ლეგიონის უქმეები: არაბულის დუბლი, ძალამიძისა და ბერიძის გოლები [VIDEO]

სანაკრებო პაუზამდე ქართულ ლეგიონს მოკრძალებული ტური ჰქონდა, ახლა კი ჩვენებურებმა 5 გოლი გაიტანეს. აღვნიშნავთ დონეცკის "შახტარში" დავით ხოჭოლავას დებიუტსაც. დუბლი მიითვალა უნგრეთში მოთამაშე ბაჩანა არაბულმა...

ესპანეთი, ლა ლიგა 1|2|3.
ოთარ კაკაბაძე "ხიმნასტიკის" სასტარტოში იყო "კადისთან" 0:2 წაგებულ შეხვედრაში, იგი 77-ე წუთზე გამოცვალეს.

გიორგი აბურჯანია სათადარიგო იყო "სევილიას" დუბლების საგარეო მატჩში "უესკასთან" - 0:0.

გიორგი პაპუნაშვილის (75-ე წუთზე შევიდა) "სარაგოსა" შინ "ალკორკონთან" დამარცხდა - 0:1.

იტალია, სერია B.
"სპეციამ" "ენტელა" 2:1 დაამარცხა, მაგრამ ამ გუნდის რიგებში ირაკლი შეყილაძეს ვერ ნახავთ - გუნდმა ის საჩემპიონატო განაცხადში არ შეიყვანა, მას მერე, რაც იჯარის რამდენიმე ვარიანტზე თავად ფეხბურთელმა განაცხადა უარი.

"ემპოლი" სტუმრად "პალერმოს" დაუზავდა - 3:3. ყოფილი გუნდის წინააღმდეგ ტრავმირებულ ლევან მჭედლიძეს, რა თქმა უნდა, არ უთამაშია.

იტალია, ლეგა პრო.
რომან ჭანტურიას (75-ე წუთზე გამოცვალეს) "პრატო" სტუმრად დაუზავდა (1:1) "კუნეოს".

გერმანია, II ბუნდესლიგა.
აკაკი გოგიას "უნიონი" სტუმრად "დიუსელდორფთან" 2:3 დამარცხდა. ჩვენებური 75-ე წუთზე გამოცვალეს, მანამდე მან ყვითელი ბარათი მიიღო.

ლუკას ჰუფნაგელის "ნიურნბერგი" დღეს უმასპინძლებს "ზანკტ პაულის".

საფრანგეთი, ნასიონალი.
ამირან სანაიამ ყოფილი გუნდის, "ლერბიეს" წინააღმდეგ შეუცვლელად ითამაშა. "როდეზმა" სტუმრად 3:2 იმარჯვა.

ჰოლანდია, ერედივიზიე.
გურამ კაშია სათადარიგო იყო, მისმა "ვიტესმა" კი 3:0 მოუგო სტუმრად "ექსელსიორს". მწვრთნელმა კაპიტანი უბრალოდ დაასვენა სანაკრებო მატჩების შემდეგ.

ბელგია, ჟუპილერლიგა.
გიორგი ჩაკვეტაძე "გენტის" განაცხადში მოხვდა პირველივე მატჩში ("გენკთან" - 1:1), თუმცა ქართველი თინეიჯერის დებიუტი არ შემდგარა.

პორტუგალია, პრიმეირა ლიგა.
გიორგი მაკარიძე ("მორეირენშე") განაცხადში არ ყოფილა "ეშტორილთან" გასვლით მატჩში.

პორტუგალია, სეგუნდა ლიგა.
ავთო ებრალიძის "ვიზეუ" მადეირაზე "ნასიონალთან" 0:2 დამარცხდა. ავთო თამაშში 42-ე წუთზე ჩაერთო.

პოლონეთი, ექსტრაკლასა.
პლოცკის "ვისლა" სტუმრად "ზაგლებიესთან" 0:2 მარცხდებოდა, მაგრამ შესვენების შემდეგ მოედანზე გამოვიდა ნაკრებიდან დაბრუნებული გიორგი მერებაშვილი და ყველაფერი შეიცვალა - 57-ე წუთზე ის მარცხნიდან შეიჭრა საჯარიმოში და თანაგუნდელს 5 მეტრიდან გაატანინა, შემდეგ კი მისი დრიბლინგი აკრძალული წესით შეაჩერეს, სტუმრებმა პენალტით გაათანაბრეს და ქულა იხსნეს - 2:2.

ტრავმირებული ლუკა ზარანდიას "არკამ" 3:1 მოუგო "ვისლას".

როგორც ჩანს, ნიკა კაჭარავამ გამოჯანმრთელება ვერ მოასწრო და მას "კორონას" რიგებში "სანდეციასთან" მატჩში (1:0) არ უთამაშია.

ქართველთა "პოგონი" "ლეხს" 0:0 დაუზავდა. ლაშა დვალმა შეუცვლელად ითამაშა, მათე ცინცაძე კი მოედანზე 81-ე წუთზე გამოჩნდა.

პოლონეთი, I დივიზიონი.
ლუკა ასათიანის (სათადარიგო) "სუვალკიმ" სტუმრად 1:0 აჯობა გკს-ს.

დანია, სუპერლიგა.
საბა ლობჟანიძის "რანდერსმა" სტუმრად 4:1 მოუგო "ორჰუსს". ქართველი შემტევი ნახევარმცველი შესვენებაზე შეცვალეს.

დანია, I დივიზიონი.
ქართველთა გარეშე ითამაშა "ესბიერგმა", რომელიც "როსკილდეს" დაუზავდა - მოედანზე არც ბუდუ ზივზივაძე გამოსულა და არც ლაშა პარუნაშვილი.

ავსტრია, ბუნდესლიგა.
გიორგი ქვილითაია სათადარიგოთა სკამიდან ადევნებდა თვალყურს თავისი გუნდის საგარეო მატჩს "ზალცბურგთან". "რაპიდი" მეტოქეს 2:2 დაუზავდა.

ავსტრია, ერსტე ლიგა.
ლევან ელოშვილის (არ უთამაშია) "კაპფენბერგერმა" 2:1 მოუგო "რიდს".

სლოვაკეთი, ფორტუნა ლიგა.
ახალ სეზონში პირველი გოლი გაიტანა გიორგი ბერიძემ, მისი "ტრენჩინი" "სლოვანს" 2:2 დაუზავდა. ამ შეხვედრაში ანგარიში ქართველმა შემტევმა გახსნა.

ვახტანგ ჭანტურიშვილის "ტრნავამ" 2:1 მოუგო "ნიტრას". ჩვენებური მე-80 წუთზე, 0:1-ზე შეცვალეს, ერთი გოლი სწორედ მისმა შემცვლელმა გაიტანა.

რუმინეთი, ლიგა 1.
ნიკა ძალამიძემ პირველი გოლი გაიტანა "იუვენტუსის" რიგებში. მან მე-3 წუთზე დააწინაურა ბუქარესტელები "პოლი იაშთან" მატჩში, რომელიც 2:2 დასრულდა. ძალამიძე 71-ე წუთზე გამოცვალეს.

აკაკი ხუბუტიას "გაზ მეთანი" დღეს უმასპინძლებს "კონკორდიას".

უნგრეთი, OTP ბანკ ლიგა.
ბაჩანა არაბულმა დუბლი შეასრულა. მან ჯერ გახსნა ანგარიში "მეზოკოვეშდთან" შეხვედრაში, ბოლოს კი გაათანაბრა და "ბალმაზივაროში" წაგებისგან იხსნა - 2:2. არაბულმა შეუცვლელად ითამაშა, ხოლო მისი თანაგუნდელი ირაკლი მაისურაძე მოედანზე მე-80 წუთზე გამოვიდა.

შვედეთი, ოლსვენსკანი.
ზურაბ ცისკარიძე სათადარიგო იყო, მისი გუნდი "ესკილსტუნა" კი სტუმრად 0:3 დამარცხდა "ოსტერსუნდსთან".

ფინეთი, იუკონენლიგა.
ირაკლი სირბილაძის (90 წთ) კპვ შინ "იაროს" დაუზავდა - 0:0.

მაკედონია, I ლიგა.
ჯაბა ჯიღაურის (64-ე წუთზე შევიდა) "ვარდარმა" "სილეკსს" 3:1 მოუგო.

კვიპროსი, I დივიზიონი.
გიორგი ილურიძის (სათადარიგო) "ახნასი" სტუმრად "ომონიასთან" 1:2 დამარცხდა. წაგებულთა ერთადერთი გოლი რუსეთის მოქალაქე ნიკა ყიფიანის ანგარიშზეა.

რუსეთი, პრემიერლიგა.
"ანჟი" სტუმრად "ტოსნოს" 2:2 ეთამაშა. "ანჟის" ქართველები, გიორგი ლორია და ჯაბა ლიპარტია სათადარიგოთა სკამზე ისხდნენ.

ტრავმირებულ გია გრიგალავას არ უთამაშია "როსტოვთან" შეხვედრაში. ტულის "არსენალი" მეტოქეს სტუმრად დაუზავდა - 2:2.

ჯანო ანანიძე მოსკოვის "სპარტაკის" განაცხადშიც არ ყოფილა "რუბინთან" 1:0 დასრულებულ მატჩში. მწვრთნელის თქმით, მას მუხლის მცირე ტრავმა აქვს.

ჯიმი ტაბიძემ მეორე ტაიმი ითამაშა "უფას" შემადგენლობაში "კრასნოდართან" მატჩში - 0:1. სტუმართა რიგებში ჯერჯერობით არ თამაშობს თორნიკე ოქრიაშვილი, რომელიც ტრავმის შემდეგ ფორმაში არ არის.

მოსკოვის "ლოკომოტივი" სტუმრად დაუზავდა "ახმატს" - 1:1. სტუმართა რიგებში 90 წუთი ითამაშა საბა კვირკველიამ.

დღეს გიორგი ჭანტურიას "ურალი" გიორგი ნავალოვსკის "სკა-ხაბაროვსკს" მასპინძლობს.

უკრაინა, პრემიერლიგა.
გიორგი არაბიძე კვლავ "შახტარის" დუბლებში გამოჩნდა, რომელმაც "ზორიასთან" ქულები გაიყო - 1:1. არაბიძე მოედანზე 83-ე წუთამდე იყო, თავი არ გამოუჩენია, მაგრამ ერთხელ საჯარიმო დარტყმით კინაღამ უწია მიზანს - ბურთი ხარიხას მოხვდა.

როგორც იქნა, დავით ხოჭოლავას დებიუტიც ვიხილეთ "შახტარში". დონეცკელებმა 3:1 მოუგეს "ზორიას", ხოლო ჩვენებური მინდორზე 65-ე წუთზე გამოჩნდა.

"ამ მომენტს დიდხანს ველოდი. მჯეროდა, რომ შანსი მეც მომეცემოდა. კარგია, რომ სადებიუტო მატჩი გამარჯვების გამომივიდა. გავაგრძელებ შრომას ვარჯიშებზე, რომ შემადგენლობაში ხშირად მოვხვდე. ახლა ყველანი უკვე "ნაპოლიზე" ვფიქრობთ", - განაცხადა მატჩის შემდეგ ქართველმა დებიუტანტმა.

უკრაინაში დაბრუნების შემდეგ პირველად ითამაშა "ვორსკლაში" სანდრო კობახიძემ. მისი "ვორსკლა" 1:1 დაუზავდა "ოლიმპიკს". კობახიძე მოედანზე 71-ე წუთზე გამოჩნდა.

ბელორუსი, ვისშაია ლიგა.
ვაკო გვილიას (74-ე წუთზე შევიდა) ბატე-მ 2:0 მოუგო ოთარ ჯავაშვილის (90 წთ) "სლავიას".

ლიტვა, თასი.
ლევან მაჭარაშვილის "შტუმბრასი" ფინალში გავიდა, მას მერე, რაც დამატებით დროში 2:1 დაამარცხა "ვილნიაუსი".

ლატვია, ვირშლიგა.
"ლიეპაიამ" სტუმრად 5:2 მოუგო "მეტას". გამარჯვებულთა რიგებში შეუცვლელად ითამაშა გიორგი ერისთავმა (გააფრთხილეს).

ქართველთა "რიგასმა" 3:0 მოუგო "იელგავას". ლაშა შერგელაშვილმა 90 წუთი ითამაშა, გიორგი დიაკვნიშვილი სათადარიგო იყო.

ესტონეთი, მეისტრილიგა.
ზაქარია ბეგლარიშვილის (88-ე შეცვალეს) "ფლორამ" სტუმრად 3:1 მოუგო "ინფონეტს".

ფარერები, პრემიერლიგა.
"სკალამ" სტუმრად "რუნავიკს" აჯობა - 4:3. გამარჯვებულთა რიგებში ერთი გოლი მამუკა ტორონჯაძემ გაიტანა.

აზერბაიჯანი, პრემიერლიგა.
პირველ ორ ტურში მარცხის შემდეგ ზაურ სვანაძის "ინტერმა" ზედიზედ მეორე თამაში მოიგო, ამჯერად "ქიაფაზი" 3:2 დაამარცხა.

ყაზახეთი, პრემიერლიგა.
უჩა ლობჟანიძისა და ლადო დვალიშვილის "ატირაუ" ჩემპიონმა "ასტანამ" შეარცხვინა - 7:0. ჩვენი ნაკრების ფეხბურთელებმა შეუცვლელად ითამაშეს.

გოგიტა გოგუას "ოკჟეტპესი" სტუმრად "აკჟაიკთან" დამარცხდა - 0:2. გოგუამ პირველ ტაიმში ყვითელი ბარათი მიიღო, 88-ე წუთზე ის შეცვალეს.

ნიკა კვეკვესკირის "ტობოლმა" სტუმრად 2:1 დაამარცხა "ირტიში". ქართველი ამ მატჩის ერთ-ერთი მთავარი მონაწილე იყო - 75-ე წუთზე მან შემთხვევით საკუთარი კარი დალაშქრა, მაგრამ თავადვე გამოასწორა ყველაფერი - საჯარიმოდან კასაის საგოლედ ჩაუწოდა.

უზბეკეთი, ოლიი ლიგა.
კახა მახარაძის "ლოკომოტივმა" მინიმალური ანგარიშით დაამარცხა "შორტანი" - 1:0. ჩვენებურმა სასტარტო შემადგენლობაში ითამაშა.

შოთა გრიგალაშვილის "ოლმალიქი" 0:1 დამარცხდა "ნასაფთან" საგარეო მატჩში. ჩვენებური უკვე მე-10 წუთზე გამოცვალეს.

შოთა არველაძემ პირველი საგარეო მოგება მიითვალა - "ფახთაქორმა" "მეტალურგი" 3:1 დაამარცხა.

აშშ, MLS.
"სან ხოსე" სტუმრად "ტორონტოსთან" 0:4 განადგურდა. ვაკო ყაზაიშვილი სათადარიგო იყო.

(იბეჭდება მცირე ცვლილებით)
ყოველდღიური სპორტული გაზეთი "ლელო"