საქართველოს ეროვნული ნაკრები ევროპის ჩემპიონატის საკვალიფიკაციო ეტაპზე 16 ნოემბერს, შოტლანდიას უმასპინძლებს, 19 ნოემბერს კი გასვლაზე ესპანეთს დაუპირისპირდება.ეროვნული ნაკრების მთავარმა მწვრთნელმა ვილი სანიოლიმ მატჩისწინა პრესკონფერენციაზე სხვადასხვა თემების შესახებ ისაუბრა.
"კიტეიშვილს ტერფის ტრავმა აწუხებს, ასეთ დროს სიფრთხილე და დასვენებაა საჭირო, დარწმუნებული ვარ, ფორმას მალე აღიდგენს და მოედანს მალე დაუბრუნდება, ხოჭოლავაც ტრავმირებულია, მას მუხლის პრობლემა შეექმნა და კიდევ ერთი ოპერაცია გაიკეთა, დამატებითი ინფორმაცია, სამწუხაროდ, არ მაქვს.
რაც შეეხება საბა ლობჟანიძეს, მას გადატვირთული გრაფიკი ჰქონდა, მივიჩნიე, რომ მოახლოებული მატჩებისთვის ფიზიკურად გადაღლილი იქნებოდა და
სამწუხაროდ ლუკა გაგნიძე და საბა საზონოვს საკუთარ კლუბებში თამაში ხშირად არ უწევთ, აუცილებელია, რომ ეს პრობლემა გამოასწორონ, რათა პროგრესი გააგრძელონ. იმედი მაქვს არ დანებდებიან და მათი სიტუაცია შეიცვლება.
წიტაიშვილის პოზიციაზე დიდი არჩევანი გვაქვს. აზაროვმა და შენგელიამ კარგად ითამაშეს, ნაკრებში ლევანმა ბოლო ორ მატჩში კარგი შთაბეჭდილება დატოვა. გიორგისთვის ნაკრების კარი ღიაა.
გაბრიელ სიგუასთან მიმართებაში შესაძლოა შეცდომა დავუშვი, რადგან ვთქვი, რომ ტაილანდთან შეხვედრაში ძირითად შემადგენლობაში იქნებოდა, თუმცა ვარჯიშზე ტაქტიკური გეგმა შევცვალეთ და გაბრიელი ტაქტიკაში ვერ ჩაჯდა. ცხადია, სიგუა ნაკრების მომავალია, თუმცა უნდა გაიზარდოს და გარკვეულ ასპექტებში თამაში გააუმჯობესოს, მას განსხვავებული თვისებები აქვს.
უკვე დიდი ხანია, რაც ნაკრებში ხვიჩა ცენტრიდან მოქმედებს, ეს მის შედეგიანობაზეც მეტყველებს, ბოლო პერიოდში "ნაპოლიშიც" ამ პოზიდიიდან თამაშობდა, ამიტომ გასაკვირი არაფერია. ხვიჩას მსგავსი ფეხბურთელებისთვის, ეს პრობლემას სულაც არ წარმოადგენს, რადგან მაღალი დონის ფეხბურთელია. შევიმუშავეთ ტაქტიკა, რომლის წყალობითაც "კვარას" დაცვითი სამუშაოს შესრულება და დიდი ენერგიის დახარჯვა არ მოუწევდა. ხვიჩა თავს საუკეთესოდ იმ პოზიციაზე წარმოაჩენს, სადაც ჩვენ დავაყენებთ.
ქართულ საკლუბო ფეხბურთს თვალს ვადევნებ, თუმცა არ ვფიქრობ, რომ ახლა ამაზე საუბრის დროა. თუ ქართული კლუბები წარმატებას მიაღწევენ და ევროთასებზე იასპარეზებენ, ეს უპირველესად ნაკრებს წაადგება. ქართული გუნდები ცდილობენ კონკურენტუნარიანები იყვნენ, თუმცა ეს მარტივი არაა", - განაცხადა სანიოლმა.
შეგახსენებთ, საქართველოსა და შოტლანდიის მატჩი 16 ნოემბერს, თბილისის დროით 21:00 საათზე დაიწყება.
