ისევ წავაგეთ - მითიური "გაძლიერება", რომელიც გვასუსტებს - დღეს 3 მატჩია

ძალიან კი ვეცადეთ, მოზომილი ოპტიმიზმი გვქონოდა, თუმცა მაინც დიდი იყო განცდა, თბილისის "დინამო" ამჯერად შეძლებდა, ჩემპიონთა ლიგაზე, მინიმუმ, ერთი გუნდი დაეჯაბნა. რა თქმა უნდა, განვლილზე მსჯელობა უფრო მარტივია, მაგრამ პირველი მატჩის შემდეგ შემოგთავაზეთ წერილი, სადაც მაქსიმალურად აღვწერეთ ის, რა პრობლემებიც არსებობდა. ისევ და ისევ გაუგებარია ეს მითიური "გაძლიერება" ევროტურნირების წინ, რომელიც უფრო გვასუსტებს. შეცდომები, რომლებიც უკვე დაშვებულია და სხვისაზე ვინ ჩივის, საკუთარზეც ვეღარ სწავლობენ...



შესაძლოა, ორრაუნდიან დაპირისპირებაში გარკვეული მონაკვეთები მეტოქეზე უკეთ ჩაატარო, მაგრამ ამით თავის დამშვიდება არ გამოვა. ფეხბურთს წლებია ვუყურებთ, რაღაცას ინტუიციის დონეზე ვგრძნობთ - საწყისი 45 წუთის ბოლოს, როცა ჯერ კიდევ ანგარიში მიგვყავდა, იყო ზუსტად ამის განცდა, რომ მოწინააღმდეგე, რომელსაც დასაკარგი ბევრი არაფერი ჰქონდა, ფიზიკური გამძლეობით ჩვენ დაჩაგვრას მოახერხებდა. ცოტათი გაუგებარი დარჩა, გიორგი მოისწრაფიშვილის შემოსვლა რატომ დაგვიანდა ან რატომ არ შეიძლებოდა, ყაზახებისთვის მეტი ტაქტიკური სიახლე შეგვეთავაზებინა...

და მაინც, სათქმელი ბევრი არაფერია, არც ერთი ეტაპის გავლით იხსნებოდა ყველა პრობლემა და კონფერენს ლიგაზე გადართვითაც ვხედავთ იმას, რასაც აქამდეც ვიმეორებდით - ქართული საკლუბო ფეხბურთის მთავარი გასაღები ძლიერი ლეგიონერებისა და ეროვნული გუნდისთვის საძირკვლის ჩაყრა გამოდის. გამოდის კი არა, გამოსულია და ესაა... უნდა ვაღიაროთ, რომ ამ საქმეში თბილისის "დინამო" სხვაზე "კეთილშობილია", ამას ახალგაზრდული ნაკრების ბოლო მაგალითზეც ვხედავთ. მეორეა, რომ ყველაფერმა ამან გუნდის გაუმჯობესებას უნდა შეუწყოს ხელი როგორც ფინანსურად, ასევე სპორტული შედეგებით. წინააღმდეგ შემთხვევაში ზაფხულის თვეები ქართული კლუბების ხელმძღვანელობის მიმართ "სიყვარულის" გამოხატვის პერიოდად დარჩება!..



დღეს ჩვენი 3 გუნდი კონფერენს ლიგაზე ითამაშებს და წარმატებას ვუსურვებთ!

21:00 სთ. გორი. "თენგიზ ბურჯანაძე"

"დილა" - "დუნაიკა სტრედა" (სლოვაკეთი) 

(პირველი მატჩი 1:2)

21:00. ბათუმი. "ბათუმი არენა"

"დინამო" - "ტირანა" (ალბანეთი)

(1:1)

23:00. სარაევო. "ასიმ ფერვატოვიჩი"

"სარაევო" - "ტორპედო"

(2:2)

ორ წუთში გაშვებული ორი გოლი - თბილისის "დინამო" "ასტანასთან" დამარცხდა [VIDEO]

"დინამოს" შეფასება - გამოცდილების უარყოფითი ეფექტი და მეტი დრო ახალგაზრდებს! - რა არის ჩვენი მისია