამედ ინგლისის ჩემპიონშიპიც კი სანატრელია. მსოფლიო ფეხბურთის ერთ-ერთ წამყვან ფლაგმან ქვეყანასთან კი დიდი მანძილი და ბევრი სატრანსფერო სირთულე გვაშორებს.
ამ დროს კი ორი არჩევანი გვაქვს, რუსეთის პრემიერლიგაში თამაში ან ევროპის საშუალო დონის ჩემპიონატის ნაკლებად ძლიერ გუნდში ყოფნა. თუმცა არიან ფეხბურთელები, რომლებიც ინგლისის პრემიერლიგაზე უარს ამბობენ და რუსეთში თამაში ურჩევნიათ.
მაგრამ ირლანდიის ნაკრებში არ არიან ვარსკვლავები. რობი კინის შემდეგ მათ მსგავსი დონის გამორჩეული ფეხბურთელები არ ჰყავთ. ეს არის ერთფეროვანი გუნდი, რომელიც "კერკეტი კაკალია" და მისი გატეხვა ჩვენი დონის ნაკრებისთვის უფრო რთულია, ვიდრე ბევრად ძლიერი ესპანეთისა, რომელსაც პირინეის ნახევარკუნძულზე ვძლიეთ.
ჩვენი ნაკრების ფიზიკურ მომზადებას 10 ქულიდან წაქცეულ 6-იანად თუ შევაფასებთ. ნაკრების მცირე ნაწილს არათუ 90 წუთი, არამედ 60 წუთი თამაშიც არ შეუძლია, რადგან კლუბში სათამაშო დრო არა აქვთ და ცუდ ფორმაში იმყოფებიან.
რის ფონზე შეგვიძლია დავამარცხოთ ირლანდიელები? პირველ რიგში, ვლადიმირ ვაისისგან უფრო ეფექტური ტაქტიკა გვჭირდება, ვიდრე დანიასთან გვქონდა. მეტი შესაძლებლობები უნდა მიეცეთ ინდივიდუალისტ ფეხბურთელებს, რადგან მეტოქე მოსალოდნელ ქმედებებს ადვილად ხვდება და ბურთის ფლობა ჩვენთვის შვება არ იქნება.
გახსოვთ, ალბათ, 2014 წელს თორნიკე ოქრიაშვილის გოლი. მეტი ასეთი მოქმედება გვჭირდება და არა ფლანგიდან საჯარიმოში ბურთის ჩაგდებები. მით უმეტეს, იმ ფონზე, რომ გიორგი ქვილითაიას კლუბში სათამაშო დრო არა აქვს და ელგუჯა ლობჟანიძეს ირლანდიელ მცველებთან სათამაშო კლასი რამდენად ეყოფა, ჯერ კიდევ საკითხავია.
ამავდროულად, სასურველია ძირითადში ითამაშონ იმ ფეხბურთელებმა, რომლებიც კარგ ფიზიკურ მდგომარეობაში არიან. დავით ხოჭოლავა, საბა კვირკველია, გიორგი აბურჯანია და გიორგი ქვილითაია - ეს ის ფეხბურთელებია, რომლებიც ჯობია სათადარიგოზე იყვნენ. ჯანო ანანიძეს "სპარტაკში" ბოლო შეხვედრაში მიეცა სათამაშო დრო და სულ თუ არაფერი, ერთ ტაიმს მაინც ითამაშებს, რადგან მის მოედნის ხედვასა და გადაცემებს დიდი როლი ექნება.
თუმცა ნავსის გატეხვა მაინც რთული იქნება, მაგრამ ფეხბურთი ისეთი სპორტია, სადაც ყველაფერი ხდება. ამჯერად კი გვინდა, რომ მეთერთმეტე მცდელობაზე მაინც შევძლოთ ირლანდიის ძლევა...
[ტესტი] დაწყევლილი ირლანდია - რა იცი საქართველოს უხერხული მეტოქის შესახებ?
"ვფიქრობ, დადგა დრო, რომ ირლანდიის წინააღმდეგ წარმატებით ვითამაშოთ და გულშემატკივარი გავახაროთ"
კონორ ჰურიჰანი: შევეცდები, საქართველოს ისევ გავუტანო - თბილისში თამაში არასოდეს არაა ადვილი [VIDEO]
საქართველოს ნაკრებს 7 ფეხბურთელი დაემატა - კაშია და ყაზაიშვილი 9 ოქტომბერს შეუერთდებიან
!["უოტფორდის" გულშემატკივრებმა ჩაკვეტაძეს საქართველოს ნაკრების ევროპის ჩემპიონატზე გასვლა მიულოცეს [VIDEO]](/pictures/image7/66ff647a5fc728e56ac248b53cafb697.png "\"უოტფორდის\" გულშემატკივრებმა ჩაკვეტაძეს საქართველოს ნაკრების ევროპის ჩემპიონატზე გასვლა მიულოცეს [VIDEO]")
