კვარაცხელიას უახლოესი გეგმები - გაცილება, სიმეონესთან დაპირისპირება და ბევრი საშინაო ქულის დაგეგმვა

ხვიჩა კვარაცხელიას მომავალზე საუბარი ძალიან სასიამოვნოა და ქართველ გულშემატკივრებს ის არ მობეზრდებათ; ამავდროულად კი, სიფრთხილეც გვმართებს, რათა ჯერ კიდევ მაღალი დონის კარიერის სტარტზე მდგარი ხვიჩა ზედმეტად არ დავძაბოთ.

როგორც ცნობილი გახდა, 29 ივნისს ბათუმის არენაზე შეკრებილი გულშემატკივარი (ამ დღეს მათ თბილისის "დინამო" სტუმრობთ) ხვიჩა კვარაცხელიას ნეაპოლში გააცილებს.

უკვე ისიც ვიცით, რომ შეკრების დაწყებიდან მალევე, კვარაცხელიას "ნაპოლის" მაისურის მორგების საშუალება ამხანაგურ შეხვედრებში მიეცემა. ახლა მთავარია, ქართველი გარემარბი გუნდს სრულად შეეწყოს და ოფიციალური მატჩებისთვის მთავარმა მწვრთნელმა ლუჩანო სპალეტიმ მასზე დაყრდნობა თამამად გაბედოს.

იტალიის ჩემპიონატის კალენდარი გამოქვეყნდა და როგორც ცოტა ხნის წინ გაცნობეთ, ვადები ზუსტად ისე განისაზღვრა. 2022 წელს 13 აგვისტოდან 13 ნოემბრამდე ითამაშებენ, ამის შემდეგ კი კატარის მუნდიალის გამო შესვენება გამოცხადდება.

ხვიჩას ახალი კლუბი სერია "ა"-ს 14 აგვისტოს, "ვერონაში" სტუმრობით იწყებს. ხორვატი იგორ ტუდორის გუნდმა გასული სეზონი მე-9 ადგილზე დაასრულა და როგორც საკუთარ მოედანზე, ასევე სტუმრად, დაახლოებით თანაბრად თამაშობს. მათმა ერთ-ერთმა ლიდერმა, დიეგო სიმეონეს ვაჟმა ჯოვანიმ, ახლახან დასრულებულ სეზონში 17 გოლი გაიტანა და 4 შედეგიანი პასი ჰქონდა, რაც ერთ-ერთი საუკეთესო მაჩვენებელი იყო. მის ტრანსფერზე საუბრები მიდის, თუმცა ჯერჯერობით ვერონაში რჩება.



"დიეგო მარადონას" არენაზე ნეპოლელები 21 აგვისტოს, ახლად აღზევებულ, სილვიო ბერლუსკონის "მონცას" დაუხვდებიან. ხვიჩას კლუბის მომავალი 2 საშინაო მეტოქე "ლეჩე" (31 აგვისტო) და "სპეცია" (11 სექტემბერი) არიან. ასე რომ, მათ ქულების დაგეგმვა თამამად შეუძლიათ. აი, სეზონის სტარტზე კი 3 რთული გასვლითი შეხვედრა ელით - "ფიორენტინა" (28 აგვისტო), "ლაციო" (4 სექტემბერი) და "მილანი" (18 სექტემბერი).

ესაა მატჩები, რომლებიც მორიგ სანაკრებო პაუზამდე ("ერთა ლიგის" დარჩენილი 2 ტური) გაიმართება. არ დაგვავიწყდეს, რომ ჩემპიონთა ლიგაზე, სადაც სპალეტის გუნდი იასპარეზებს, ამ დროს 2 ტური იქნება განვლილი.


გასული სეზონი ნეაპოლელებს მართლაც მშვენიერი გამოუვიდათ და ისეთი გუნდები ჩამოიტოვეს, როგორებიც "იუვენტუსი", "ლაციო", "რომა", "ფიორენტინა" და "ატალანტა" არიან. აღსანიშნავია, რომ სპალეტის შეგირდებს სტუმრად უკეთესი შედეგი (43 ქულა) ჰქონდათ, ვიდრე შინ - (36). ამავდროულად, ნეაპოლელები იტალიის თასზეც ბრწყინვალედ გამოვიდნენ.



გუნდის მთავარი პრობლემა მაინც ნაკლები კონკურენცია და შედარებით "მოკლე" სათადარიგოთა სკამი იყო, რაც ტრანსფერებით, მათ შორის, კვარაცხელიას, უნდა მოგვარდეს, თუმცა იტალიაში კონკურენცია წელს უფრო გაზრდილი უნდა იყოს. არც "იუვენტუსის" კრიზისი უნდა გაგრძელდეს დაუსრულებლად...

მართლაც მოუთმენლად ველით იტალიის ჩემპიონატის დაწყებას. ვიმედოვნებთ, რომ "ნაპოლის" მატჩების პირდაპირი რეპორტაჟების ხილვის საშუალება მთელ საქართველოს მარტივად მიეცემა.

კვარაცხელია და "ნაპოლი" - როდის ველით ხვიჩას დებიუტს და რამდენ მატჩს გამართავს ის შემოდგომაზე?

"იტალიაში კვარაცხელიას მსგავსი ფეხბურთელი ბევრი არაა" - მსოფლიოს 2006 წლის ჩემპიონი