შესაძლო დაპირისპირება ქეცბაიასთან და ინგლისის ნაკრებთან - საქართველოს ნაკრების გეგმები

საქართველოს ეროვნული ნაკრების განვლილი მატჩები დეტალურად განვიხილეთ. მსოფლიოს ჩემპიონატის უჩვეულო დროს გამართვის გამო, საფეხბურთო კალენდარში ბევრი ცვლილებაა. ვიცით, რომ ვილი სანიოლის ნაკრები ოფიციალურ მატჩს მომდევნო წელს ჩაატარებს, მანამდე და მის შემდეგ კი ბევრი საინტერესო გველის. ქრონოლოგიურად მივყვეთ.


2024 წელს გერმანიაში გასამართი ევროპის ჩემპიონატის შესარჩევი ეტაპის წილისყრა 9 ოქტომბერს (ჩვენი დროით 14:00 სთზე), ქალაქ ფრანკფურტში ჩატარდება. არსებობდა იმედი, რომ "ერთა ლიგაზე" ჯგუფში გამარჯვების გამო, სანიოლის ნაკრები მე-3 კალათაში იქნებოდა, თუმცა მეოთხეში ვართ მოთავსებულნი.



შესარჩევ ეტაპზე 10 ჯგუფი (7 ხუთგუნდიანი და 3 ექვსგუნდიანი) იქნება, საიდანაც 2 საუკეთესო ევროპირველობაზე გავა. მათ მასპინძელი გერმანია და "ერთა ლიგის" 3 დივიზიონის გამარჯვებული დაემატება. შესარჩევ ეტაპზე მონაწილე 53 ნაკრებს შორის რუსები არ არიან, ბელარუსები და უკრაინელები კი ერთმანეთს ვერ შეხვდებიან.

მოგეხსენებათ, ის ნაკრებები, რომლებიც ტურნირზე შესარჩევი ეტაპიდან გავლენ და ამავდროულად, "ერთა ლიგიდან" პლეი-ოფში არიან (როგორც საქართველო), ამ უკანასკნელში სხვა ჩაანაცვლებს.

შესარჩევი ეტაპის პირველ კალათაში ყველაზე სასურველი მეტოქეები მაინც უნგრეთისა და პოლონეთის ნაკრებები არიან, მეორეში ყველაზე არასასურველი - საფრანგეთი და ინგლისი.

საინტერესოა, მესამე კალათიდან ვის დავუპირისპირდებით - უკრაინა, ისლანდია, ნორვეგია, სლოვენია, ირლანდია, ალბანეთი, მონტენეგრო, რუმინეთი, შვედეთი, სომხეთი. შესაძლოა, მეხუთე კალათიდან მეტოქედ თემურ ქეცბაიას კვიპროსის ნაკრები გვერგოს.



მსოფლიოს ჩემპიონატისთვის მზადებას ნაკრებები 4 ნოემბრის შემდეგ შეუდგებიან, როცა საკლუბო ფეხბურთი შეისვენებს. ამ დროს ამხანაგური შეხვედრების ჩატარება იმ ნაკრებებსაც შეეძლებათ, რომლებიც მუნდიალზე არ მონაწილეობენ, მათ შორის საქართველოს. სავარაუდოა, რომ ჩვენი სპარინგ-მეტოქეების ვინაობა წილისყრის შემდეგ გაირკვევეა, რადგან ერთის მხვრივ, მათი არჩევა მომავალი მოწინააღმდეგის შესაბამისად მოხდეს, ამავდროულად კი ფედერაციის წარმომადგენლების უშუალო შეხვედრების დროს, ასეთი გადაწყვეტილების მიღება უფრო მარტივი იქნება. თუმცა, ამ მიმართულებით მუშაობა უკვე დაწყებული უნდა იყოს.

თუმცა, შესაძლოა, უახლოესი ამხანაგური დაპირისპირებები არაევროპულ ნაკრებებთანაც დაიგეგმოს, რომლებიც თავის მხვრივ, მუნდიალის სამზადისში იქნებიან. თუნდაც ხვიჩა კვარაცხელიას ფაქტორის გამო, მეტოქეების შერჩევა არ უნდა გაგვიჭირდეს 


ევროპირველობის შესარჩევი ეტაპის პირველი ტური 2023 წლის 23-25 მარტს გაიმართება. მარტში, ივნისში, სექტემბერში, ოქტომბერს და ნოემბერში 2-2 ტური შედეგება (6-გუნდიან ჯგუფებში), ხუთგუნდიან ჯგუფში მყოფებს კი ამხანაგური შეხვედრების ფანჯარაც გამოეყოფათ.

თუკი იმ მოცემულობას დავუშვებთ, რომ "ერთა ლიგის" C დივიზიონიდან პლეი-ოფში გასული ნაკრებებიდან, შესარჩევი ეტაპიდან, ევროპის ჩემპიონატზე ვერცერთი ვერ მოხვდება, მაშინ 2024 წლის 21 მარტს ასეთ ნახევარფინალურ წყვილებს ვიხილავთ: საქართველო - ყაზახეთი, საბერძნეთი - თურქეთი. მათ შორის გამარჯვებულებს შორის ფინალის მასპინძელს წილისყრა გადაწყვეტს, გადამწყვეტი შეხვედრა კი
26 მარტს შედგება. რაც შეეხება ევროპის ჩემპიონატს, ის სტარტს 2024 წლის 14 ივნისს აიღებს.



საქართველოს ნაკრებმა მოახერხა და "ერთა ლიგაზე" უკვე 2 დივიზიონით დაწინაურდა, შესაბამისად, მომდევნო გათამაშებაში მეტოქეები გაცილებით მაღალი კლასის გვეყოლება. ჯერჯერობით უცნობია, მსოფლიოს მომავალ ჩემპიონატთან ტურნირი როგორ მიებმება. საქართველოს ნაკრების უპირველესი მიზანი ლიგაში ადგილის შენარჩუნება უნდა იყოს, თუმცა გამართლების შემთხვევაში, ჯგუფში გამარჯვება და A ლიგაში დაწინაურება შეუძლებელი არ იქნება.

გამართლებაში უპირველესად, იმას ვგულისხმობთ, ჩვენს ოთხეულში ინგლისის ნაკრები არ ვიხილოთ. დივიზიონში უელსის ნაკრებისა და ერლინ ჰოლანის ნორვეგიის გამოყოფაც შეიძლება. "ერთა ლიგის" მომდევნო ტურნირი 2024 წლის სექტემბერში დაიწყება.

"ფეოლას" "გაგიჭირდებოდათ" არ შედგა - რა აკლია და სჭირდება საქართველოს ნაკრებს?

საქართველოს ნაკრების მეკარის რთული და სევდიანი ისტორია - საამაყო მომენტში ყველაზე დიდი გულშემატკივრის გარეშე...