ინგლისმა კარგი პირველი ტაიმი ჩაატარა, ხორვატიამ მეორე - D ჯგუფიდან 3 გუნდი გავიდა [VIDEO]

ინგლისმა თავიდანვე შეუტია. სტერლინგმა ჯერ ბურთი ძელს გაარტყა, ცოტა ხანში კი ანგარიში გახსნა. შემდეგ კეინს გოლის გატანა მეკარე ვაცლიკმა არ დაანება. შუა ტაიმში ჩეხეთმა თამაშის გათანაბრება მოახერხა და შეუტია კიდეც. ჰოლეშის შორიდან ძლიერად დარტყმული ბურთი პიკფორდმა მოიგერია. მერე იანკტომ ააცილა ოდნავ მიზანს და პირველი ტაიმი მასპინძლებმა 1:0 მოიგეს.

შესვენების შემდეგ ინიციატივას მასპინძლები ფლობდნენ, თუმცა მომენტებს ვერ ქმნიდნენ, ხოლო სტუმრები მეტოქის კარზე კონტრიერიშების მიტანას ვერ ახერხებდნენ და არათვალსასეირო თამაში წავიდა. წინა შეხვედრებში თავგამოჩენილმა შიკმა, რომელიც ინგლისელებს დამარცხებით ემუქრებოდა, თავი ვერაფრით წარმოაჩინა და შეცვალეს კიდეც. ინგლისმა მინიმალური ანგარიშით იმარჯვა და ჯგუფში პირველი ადგილი დაიკავა, ჩეხეთმა კი მესამე ადგილით 1/8-ფინალში გააღწია.

ლონდონი. „უემბლი“
ინგლისი - ჩეხეთი 1:0

ხორვატიამ პირველი გამარჯვება და შემდეგ ეტაპზე გასვლა იზეიმა

ხორვატიის ნაკრების მწვრთნელმა დალიჩმა პირველად დააყენა ვლაშიჩი სასტარტოში და მან მე-17 წუთზე თავისი გუნდი დააწინაურა. სტუმრები ტერიტორიულ უპირატესობას ფლობდნენ, ანგარიში კი პირველი ტაიმის დასასრულს მაკგრეგორმა გაათანაბრა. როგორც აღმოჩნდა, ეს ტურნირზე სქოთების პირველი და უკანასკნელი გოლი იყო.

მეორე ტაიმი ორმრივი იერიშებით დაიწყო და მოდრიჩმა ხორვატია ისევ წინ გაიყვანა. მერე პერიშიჩმაც დალაშქრა მარშალის კარი და ყველაფერი გადაწყდა.

გლაზგო. „ჰემპდენი“
შოტლანდია - ხორვატია 1:3