გიორბელიძე ნაკრებზე, ჩაკვეტაძეზე, იაშვილსა და ქართულ სამზარეულოზე

გერმანიის მეორე ბუნდესლიგის 24-ე ტურში გურამ გიორბელიძის დრეზდენის "დინამო" საკუთარ მოედანზე "დარმშტადთან" დამარცხდა - 0:1. ქართველმა ლეგიონერმა 76 წუთი ითამაშა.

ავტორიტეტული bild-ი საქართველოს ნაკრების ფლანგელზე წერს, რომ მისი კონკურენტის, კრის ლოვის ტრავმის გამო ახლა გურამის დრო დადგა:

"კრისზე ძალიან ვწუხვარ, - ხაზს უსვამს გიორბელიძე. - პირადად მე, როგორც მოთამაშე, ყოველთვის მზად ვარ ამ გამოწვევისთვის."

ქართველი ფეხბურთელი საკუთარ საერთაშორისო გამოცდილებაზეც საუბრობს: "საქართველოს ნაკრებში ესპანეთის, შვედეთისა და ნიდერლანდების წინააღმდეგ მრავალი ვარსკვლავის პირისპირ ვთამაშობდი. დიდი პატივისცემის მიუხედავად, არ მგონია, რომ გერმანიის მეორე ბუნდესლიგის რომელიმე კლუბი ამ ნაკრებებზე ძლიერი იყოს“.

არ აქვს მნიშვნელობა, "ბარსელონელი" მემფის დეპაი თუ ფერან ტორესი; ზლატან იბრაჰიმოვიჩი - გიორბელიძე ყველა მათგანს მამაცად დაუხვდა.

ფაქტი: მისი თამაში კლუბის გულშემატკივრებზე კარგ შთაბეჭდილებას ახდენს.

"მინდა ეს სიმპათია და ნდობა ჩემი უკომპრომისო დამოკიდებულებითა და გამარჯვების შეუზღუდავი ნებით გადავიხადო“, - ამბობს გიორბელიძე.

მთავარი მწვრთნელი ალექსანდრ შმიტდი:

"გურამის უბედურება ის იყო, რომ კრის ლოვე ჩვენთან ერთ-ერთი საუკეთესო ფეხბურთელია. ამიტომ, მხოლოდ ცვლილებაზე თამაში უწევდა."

მისი იჯარა ავსტრიის პირველი დივიზიონის კლუბ "ვოლფსბერგერიდან" გასულ ზაფხულს, ბევრისთვის მოულოდნელად მოხდა. რას ფიქრობდა გიორბელიძე "დინამოზე"?

174 სმ სიმაღლის მცველი ამბობს: "ინტერესის შესახებ რომ გავიგე, გერმანიაში ალექსანდრე იაშვილს ველაპარაკე“.

ბუნდესლიგის ყოფილმა ფორვარდმა იაშვილმა პირველ და მეორე დივიზიონებში 439 მატჩი ჩაატარა "ფრაიბურგში", "კარლსრუესა" და "ბოხუმში", თავი კი 164 გოლით გამოიჩინა. დღეს ის საქართველოს ფეხბურთის ფედერაციის ვიცე-პრეზიდენტია. გიორბელიძე: "ამ გადაწყვეტილებაში მხარი დამიჭირა, რისთვისაც დიდი მადლობა".

მიუხედავად იმისა, რომ მცველი აქამდე დრეზდენში მარტო ცხოვრობდა, მას ახალი მეგობარი ჰყავს - "ჰამბურგში" ჩემი ერთ-ერთი საუკეთესო მეგობარი გიორგი ჩაკვეტაძე გადავიდა."

გიორბელიძეს მხოლოდ კულინარიული თვალსაზრისით ენატრება სამშობლო: "კარგი იქნება, მსოფლიოს ეს საოცრება, ქართულ სამზარეულოსაც ვგულისხმობ, დრეზდენშიც მოიძებნოს. რამდენადაც ვიცი, სამწუხაროდ, ჯერ არ არის."

ნახეთ რა ითამაშა გურამ გიორბელიძემ "ჰაიდენჰაიმის" წინააღმდეგ?! [VIDEO]

მატჩის დღე! - ჩაკვეტაძე თუ ალიდუ?