გამდიდრების შანსი! - ქუთაისის "ტორპედოს" ფინანსები და სარეიტინგო ქულები

ფოტო: facebook.com/FCTorpedoKutaisi1946/

16 აგვისტოს ქუთაისის "ტორპედოს" მონაწილეობით ევროპა ლიგის მესამე საკვალიფიკაციო ეტაპის საპასუხო მატჩი გაიმართა.

"ტორპედო" პირველ მატჩში შინ ანგარიშით 5:2 მოგების შემდეგ, სტუმრად ალბანეთში 0:2 დამარცხდა და ევროპა ლიგის პლეი-ოფში ისტორიაში პირველად გავიდა.

ამ ბარიერის გადალახვით ქუთაისელებმა არა მარტო სარეიტინგო ქულები შემატეს საქართველოს უეფას კოეფიციენტების რეიტინგში, არამედ კლუბის ბიუჯეტშიც საკმაოდ ნორმალური თანხა შეიტანეს.

მაშ ასე, შინ "კუკეშთან" გამარჯვების სანაცვლოდ "ტორპედომ" 0.25 ქულა მოიპოვა, ხოლო სტუმრად მარცხის გამო არაფერი ერგო.

აქ

ამდე საქართველოს 1.375 სარეიტინგო ქულა ჰქონდა, ამას დამატებული 0.25, რაც ამ დროისთვის 1.625 ქულა გამოდის, ბოლო 5 წლის განმავლობაში კი საქართველოს უეფა-ს კოეფიციენტების რეიტინგში 4.75 ქულა აქვს და 46-ე ადგილზე იმყოფება.

რაც უნდა მოხდეს, საქართველო 47-ე ადგილზე ქვემოთ ვეღარ დაიწევს, თუმცა ესეც იმ შემთხვევაში შეიძლება მოხდეს, თუ ევროპა ლიგის პლეი-ოფს შემორჩენილმა ლევან ყენიას "დუდელანჟმა" უფრო არ წაიწია წინ. ლუქსემბურგის ერთადერთი წარმომადგენელი 16 აგვისტოს ვარშავის "ლეგიას" გასცდა.

ლუქსემბურგის მსგავსად, საქართველოსაც ერთი წარმომადგენელი შემორჩა ევროთასებს. ქუთაისის "ტორპედოს" წარმატების შემთხვევაში შეუძლია საქართველო რეიტინგში წინ საგრძნობლად წასწიოს.

ქართული კლუბების მიერ ევროთასებზე მოპოვებული ქულები ასე გამოიყურება:

"ტორპედო" - 1 ქულა
"ჩიხურა" - 0.5
"დინამო" - 0.125
"სამტრედია" - 0

ახლა რაც შეეხება ფინანსებს, ამ დროისთვის "ტორპედოს" უკვე გარანტირებული 820 000 ევრო აქვს გამომუშავებული.

"ტორპედოს" მოპოვებული თანხები:

ჩემპიონთა ლიგის I საკვალიფიკაციო ეტაპი - 280 000 ევრო
ევროპა ლიგის II საკვალიფიკაციო ეტაპი - 260 000
ევროპა ლიგის III საკვალიფიკაციო ეტაპი - 280 000

ყველაზე ცუდ შემთხვევაში, ანუ თუ "ტორპედო" პლეი-ოფში დამარცხდა, ის 300 000 ევროს მიიღებს, მაგრამ თუ ქვეყნის ჩემპიონი ჯგუფურ ეტაპზე გავიდა, მას პლეი-ოფში მონაწილეობისთვის თანხა არ ერგება, სამაგიეროდ... მანდ იწყება ყველაზე საინტერესო.

ევროპა ლიგის მონაწილეებისთვის განკუთვნილი თანხები (ჯგუფური ეტაპიდან ფინალამდე),
მოსალოდნელია, რომ 560 მლნ ევრო იქნება.

კლუბებისთვის განკუთვნილი თანხები 4 კატეგორიად იყოფა:

25% - პირველადი გადახდები (140 მლნ)
30% - ფიქსირებული გადახდები შედეგებისთვის (168 მლნ)
15% - რეიტინგის მიხედვით გადახდები (84 მლნ)
30% - მარკეტინგული წილის მიხედვით გადახდები (168 მლნ)

პირველადი გადახდები (140 მლნ)
ჯგუფში მონაწილეობისთვის "ტორპედო", როგორც ჯგუფის მონაწილე ყველა 48-ვე კლუბი, 2.62 მლნ ევროს მიიღებს.

ფიქსირებული გადახდები შედეგებისთვის (168 მლნ)
ჯგუფურ ეტაპზე მოგებისთვის კლუბი 570 ათას ევროს მიიღებს, ფრისთვის - 190 ათას ევროს.
გამოუყენებელი სახსრები გადანაწილდება ჯგუფის მონაწილეებზე პროპორციულად, მოგების რაოდენობის მიხედვით.

ჯგუფის გამარჯვებული 1 მლნ ევროს მიიღებს, მეორეადგილოსანი - 500 ათას ევროს.

რეიტინგის მიხედვით გადახდები (84 მლნ)
ევროპა ლიგის შემთხვევაში ერთი წილი 71 430 ევროს შეადგენს. ყველაზე მაღალი პოზიციის მქონე კლუბი რეიტინგში 48 წილს (3.42 მლნ) მიიღებს.

მარკეტინგული გადახდები (168 მლნ)
ეს თანხები იმისდა მიხედვით გადანაწილდება, თუ სატელევიზიო ბაზრის როგორი წონა აქვს ასოციაციას, რომელსაც ემატება ადგილობრივ ჩემპიონატში მოპოვებული ადგილი, ტელევიზიებთან დადებული კონტრაქტები და ასევე, სხვა ბევრი ფაქტორი.

* * *

ჯერჯერობით ამ ინფორმაციით დავკმაყოფილდეთ. თუ ჩვენთვის სასიკეთოდ მოხდა და "ტორპედომ" ჯგუფური ეტაპიც გადალახა, მაშინ პლეი-ოფების შესახებ ინფორმაციასაც მოგაწვდით.

ახლა კი შევაჯამოთ - ყველაზე ცუდ ვარიანტში, ანუ თუ "ტორპედო" ჯგუფურ ეტაპზე ვერ მოხვდა, 1 120 000 ევროს გამოიმუშავებს, რაც დღევანდელი კურსით 3 303 779 ლარია.

მაგრამ თუ "ტორპედო" ჯგუფურ ეტაპზე გავიდა, ის მინიმუმ 3 440 000 ევროს გამოიმუშავებს, რაც დღევანდელი კურსით 10 150 555 ლარია. თან ეს იმ შემთხვევაში, თუ ქუთაისელები ყველა მატჩს წააგებენ ჯგუფში. მოგებისა და ფრისთვის დამატებითი თანხებია, რომლებიც შეგიძლიათ შედეგებისთვის ფიქსირებულ გადახდებში იხილოთ.

ამასთან ერთად, ქართულ კლუბს შესაძლოა კიდევ დაურიცხონ თანხები უეფას სხვადასხვა ფონდიდან.

ამ ყველაფრიდან გამომდინარე, "ტორპედოს" კარგი შანსი აქვს, რომ ჩამოყალიბდეს ძლიერ კლუბად, რადგან დღევანდელ ფეხბურთში ფინანსური სტაბილურობა წარმატების ერთ-ერთი მთავარი ფაქტორია.

alt უეფა და ფინანსები - რამდენს მიიღებენ ქართული კლუბები ევროთასებზე