ლიეტუვა - საქართველო | საკვალიფიკაციო ეტაპის მეექვსე შეხვედრა

საქართველოს ქალთა ეროვნული ნაკრები ევროპის ჩემპიონატის საკვალიფიკაციო ეტაპის ჯგუფური რაუნდის დასკვნით მატჩს გამართავს. 16 ივლისს ირის ანტმანის გუნდი ლიეტუვის ნაკრებს სტუმრად დაუპირისპირდება.

15 ივლისს საქართველოს ნაკრებმა მატჩისწინა ვარჯიში შეხვედრის მასპინძელ სტადიონზე, ქალაქ დრუსკინინკაიში გამართა.

მოახლოებული შეხვედრის შესახებ კომენტარი საქართველოს ნაკრების მთავარმა მწვრთნელმა ირის ანტმანმა და ფეხბურთელებმა, ნინო ჩხარტიშვილმა და ნინო ბუხრიკიძემ გააკეთეს.

ირის ანტმანი (ქალთა ნაკრების ფეხბურთელი): „ვაგრძელებთ ჩვენს მოგზაურობას ამ საკვალიფიკაციო ეტაპზე. ბელარუსთან წაგებულმა შეხვედრამ ბევრი რამ გვასწავლა. დაცვაში იგივე ხარისხი და კონცენტრაცია თუ ვაჩვენეთ, მომდევნო ეტაპზე გასვლა შეგვიძლია. ლიეტუვასთან მატჩი ფინალია და გოგონებმა ძალიან კარგად იციან, რისი მიღწევა შეუძლიათ 3 ქულის მოპოვებით. ისტორიის დაწერის შესაძლებლობა აქვთ.

ვიცით, რომ ფიზიკურად რთული თამაში გველის. გამარჯვებული ჯგუფში მეორე ადგილს დაიკავებს და პლეი-ოფში გასვლის შანსი ექნება. ფინალი გველის და ეს პირველი მსგავსი გამოცდილებაა ჩვენთვის. ბედნიერები ვართ, რომ ასეთი გამოწვევა გვაქვს. სწორედ ასეთი მომენტებისთვის შრომობენ ფეხბურთელები ამდენს“.

ნინო ჩხარტიშვილი (ქალთა ნაკრების ფეხბურთელი): „იმედგაცრუებულები ვართ ბელარუსთან მატჩით, რადგან სასურველი შედეგით ვერ დავასრულეთ. ფინალის ტოლფასი თამაში გველის და ყველაფერს გავაკეთებთ, რომ მოვიგოთ და ჯგუფიდან გავიდეთ. დარწმუნებული ვარ, არცერთი მოთამაშე არ დაზოგავს თავს და იმედი მაქვს, მონდომებით და ბრძოლით სასურველი შედეგით დავასრულებთ ლიეტუვასთან შეხვედრას“.