საქართველოს ნაკრები შეტევაში - ხვიჩასთან ერთად და მის გარეშე

AutoSharing Option
დღე-დღეზე საქართველოს ნაკრების შემადგენლობას გავიგებთ, რომელიც "ერთა ლიგაზე" იასპარეზებს. მანამდე კი Sportall.ge სტატიების ციკლს აგრძელებს - მოლოდინი და ინტერესი ხომ ძალიან დიდია...

შეტევა სანიოლის მოღვაწეობის დასაწყისში

საქართველოს ნაკრების ფრანგი მთავარი მწვრთნელის წინა საქმიანობებისა და საწყისი თამაშების მიხედვით ისე ჩანდა, რომ ვილი სანიოლს ტანმაღალი, გამოკვეთილი ფორვარდით თამაში და შეტევის ასე გაგრძელება მოსწონდა და შეტევაში მისი ძირითადი ტაქტიკური იარაღი იყო.

ეს ტენდენცია საკმაოდ დიდხანს გამოიკვეთა, რაც გიორგი მიქაუტაძის საქართველოს ნაკრებში გამოძახებამაც ვერ შეცვალა, რომელიც უფრო მოძრავია და არა კლასიკური "ცხრიანი".

კიდევ ერთხელ
უნდა გავიხსენოთ გასული წლის ოქტომბერი და კოსოვოში მოგებული (2:1) მატჩი, საიდანაც მოყოლებული, "ჯვაროსნებმა" და მისმა მწვრთნელმა იდეალურთან მიახლოებულ ტაქტიკასა და შეტევაში ბალანსს მიაგნეს...

ხვიჩას როლი

საქართველოს ნაკრების შეტევების განვითარება, დიდწილად, ხვიჩა კვარაცხელიასა და შეტევის მარცხენა ფლანგზე მოდის. ბათუმის "დინამოს" ფეხბურთელი ნაკრებში ართმევებშიც გამორჩეულია, მეტოქის შეტევას შლის და შემდეგ საკუთარი გუნდისას ავითარებს.

გარდა ამისა, კვარაცხელია იდეალურია ისეთი მოცემულობის დროს, როცა ჩვენს ნაკრებს ბურთი ხშირად არ აქვს, მაგრამ მისი მოპოვებისთანავე, "კვარა" საკუთარი სისწრაფისა და ტექნიკის ხარჯზე, მეტოქის ნახევარსა და საჯარიმოსთან დიდ უპირატესობას ქმნის.

დაგვირგვინების ნაწილში ხვიჩას ძალა გასულ შესარჩევში კარგად ვნახეთ, როცა მან ესპანეთსაც გაუტანა, შვვედეთსაც და საბერძნეთსაც.

Sportall.Ge

რა გვაკლია შეტევაში?

სანიოლის გუნდს უჭირს პრესინგის თამაში როგორც საკუთარ, ისე მეტოქის საჯარიმოსთან ახლოს. არადა, დაკარგული ბურთის მალევე დაბრუნება შეტევის განვითარების საშუალებას გაძლევს.

რაც ბოლო ამხანაგურ მატჩებში გამოჩნდა, ის იყო, რომ ფეხბურთელები მაქსიმალურად ცდილობდნენ, საკუთარი კარის უსაფრთხოებაზე ეზრუნათ, რაც შეტევაში ძალებს გვართმევდა. ნახევარდაცვიდან ბურთის წინ სწრაფად გადატანა გვირთულდება, ასეთ დროს კი მეტოქე უკანა ხაზში დალაგებას ასწრებს.

შეტევაში მნიშვნელოვანი ფაქტორია ზონების სწორად ათვისება, უბურთოდ მოძრაობა, უპირატესობის შექმნა, რაზეც ჯერ კიდევ ბევრი მუშაობაა საჭირო.

ვინ ითამაშებს წინა ხაზზე?

სავარაუდოა, რომ სანიოლის ძირითადი ტაქტიკა 3-4-3 ან 3-5-2 უნდა იყოს. რაც ნამდვილად ვიცით, ხვიჩა კვარაცხელია ძირითად შემადგენლობაში აუცილებლად იქნება.

ბოლო მატჩებიდან გამომდინარე, ფორვარდის პოზიციაზე ბუდუ ზივზივაძის გამოჩენა ლოგიკური უნდა იყოს, თუმცა ისეთ მჭიდრო გრაფიკში, რაც ივნისში გვექნება, ცვლილებები როგორც თამაშისას, ასევე მომავალი შეხვედრის წინაც მოსალოდნელია.

გიორგი მიქაუტაძე, დავით ვოლკოვი, გიორგი ქვილითაია - ეს იმ ფორვარდების ჩამონათვალია, რომელთა "ერთა ლიგის" განაცხადში ყოფნა ლოგიკურად გამოიყურება.

Sportall.Ge

კარგია, როცა შეტევაში წარმატებას მხოლოდ ჩაწოდებებში არ ვეძებთ, თუმცა, როცა წინა ხაზზე ამ ტიპის ფეხბურთელი გყავს, მაშინ ფლანგური გადაცემების გამოყენებაც აუცილებელია, რაც, მაგალითად, ალბანეთთან (მარტში), როცა ვოლკოვი სასტარტოში იყო, ფაქტობრივად, ვერ ვნახეთ და ამით მას ერთ-ერთი მთავარი კოზირი გამოვაცალეთ.

ასე რომ, ნაკრების მწვრთნელს ბევრი მუშაობა დასჭირდება, რათა სხვადასხვა სიტუაციასთან ადაპტირება მოხდეს, რაც პრინციპში, ამხანაგურ მატჩებში მაქსიმალურად გამოიყენა.

როცა ვსაუბრობთ ფეხბურთელებზე, რომელთაც შეტევაში სხვადასხვა პოზიციაზე თამაში შეუძლიათ, გამოცდილი ვაკო ყაზაიშვილი და თორნიკე ოქრიაშვილი არ უნდა დაგვავიწყდეს; თავის შანსს ისევ ელის გიორგი ბერიძე. უფრო მეტს კი მთავარი მწვრთნელის არჩევანიდან გავიგებთ.

"ერთა ლიგას" 2 ივნისს, ჯგუფის უსუსტეს წევრ გიბრალტარის მასპინძლობით ვიწყებთ.

altვინ გააძლიერებს ნაკრებს და როგორ ფორმაში არიან ქართველი ფეხბურთელები? - მალე სანიოლი იტყვის...

altვინ უნდა დაიცვას საქართველოს ნაკრების კარი?

altდაცვის მნიშვნელობა სანიოლის ნაკრებში - სიტუაცია "ერთა ლიგისთვის"

altვინ შეცვლის კანკავას და ახალი როლი ზურიკოს - სანიოლის ნახევარდაცვა

მკითხველის კომენტარები / 15 /
რა გინდათ ამ ყაზაიშვილისგან?ეზარება კაცს ფეხბურთის თამაში.იქ თამაშობს,სადაც ორჯერ გაქცევაში და სამჯერ კარისკენ დარტყმაში უხდიან ხელფასს.არც ვამტყუნებ,ფულს შოულობს კაცი და ღმერთმა ბევრი აშოვნინოს.თქვენ კიდე აძალებთ,გინდა თუ არა ჩამოდი და ირბინეო.არ უნდა,ეზარება.აღარც ოქრიაშვილს შეუძლია.წარმატებები ნაკრებს.
ნუკრი
19:48 18-05-2022
4
გიორგი ბერიძის კანდიდატურას,ასე "ც"ს რანგში არ დავარჩენდი.კლუბში ის და ბუდუ ზივზივაძე იდეალურად არიან შეთამაშებულნი და ამის არ გათვალისწინება,დიდი შეცდომა მგონია.საკმაოდ ტექნიკურიცაა,შრომისუნარიანიც და მებრძოლიც.კარგია,რომ უკვე საკმაოდ ბევრი და საფუძვლიანი კანდიდატი გამოჩნდა შეტევაში.გაზრდილი კონკურენცია,კლასზეც აუცილებლად აისახება.ძალიან დიდი და აუცილებლად ასათვისებელი რეზერვი გვაქვს,სტანდარტული სიტუაციების ვარიანტების დამუშავებაშიც.ამდენი წელია,რაც ნაკრებს დამუშავებული,აუტიდან ბურთის შემოტანაც კი არ აქვს.ჯარიმა და კუთხური,ან ტოტალური პრესინგიდან გამოსვლა ყოველთვის პრობლემურია ჩვენთვის.სანამ სამი შეცვლა იყო დაშვებული,ერთ საათში ჩერდებოდა გუნდი.ახლა 5 შეცვლა კეთდება და 70-75 წუთს ვუძლებთ,მაგრამ ანგარიშის შენარჩუნებაზე თამაში,ჩვენი აქილევსის ქუსლი გახდა.თამაშის სადავეებს ვკარგავთ და გოლს ვუშვებთ.ერთი სიტყვით,უამრავი პრობლემა და სამუშაო გვაქვს,თუმცა თვითონ კონტინგენტი,გაცილებით უკეთესი ვიდრე ადრე იყო და ეს გვაძლევს სამომავლო იმედს.
სოსო
16:57 18-05-2022
1

myquiz
ასევე დაგაინტერესებთ
სიახლეები პოპულარული