შვეიცარიის ქალაქ ნიონში საფეხბურთო სიმულატორ PES-ის 2020 წლის ევროპის ჩემპიონატის შესარჩევი ეტაპის წილისყრა გაიმართა. წილისყრის შედეგად საქართველოს კიბერნაკრები F ჯგუფში კოსოვოს, ჩრდილოეთ ირლანდიის, ბელარუსის, ლიეტუვისა და ლუქსემბურგის ნაკრებებთან ერთად იასპარეზებს.შესარჩევი ეტაპის მატჩები 2020 წლის მარტიდან მაისის ჩათვლით გაიმართება. ტურნირის ფინალური ეტაპი, რომელშიც მონაწილეობას 16 გუნდი მიიღებს, მიმდინარე წლის 9-10 ივლისს ლონდონში გაიმართება.
საქართველოს ნაკრებს ტურნირზე 2 მოთამაშე - გიორგი საკანდელიძე და ალექსანდრე მომოტოვი წარმოადგენს, რომლებმაც PES 2020-ის საქართველოს ჩემპიონატზე საუკეთესო შედეგი აჩვენეს.
შეგახსენებთ, რომ კიბერნაკრების
დასაკომპლექტებლად საქართველოს ფეხბურთის ფედერაციასა და საქართველოს კომპიუტერულ სპორტის ფედერაციას შორის გაფორმებული თანამშრომლობის ხელშეკრულების ფარგლებში, 2019 წელს მთელი ქვეყნის მასშტაბით PES 2020-ში საქართველოს ჩემპიონატი გაიმართა. ჩემპიონატის ფარგლებში, შესარჩევი ტურები საქართველოს 7 ქალაქში (ოზურგეთი, ბათუმი, ზუგდიდი, ქუთაისი, რუსთავი, თელავი, თბილისი) ჩატარდა. საბოლოოდ ტურნირში მონაწილეობა 2352-მა მოთამაშემ მიიღო.
მომზადებულია gff.ge-ს მიხედვით
