ამას პირველად ვამბობ, "დინამოს" ხელმძღვანელობამ ულტიმატუმი წამიყენა - ინტერვიუ გიორგი მერებაშვილთან

AutoSharing Option
პოლონეთში, პლოცკის "ვისლაში" მოთამაშე გიორგი მერებაშვილს ბოლო დროს სათამაშო პრაქტიკა არ ჰქონდა და ეროვნულ ნაკრებშიც არ იძახებდნენ. თუმცა პლოცკელებს ცოტა ხნის წინ მთავარი მწვრთნელი შეეცვალათ და იმედია, ქართველი სათამაშო დროს ისევ მიიღებს. ამ და სხვა საკითხების გასარკვევად sportall.ge გიორგის პოლონეთში დაუკავშირდა.

- პირველ რიგში, თქვენი საკლუბო მდგომარეობა გვაინტერესებს. პლოცკის "ვისლას" შემადგენლობაში ბოლოს მიმდინარე წლის დასაწყისში, მხოლოდ რამდენიმე წუთით გამოჩნდით...
- უთამაშებლობა მთლიანად მთავარი მწვრთნელის "დამსახურება" იყო, რომელმაც უმიზეზოდ ამომიჩემა. ამბობდა, რომ მის სათამაშო სტილსა და ტაქტიკაში არ მოვიაზრებოდი. გუნდს შედეგები არ ჰქონდა. ამის მიუხედავად,
ჩემთვის არაფერი იცვლებოდა. 
სხვათა შორის, ამას კლუბის გულშემატკივრებიც აპროტესტებდნენ... 

სულ რამდენიმე დღეა, რაც ახალი მთავარი მწვრთნელი გვყავს. მას უკვე ვესაუბრე და ვგრძნობ, ჩემი იმედი აქვს. რა თქმა უნდა, ფორმაში შესასვლელად გარკვეული დრო დამჭირდება. არადა, კვირის ბოლოს უკვე შეხვედრა გვაქვს.  ჩემპიონატის დასრულებამდე მხოლოდ ექვსი ტურია დარჩენილი და ამ დროში ვეცდები, მაქსიმუმი გავიღო.

- სეზონის ბოლოს კლუბთან კონტრაქტი გეწურებათ.
ამ ვითარების ფონზე, როგორ წარმოგიდგენიათ თქვენი საფეხბურთო მომავალი, რა გეგმებსა და წინადადებებს განიხილავთ?
- ჩვენი გუნდი ადგილობრივი ქალაქის მერიის საკუთრებაა და გადაწყვეტილებებიც მათი ჩართულობით მიიღება. რაც შეეხება კლუბის პრეზიდენტს, უთამაშებლობის მიუხედავად, ყოველთვის მეუბნებოდა, რომ ჩემი სჯერა.

ექსტრაკლასაში ადგილის შენარჩუნებას კონტრაქტის გასახანგრძლივებლად დიდი მნიშვნელობა ექნება. მართალია, სამშობლოდან მოწყვეტა რთულია, თუმცა აქ ხუთი წელია ვარ, შინაურული გარემოა და კონტრაქტს სიამოვნებით გავახანგრძლივებდი...

- ცოტა ხნის წინ თბილისის "ლოკომოტივში" გურამ კაშია ჩაირიცხა. რამდენად შესაძლებელია, საქართველოს ეროვნული ლიგის ვარიანტი თქვენც განიხილოთ და უკვე ხომ არ გქონიათ გარკვეული შემოთავაზებები?
- ნათქვამი მაქვს, რომ კარიერას სამშობლოში სიამოვნებით დავასრულებდი. 12 წელი ვიყავი "დინამოელი" და ეს დიდი პატივია, თუმცა არც სხვა ქართულ კლუბში გადასვლაა გამორიცხული.

- მართლაც გამორჩეული იყავით თბილისის "დინამოში" და საუბრები იყო თქვენ მიმართ ძლიერი ჩემპიონატების კლუბების დაინტერესებაზე, თუმცა საბოლოოდ სერბეთში აღმოჩნდით... როგორ გახსენდებათ ის პერიოდი და იყო თუ არა კარიერის გაგრძელების სხვა ალტერნატივაც?
- იმ პერიოდში ევროსარბიელზე თავი კარგად წარმოვაჩინე, განსაკუთრებით, "ცრვენა ზვეზდასთან" და ჩემ მიმართ ინტერესი გაიზარდა. მაშინ გამოუცდელი ვიყავი, არავინ მყავდა ისეთი, ვინც მიმითითებდა, გზას გამიკვალავდა. თან ერთი მნიშვნელოვანი ფაქტორი იყო...

თბილისის" დინამოსთან"  კონტრაქტი რვა თვეში მეწურებოდა. ამას პირველად ვამბობ - კლუბის ხელმძღვანელობამ და პირადად ბუბა ტყავაძემ მითხრა, რომ თუკი "ვიოვოდინაში" არ გადავიდოდი, კონტრაქტის ამოწურვამდე უთამაშებელს დამტოვებდნენ. დილემა ასე იდგა  - სათამაშო პრაქტიკის არარსებობა თუ სერბეთში ტრანსფერი. თანაც, ეს ყველაფერი მითხრეს თამაშამდე ერთი საათით ადრე. მახსოვს, "გაგრას" უნდა დავპირისპირებოდით...

"დინამო" მაშინ, ერთგვარად, ჰაერში იყო, ბადრი პატარკაციშვილის ოჯახი აღარ აქცევდა ყურადღებას და არსებული  ხელმძღვანელობისათვის ფინანსური ინტერესი მთავარი გახლდათ.

ამის შემდეგ გავიგე, რომ  "ცრვენა ზვეზდა" მილიონს დოლარსაც კი იხდიდა, მაგრამ ეს შეთავაზება დამიმალეს. მოგვიანებით კი, რადგან კონტრაქტი მეწურებოდა, "ვიოვოდინაში" ბევრად იაფად გაშვება მოუხდათ. ასევე, გერმანული "ვერდერისა" და "აინტრახტის" სურვილების შესახებაც შევიტყვე...

-"ვიოვოდინაში" შენი თანაგუნდელები კარგ ევროპულ კლუბებში გადაბარგდნენ, დუშან ტადიჩს გულშემატკივრები მშვენივრად  იცნობენ. ჰქონდათ მათ ისეთი რამ, რაც თქვენ გაკლდათ, თუნდაც კარიერის ნიდერლანდებში გასაგრძელებლად?
- ამ კლუბში მილოშ კრასიჩიც ასპარეზობდა. რაც შეეხება ტრანსფერებს, საქმე შემდეგში იყო - კლუბი კარიერის სხვაგან გაგრძელების საშუალებას აძლევდა მხოლოდ სერბებს, ლეგიონერები კი კლუბს ასე მარტივად ვერ იცვლიდნენ. მხოლოდ საზღვარგარეთ კი არა, კონკურენტ "პარტიზანში" ტრანსფერიც არ დაუშვეს.

- რამდენად უკეთესი კარიერა გექნებოდათ, საფეხბურთო აგენტი რომ გყოლოდათ?
- რა თქმა უნდა, მოვლენები ბევრად უკეთესად შეიძლებოდა განვითარებულიყო. "დინამოდან" პირველი წასვლის დროს საკითხი ისე იდგა, რომ აგენტის აყვანა კლუბთან უნდა შეგეთანხმებინა, ხოლო თუ კარგი ურთიერთობა არ ჰქონდათ, მისი აყვანის უფლებას არ გვაძლევდნენ. აგენტი რომ მყოლოდა, ალბათ, "ვიოვოდინაში"  არ გადავბარგდებოდი. ამ გადაწყვეტილებას ჩემს კარიერაში ყველაზე მეტად ვნანობ...

- ჩვენს ფეხბურთელებს ხშირად იწვევენ რუსეთში, ყაზახეთში...  გქონიათ მსგავსი შემოთავაზება?

- რაც პოლონეთში ვთამაშობ,  იყო თუნდაც  ყაზახური ვარიანტები, თუმცა მაშინ არც განვიხილავდი. ახლა ვფიქრობ, რომ ფინანსურ ფაქტორებს მაინც დიდი მნიშვნელობა აქვს და ამ ეტაპზე, მსგავს შეთავაზებას უფრო იოლად  დავთანხმდებოდი... რუსეთის ჩემპიონატი კი საკმაოდ ძლიერია და არ მესმის, უარი რატომ უნდა თქვა...

- რა მიზეზებმა განაპირობა ის, რომ ორ წელში ისევ მშობლიურ "დინამოში" დაბრუნება მოგიხდათ?
- დინამო აეკ-თან პლეი-ოფში დასანანად დამარცხდა. კარგი გუნდი იყო და მშვენიერი  წინადადებაც შემომთავაზეს. მით უმეტეს, კარგი სეზონის მიუხედავად, "ვიოვოდინაში" ფინანსური პრობლემები შეექმნათ. არადა, მშვენიერი გუნდი გვყავდა. თასის ფინალში ჩვენ წინააღმდეგ იმდენად ცუდი მსაჯობა იყო, საერთოდ შევწყვიტეთ თამაში და ტიტულის გარეშე დავრჩით. 

- საქართველოს ეროვნულ ნაკრებში სტაბილურად, ფაქტობრივად, ყველა მწვრთნელის დროს გიწვევდნენ. რომელი პერიოდი, კონკრეტული შეხვედრა გახსენდებათ ყველაზე კარგად და როდის დაგუფლებიათ იმედგაცრუება?
- ყოველთვის მადლიერი ვარ ჩვენი გულშემატკივრების, ბევრჯერ გვედგნენ მხარში, იგივე ძალიან კარგად გასახსენებელ შეხვედრაში - თბილისში, ყაზახეთის წინააღმდეგ. რა თქმა უნდა, ისეთებიც არსებობენ, რომლებსაც კრიტიკა და შეურაცხყოფა ვერ გაურჩევიათ. შეუძლებელია, სპორტსმენმა თამაშები არ ჩააგდოს და მუდმივად ერთ დონეზე ითამაშოს. ამას ყველა  გაგებით უნდა მოეკიდოს...

- "ერთა ლიგის" ჯგუფურ ეტაპზე, ხსენებულ შეხვედრაში ყაზახეთს გოლი გაუტანეთ, ამის შემდეგ კი ეროვნულ ნაკრებში  აღარ გამოჩენილხართ. ამ ფაქტს, ძირითადად, რას უკავშირებთ?
- ვლადიმირ ვაისზე ნაწყენი ვერაფრით ვიქნებოდი, რადგანაც უთამაშებელი ვიყავი და ამის მიზეზებს საკუთარ თავში ვეძებდი. იმედია, ჩვეულ ფორმას მალე დავიბრუნებ და  ვილი სანიოლისგანაც მივიღებ შანსს...

- თქვენი კარიერიდან საინტერესო მომენტები რომ გავიხსენოთ -რომელი ეპიზოდი გახსენდებათ ყველაზე სასიამოვნოდ?
- კარგი გასახსენებელი პეტერ სეგრტის დროს ჩემი სანაკრებო დებიუტია, პორტუგალიის ნაკრებისა და  კრიშტიანო რონალდოს წინააღმდეგ. მახსოვს ეპიზოდი, როცა მცველების ალყაში ვიყავი, ბევრი არჩევანი არ მქონდა და "ჩელსის" ფეხბურთელ პაულო ფერეირას ბურთი ფეხებშუა გავუტარე.

- გახსენდებათ თუ არა ისეთი ეპიზოდები, როცა თანაგუნდელმა თუ მეტოქის მოთამაშემ თავისი საქციელით გაგაკვირვათ?

- მახსენდება, სტუმრად, ავსტრიის ნაკრებთან ფრედ როცა ვითამაშეთ, მათმა ფორვარდმა მარკო არნაუტოვიჩმა, რომელსაც ზლატან იბრაჰიმოვიჩსაც კი ადარებენ, შეხვედრის დროს მომაძახა, რომ ჩემი დონე მცოდნოდა. ამაზე ჩამეცინა და ვეცადე, სიტუაცია არ დამეძაბა...

- ბოლოს, რა შეიძლება ისწავლოს დამწყებმა სპორტსმენმა გიორგი მერებაშვილისგან?
- ეცადონ, სწორი გადაწყვეტილება მიიღონ. არც დაუფიქრებელი ნაბიჯი გადადგან, მაგრამ არც ზედმეტი ფიქრი ივარგებს. მაქსიმალურად იმუშაონ საკუთარ თავზე და პროფესიონალურად ითამაშონ...

altგიორგი მერებაშვილი პლოცკელთა ყველა დროის საუკეთესო თერმეტეულში მოხვდა






მკითხველის კომენტარები / 3 /
მერაბაშვილს რაც შეეხება არა ეგ ბიჭი დასაკარგი ! ძალიან კარგი ფეხბურთელია განსაკუთრებით მაშინაა სასარგებლო როვა დაცვით სტილს ვთამაშობთ და ამ სამ თამაშში მაგრა გამოგვადგებოდა ! ივნისის ამხაბაგურებისთვის აუცილებლად უნდა გამოიძახონ !
ზურა222
21:40 16-04-2021
2
ადრე ერთი ფეხბურთელი(გვარს არ ვიტყვი) ლოკომოტივში თამაშობდა..აგენტმა თუ გუნდმა 2-ე ბუნდესლიგის გუნდში გაუშვეს და იქ რო ჩავიდა შეეკითხნენ-შენ ვინ ხარ და ჩვენთან ვინ გამოგიშვაო.
Levani
20:17 16-04-2021
3

სიახლეები პოპულარული