"კვარამ" დაცვაში არ უნდა ირბინოს - დე ლაურენტისის პროექტი ჩავარდა" - ნეაპოლში ვნებათაღელვაა, ფედელე კი სიმართლეს ამბობს

"ნაპოლის" "ინტერთან" საშინაო მატჩში მარცხმა (0:3) დიდი ვნებათაღელვა გამოიწვია. ნეაპოლური გუნდის მწვრთნელის, ვალტერ მაცარის ნაცვლად პრესკონფერენციაზე კლუბის სპორტული დირექტორი მაურო მელუზო მივიდა, რომელსაც პრეზიდენტმა აურელიო დე ლაურენტისმა უთხრა, რომ დავიდე მასას მიკერძოებული მსაჯობის გამო წააგეს.

Tuttonapoli წერს, რომ ეს თაღლითობა თაღლითობის ყველა საზღვრებს სცილდება, იგივეა, სახლი რომ გაგიქურდონ, ვიდეოზე ქურდები ჩანან, ისინი კი ამბობენ, საქმეში Var-ი ვერ ჩაერევა, მასა წესების დარღვევებისას იქვე იყო (იგულისხმება მარტინესის ლობოტკაზე უხეშობა და საჯარიმოში აჩერბის მიერ ოსიმენის წაქცევა), მაგრამ ჩარევის უფლება არ ჰქონდა; აღშფოთებული ფსევდო-ექსპერტები შეცდომების ანალიზს აკეთებენ და ყოველივე ეს გულისამრევია.

გამოცემა აღნიშნავს, რომ მარიო რუისა და პიოტრ ზელინსკის დახმარების გარეშე ხვიჩა კვარაცხელია ისეთ მდგომარეობაში აღმოჩნდა, როგორც ეული უდაბნოში. ცხადია, ყველაფერი ზაფხულის კატასტროფული წინასასეზონო მომზადების ბრალია და რუდი გარსიას "ნამოღვაწარი" უახლოეს ხანში კიდევ უფრო უარეს ნაყოფს გამოიღებს.

"პარმას" ყოფილი სპორტული დირექტორი და საფეხბურთო აგენტი ენრიკო ფედელე მუდამ პირდაპირობით გამოირჩევა, ყოველგვარი მიკიბვ-მოკიბვის გარეშე ამბობს სიმართლეს და ამიტომ ბევრი ოდიოზურად მიიჩნევს. ამჯერად მან Radio Marte-ის ეთერში, გადაცემა Forza Napoli Semper-ში ისაუბრა.

მისი თქმით, გულშემატკივრების მოტყუება არ შეიძლება, გუნდი სკუდეტოსთვის ბრძოლას გამოეთიშა და მხოლოდ ოთხეულში შეუძლია მოხვდეს:

"გასულ სეზონში ნეაპოლში ფორმულა 3-ის მანქანისგან "ფერარი" შექმნეს. ვისაც ეს არ ესმის, თვალში სინათლე არ აქვს. ნათელი შეიქნა პრეზიდენტის ტექნიკური პროექტის ჩავარდნა, რომელსაც თავი ყოვლისშემძლედ მიაჩნია და ზღაპრებს უყვება ადამიანებს, რომლებიც ამართლებენ და მიესალმებიან.

ნაპოლის მანქანას არ ჰქონდა გადაცემათა გამართული კოლოფი, ამას ვხედავდით და ის დაინგრა. ვინც ეს ადრე ვერ შეამჩნია, ახლა თავის გასამართლებლად ალიბს ეძებს. ტურინში მოგება უსარგებლო მედალია. ანტიიუვენტინო არ ვარ, თუმცა "შავ-თეთრი" გუნდი არ მიყვარს. ის მუდამ ჩემი მეტოქე იყო, მაგრამ მათთან მოგებით დაკმაყოფილება, ხოლო შემდეგ ჩემპიონატის ფინიშზე მეოთხე ან მეხუთე პოზიციის დაკავება, ჩემი აზრით, უნიკალური პროვინციალიზმია.

ალეგრის გუნდი სხვას თამაშის საშუალებას არ აძლევს, დაცვითი ტაქტიკის, თითქმის ნერეო როკოს კატენაჩიოს მიმდევარია - ერთადერთი საშუალება მაღალი კლასის ფეხბურთელების გარეშე რეიტინგის მაღალ საფეხურზე დარჩე. რაც უნდა იყოს, "ნაპოლი" იტალიის  ჩემპიონია, ამის დავიწყება არ შეიძლება.

უნდა შეცვალონ თუ არა "კვარა"? არავითარ შემთხვევაში. ის კარგად არ თამაშობს, მაგრამ მისი შემცვლელი არ ჰყავთ. ჩემი აზრით, 20 მეტრით წინ უნდა გამოიყენონ და უკან სირბილი არ უნდა მოუწიოს. ხანდახან ჯიუტობს, თუმცა ერთ-ერთი იშვიათთაგანია, ვინც კარში ურტყამს. ხვიჩას მოქმედების დიაპაზონი წინ გაფართოებას საჭიროებს".

"ამის გაკეთების საშუალება არ მივეცით" - რა თქვა ჩალჰანოღლუმ კვარაცხელიაზე