მამარდაშვილი ბარახას "ვალენსიას" მთავარი გამოწვევაა - ეს გუნდი უნდა გადარჩეს!..

მას შემდეგ, რაც "ვალენსიას" მთავარი მწვრთნელის მოვალეობის შემსრულებელმა ვორომ ზედიზედ 3 მარცხის შემდეგ თქვა, რომ თავს ზემოთ ძალა აღარ იყო და მის გუნდს მეტის რესურსი არ ჰქონდა, კლუბის ხელმძღვანელობას სხვა გზა მოეჭრა, სასწრაფო ზომები უნდა მიეღოთ. ხანგრძლივი მოლაპარაკებებისა და ცნობილი სპეციალისტების დაყოლიების არც დრო იყო, არც რესურსი. პიტერ ლიმმა "ღამურებში" უკვე მეათე მწვრთნელი (დროებითების გამოკლებით) მიიყვანა, გუნდი კი ყოველდღიურად უარესი ხდება და გასავარდნ ზონაშია. 

როცა ესა თუ ის კლუბი კრიზისშია, მისი ყოფილი და გულშემატკივრევისათვის საყვარელი მოთამაშის მიწვევა, მიუხედავად მისი სამწვრთნელო გამოცდილებისა, ერთგვარ წესად იქცა. იქნებ ამ ფაქტორმა სიტუაციაზე დადებითად იმოქმედოს, ამავდროულად კი, ადგილობრივების მხრიდან მათი კუმირის მიმართ უფრო მეტი მოთმინება და სოლიდარობაა, რაც აგრესიას ამცირებს. თუმცა სიყვარულიდან სიძულვილამდე მაინც პატარა ხიდებია. შეგვიძლია "ჩელსიში" ფრენკ ლამპარდის ანაც "ბარსელონაში" ხავის დანიშვნის მაგალითები მოვიყვანოთ. ყველაფერი ეს ერთგვარი ხრიკიცაა, რაც ვალენსიური კლუბის ხელმძღვანელობას ნამდვილად სჭირდებოდა.



რუბენ ბარახა გამორჩეული მოთამაშე იყო, მებრძოლი. მას 2021 წლის შემდეგ არავინ გაუწვრთნია. ბოლოს "სარაგოსაში" იყო, სადაც გიორგი პაპუნაშვილი თამაშობდა. რამდენიმე კლუბის გაძღოლის მიუხედავად, მისი მიღწევები და ხსენებული პაუზა კარგი ამბავი ვერ იქნება, თუმცა რუბენის მოტივაცია დიდია, მშობლიური კლუბი ძველი დიდების გზისაკენ წაიყვანოს. მას ამ საქმეში თავისი დროის გამორჩეული მცველი, კარლოს მარჩენა დაეხმარება. 

"ვალენსია" ყოველთვის სიმპათიებს იმსახურებდა. ჯერ საქართველოს ნაკრების ექსთავკაცმა ექტორ რაულ კუპერმა ჩემპიონთა ლიგის გადამწყვეტ მატჩამდე ორჯერ მიიყვანა, ამას რაფაელ ბენიტესის "ოქროს ხანა" მოჰყვა, "ბარსელონასა" და "რეალზე" ორჯერ ჯობნება და ჩემპიონობა, უეფას თასზე (დღევანდელი ევროპა ლიგა) გამარჯვება. იმ დროის ვალენსიელები ეროვნულ ნაკრებშიც წამყვანი ძალა იყვნენ - ალბელდა, ვისენტე, ხოაკინი... აქვე არგენტინელი აიალაც.