შალამბერიძე: "აპოლონთან" ჩემი ფეხბურთელების მეიმედება

ხუთშაბათს, ევროპა ლიგის პირველ საკვალიფიკაციო ეტაპზე “საბურთალო” ნიქოზიაში ლიმასოლის “აპოლონს” დაუპირისპირდება. ოთხშაბათს დილას ჩვენი გუნდი კვიპროსში გაემგზავრა, საღამოს კი “საბურთალოს” მთავარმა მწვრთნელმა თემურ შალამბერიძემ მატჩისწინა პრესკონფერენცია გამართა:

- ყველანი მობილიზებულნი ვართ და სერიოზულად ვემზადებით ამ მატჩისთვის. გაცნობიერებული გვაქვს თამაშის მნიშვნელობა. გუნდში მოახლოებულ შეხვედრას საბრძოლო განწყობით ვხვდებით.

- ამ წყვილში ფავორიტი “აპოლონია”. მეტოქის რომელ სათამაშო რგოლს გამოარჩევთ?
- “აპოლონი” გამოცდილი ფეხბურთელებით დაკომპლექტებული გუნდია. ვფიქრობ, თავდასხმის ხაზი გამორჩეული ჰყავს - დაბო და ბენჩოპი კვალიფიციური ფეხბურთელები არიან. თუმცა, ეს უკანასკნელი ითამაშებს თუ არა ხვალინდელ მატჩში, ვერ გეტყვით, რადგანაც, როგორც ვიცი, მცირე ტრავმა ჰქონდა.

- თქვენს თანამემამულე თემურ ქეცბაიასთან თუ გქონდათ საუბარი “აპოლონის” შესახებ და რა ინფორმაცია მოგაწოდათ?
- ახლა ისეთი დროა, მეტოქეზე ინტერნეტში მაქსიმალურად შეგიძლია მოიპოვო ინფორმაცია, თუმცა მოწინააღმდეგეზე გარკვეული დახასიათება კვიპროსში მყოფი ქართველებისგანაც მივიღე.

- რა სტილის ფეხბურთს ითამაშებს “საბურთალო”?
- “საბურთალო” ყოველთვის შემტევ და სანახაობრივ ფეხბურთს თამაშობს. რა თქმა უნდა, ამ კურსის გადახვევას არ ვაპირებთ, თუმცა ვნახოთ, ხვალ როგორი თამაში გამოვა. ჩემი ფეხბურთელების მეიმედება. ბრძოლას გავუმართავთ მასპინძლებს.

- “საბურთალოს” ცენტრალური მცველი ჰყავს ტრავმირებული. კიდევ ვინ დაგაკლდებათ?
- ცენტრალური მცველები ჯანმრთელად არიან, უბრალოდ ხან მოუწევს ფეხბურთელს ძირითადში თამაში, ხან არა. რამდენიმე ტრავმირებული ფეხბურთელი გვყავს, თუმცა ისინი, ვინც მოედანზე გავლენ, ბოლომდე იბრძოლებენ და წარმატების მისაღწევად მაქსიმუმს გაიღებენ.

"საბურთალოს" ლეგიონერი: ჩუპო-მოტინგს ფინალის დღეს ვესაუბრე - "აპოლონთან" შანსები თანაბარია