კვარაცხელიას სვლა ჩემპიონთა ლიგის მოსაგებად და მიქაუტაძის დიდი დაპირისპირება "მანჩესტერთან" - მთავარი ამბები ზაფხულამდე

სანაკრებო ფეხბურთი ისვენებს, სხვადასხვა ქვეყნის ჩემპიონატში ბევრი რამ გარკვეულია, მაგრამ სეზონის ბოლომდე მაინც საინტერესო ამბები გველის. ერთ-ერთი მთავარი ჩემპიონთა ლიგა და სხვა ევროტურნირებია, სადაც ქართველების წარმატებას ველით. ჩვენ ლეგიონერებს სხვადასხვა გამოწვევა აქვთ.


ხვიჩა კვარაცხელიას გუნდს შიდა ასპარეზზე პრობლემა არ უდგას და ჩემპიონობის ოფიციალურად გაფორმების შემდეგ 24 მაისს თასის აღმართვაც არ უნდა გაუჭირდეს. პსჟს მთავარი ინტერესი და ყურადღება ჩემპიონთა ლიგას უკავშირდება.

ლუის ენრიკეს ბიჭებს "ასტონ ვილასთან" მეოთხედფინალები 9 და 16 აპრილს აქვთ. თუკი ყველაფერი მათთვის კარგად წარიმართა, ნახევარფინალები 29 აპრილი - 7 მაისს ჩატარდება, ფინალი კი 31 მაისს. იმედია, "კვარა" ტიტულისთვის ბოლომდე იბრძოლებს!..

გიორგი მიქაუტაძის "ლიონმა" ლიგა 1-ში მინიმუმ, მეოთხე ადგილი უნდა დაიკავოს, ჩემპიონთა ლიგის საკვალიფიკაციო ეტაპზე მაინც რომ მოხვდეს. ამასთან ისინი შორს არ არიან.

პსჟს არ იყოს, ევროტურნირებზე ლიონელებიც მაქსიმალურად შორს გვსურს. ევროპა ლიგის მეოთხედფინალში მათაც ინგლისური მეტოქე ჰყავთ, მაგრამ მათი ამჟამინდელი ფორმის მიუხედავად, ძალიან სახელოვანი და სახიფათო, "მანჩესტერ იუნაიტედი." თუკი მიქაუტაძის გუნდი ამ ბარიერს გაივლის, მაშინ მათი ამბიციების შეფასება უფრო თამამად შეგვეძლება, იქნებ ტიტულის მოგებისკენაც ენერგიულად გაიწიონ.

კადრი ბოლო ტურიდან - დავითაშვილი და კვარაცხელია



რაც შეეხება ზურიკო დავითაშვილის "სენტ ეტიენს", მათი მთავარი მიზანი ისაა, ლიგიდან პირდაპირ არ გავარდნენ და რამენაირად პლეი-ოფში თამაში გაინაღდონ. ვნახოთ, მათთვის რთულ ამოცანას თავს როგორ გაართმევენ.

20 აპრილს (ჩვენ აღდგომის დღესაწაულს აღვნიშნავთ) ქართული დუელი გველის, დავითაშვილის გუნდი მიქაუტაძისას უმასპინძლებს.


საბა გოგლიჩიძისა და საბა საზონოვის "ემპოლის" გადარჩენისთვის ბრძოლა უწევს. დარჩენილ დროში ამ გზაზე მათი მთავარი მოწინააღმდეები "ლეჩე" და "პარმა" იქნებიან. თუკი "ნაპოლისთან" სტუმრობას არ ჩავთვლით, მათი კალენდარი ნორმალურია.

იტალიაში ჩვენი ინტერესი ნეაპოლელებს კვლავ უკავშირდება. მიუხედავად იმისა, "ინტერი" წინ სულ სამი ქულითაა, მილანელებისთვის ჩემპიონობის "გამოგლეჯა" რთული იქნება, თუმცა მათ "ბაიერნთან" ჩემპიონთა ლიგის მეოთხედფინალი აქვთ და იქნებ ანტონიო კონტეს გუნდმა ამით ისარგებლოს.

რაც შეეხება სერია "ბ"-ს. ლუკა ლოჩოშვილი "სალერნიტანა" გასავარდნ ზონაშია. ბოლომდე მშვიდად ჯერ არც "ფროზინონეა", სადაც გიორგი კვერნაძე მშვენიერ სეზონს ატარებს (3 გოლი, 3 შედეგიანი პასი).

მომავალი სეზონიდან ჩაკვეტაძეს უფრო სახელოვან კლუბში ველით



ბუდი ზივზივაძის "ჰაიდენჰაიმმა" ვითარება მნიშვნელოვნად გამოასწორა და თუკი ბუნდესლიგაში ადგილი პირდაპირ არ შეინარჩუნეს, ეს პლეი-ოფის გზით მაინც უნდა სცადონ. "ლევერკუზენი", მიუნხენის "ბაიერნი" - უახლოესი მოწინააღმდეგეები მართლაც
რთულებია. სამწუხაროდ, ქართველი თავდამსხმელი ტრავმირებულია და ორი კვირა გაუცდება.

გიორგი ჩაკვეტაძის "უოტფორდს" პრემიერლიგაში დაწინაურებისთვის ბძოლა გაუჭირდება. იმედია, მომავალი სეზონიდან "ჩაკვეს" ბევრად სახელოვან და მაღალი მიზნებისთვის მებრძოლ გუნდში ვიხილავთ.


უკვე ვიცით, რომ ესპანეთში მოთამაშე ქართველებიდან ორს მომდევნო სეზონიდან სხვა გუნდში ვიხილავთ.

იმედია, "ლივერპულის" მომავალი კიპერ გიორგი მამარდაშვილის "ვალენსია" გასავარდნ ზონაში აღარ დაბრუნდება. უახლოეს უქმეებზე მადრიდის "რეალთან" სტუმრობა ელით.

"მამარდას" ვალენსიური კარიერა სრულდება



გიორგი ქოჩორაშვილის "ლევანტე" "ლა ლიგაში" დაწინაურებასთან ახლოსაა, ქართველ ნახევარმცველს კი, მოგეხსენენათ, ლისაბონის "სპორტინგში" ვიხილავთ; გიორგი წიტაიშვილის "გრანადას" აღზევება გაუჭირდება, საქართველოს ნაკრების ფეხბურთელს კი 4 შედეგიანი დარტყმა და 3 საგოლე პასი აქვს.


ოთარ კიტეიშვილის "შტურმი" ლიდერ "აუსტრიას" 2 ქულით ჩამორჩა, მაგრამ ჩემპიონობისთვის ბოლომდე იბრძოლებენ. წინ 9 ტურია და შორს არც "ზალცბურგია".

იმედია, მომავალი სეზონიდან ჩვენებურებს უფრო ამბიციურ კლუბებში ვნახავთ. რაც შეეხება წლევანდელ სეზონს, მისი ჩემპიონთა ლიგის ტრიუმფით დასრულება დიდებული იქნება!

" შრომის, შეუპოვრობის, თავდადებისა და ერთგულების მაგალითია" - ქინქლაძე ქოჩორაშვილის "სპორტინგში" ტრანსფერზე

ემზადება თუ არა "კვარა" საჩემპიონო მატჩისთვის?