"მილანთან" დიდი მატჩის წინ "ნაპოლი" "ვერონას" დაუზავდა

სერია A-ს 30-ე ტურში „ნაპოლისა“ და „ვერონას“ მატჩი 0:0 დასრულდა.

მწვრთნელმა ლუჩანო სპალეტიმ ჩემპიონთა ლიგაზე „მილანთან“ მატჩის წინ „ვერონასთან“ სასტარტოში ხვიჩა კვარაცხელია, ტრავმამორჩენილი ვიქტორ ოსიმენი, ამირ რაჰმანი, სტანისლავ ლობოტკა და პიოტრ ზილენსკი არ დააყენა და მოედანზე გადახალისებული შემადგენლობა გაიყვანა.

თანაბარი დებიუტის შემდეგ ნეაპოლელები უპირატესობას დაეუფლენ, გაიტანეს კიდეც, მაგრამ მსაჯმა თამაშის წესების დარღვევა დააფიქსირა. სტუმრები კონტრიერიშებით პასუხობდნენ და ლაზანიას დარტყმული ბურთი მეკარე მერეტმა მოიგერია.“ნაპოლი“ მეტოქის კარზე სახიფათო შეტევების მიტანას ვერ ახერხებდა და პირველი ტაიმი 0:0 დასრულდა.

თამაშის სურათი შესვენების შემდეგ არ შეიცვალა, მასპინძლები ისევ უნიათოდ მოქმედებდნენ და სპალეტი იძულებული გახდა 64-ე წუთზე შეცვლაზე კვარაცხელია და ზილენსკი, 72-ე წუთზე კი ოსიმენი და ლობოტკა შეეშვა. ქართველი აქტიურად ჩაერთო თამაშში, ორ მოწინააღმდეგეს ყვითელი ბარათი მიაღებინა (კომპენსირებულ დროში ყვითელი ბარათი თავადაც მიიღო), ოსიმენმა ბურთი ხარიხას გაარტყა. მერე სწრაფი კონტრიერიშისას, როდესაც "კვარამ" ბურთი დაკარგა, ნგონჯი მეკარე მერეტთან პირისპირ გავიდა, შანსი ხელიდან გაუშვა და საბოლოოდ ფრე დაფიქსირდა.

„ნაპოლი“ 75 ქულით ლიდერია, მეორეადგილოსან "ლაციოს" 14 ქულით უსწრებს, 18 აპრილს ჩემპიონთა ლიგის საპასუხო მეოთხედფინალურ მატჩში „მილანს“ უმასპინძლებს, ხოლო 23 აპრილს იტალიის ჩემპიონატზე ტურინში „იუვენტუსს“ დაუპირისპირდება.

ნეაპოლი. “დიეგო მარადონა“
ნაპოლი - ვერონა 0:0