მიქაუტაძის 64 წუთი "ემირეითსზე" - "არსენალმა" "ლიონი" დაჯაბნა და მოუგო [VIDEO]

ემირეითსის თასზე „ლიონი“ „არსენალთან“ 0:2 დამარცხდა.

სტუმრები ერთი შეხედვით მეტოქეს ტოლს არ უდებდნენ, მაგრამ მასპინძლები უფრო ორგანიზებულად მოქმედებდნენ, სახიფათონი იყვნენ სწრაფი კონტრიერიშებისას და დამუშავებული სტანდარტულები კარგად გამოიყენეს. პირველ ტაიმში ორივე გოლი დეკლან რაისის ჩაწოდებულ კუთხურებს მოჰყვა. სტუმართა გუნდის თავდამსხმელი გიორგი მიქაუტაძე აქტიურობდა, ერთ ეპიზოდში გატანასთან ახლოსაც იყო, მაგრამ პარტნიორის განივი გადაცემისას ბოლო მომენტში მცველმა დაასწრო.

შესვენების შემდეგ მიქაუტაძის შორიდან დარტყმული ბურთი მიზანს ასცდა. ის 64-ე წუთზე სამ თანაგუნდელთან ერთად შეცვალეს, თამაშის სურათი კი არ შეიცვალა. „მეთოფეები“ კვლავ უფრო სახიფათოდ უტევდნენ, ანგარიშის გაზრდაც შეეძლოთ, როდესაც ბუკაიო საკამ ბურთი ძელს გაარტყა. შანსი მცველის შეცდომის შედეგად „ოლომპიკსაც“ მიეცა - ერნესტ ნუამა დავიდ რაიასთან პირისპირ გავიდა, თუმცა მეკარემ არ გაატანინა. ეგ იყო და ეგ - აშკარად უკეთესმა, უფრო მაღალი კლასის ფეხბურთელებით დაკომპლექტებულმა გუნდმა გაიმარჯვა.

18 აგვისტოს, ლიგა 1-ის პირველ ტურში „ლიონი“ გასვლაზე „რენს“ დაუპირისპირდება.

ლონდონი. „ემირეითსი“
არსენალი - ლიონი 2:0
გოლები: 1:0 სალიბა (9), 2:0 გაბრიელ ჟეზუსი (27)

"მისი სხვა გუნდში გადასვლა გადაწყვეტილი იყო, თუმცა..." - "ლიონის" სპორტულმა დირექტორმა მიქაუტაძეზე ისაუბრა