19 იანვარს, ლა ლიგის მე-20 ტურის დასკვნით მატჩში, "ბარსელონამ" საკუთარ მოედანზე "გრანადას" 1:0 მოუგო, რომელთანაც პირველ წრეში 0:2 დამარცხდა.
აღსანიშნავია, რომ "ბარსელონამ" "გრანადას" ზედიზედ 24 საშინაო შეხვედრაში სძლია და რეკორდი დაამყარა.
ახალი მწვრთნელის, კიკე სეტიენის ხელმძღვანელობით, "ბარსამ" პირველი მატჩი ჩაატარა. გუნდს ვერ დაეხმარნენ ტრავმირებული სუარესი და დისკვალიფიცირებული დე იონგი.
პირველ ტაიმში მასპინძელთა გუნდის ბურთის ფლობა 81.9% იყო, 508 გადაცემა გააკეთა, რამდენიმე ნახევარმომენტი შექმნა, მაგრამ გოლი ვერ გაიტანა.
მეორე ტაიმშიც განუწყვეტლივ უტევდა "ბარსელონა", გოლი კი კინაღამ საკუთარ კარში მიიღო - 67-ე წუთზე ეტეკის დარტყმული ბურთი ძელს მოხვდა. 69-ე წუთზე "გრანადას" მცველი ხერმან სანჩესი მესის ეუხეშა, მეორე ყვითელი ბარათი მიიღო, მისი გუნდი კაცნაკლული დარჩა და როგორც იქნა, 75-ე წუთზე ვიდალის პასით ლეომ ანგარიში გახსნა - მარჯვენა ფეხით.
მესი პირველი ფეხბურთელია, რომელსაც ლა ლიგაზე ზედიზედ 16 სეზონში გააქვს გოლი.
"ბარსელონა" და "რეალი" 43-43 ქულით ლიდერები არიან და მესამეადგილოსან "ატლეტიკოს" 8 ქულით უსწრებენ. 25 იანვარს "ბარსას" მძიმე გასვლა ელის "ვალენსიასთან", ხოლო "რეალს" 27 იანვარს - "ვალიადოლიდთან".
![alt](/pictures/image50/9aa97130d12f2ad0d8bb9d3aa95669df.jpg ""ბარსელონამ" კაცნაკლულ "გრანადას" ძლივს მოუგო - მარჯვე მესის მარჯვენათი [VIDEO]")
სეტიენი მესის გოლზე: ის გააკეთა, რასაც მთელი ცხოვრება აკეთებს
