სრული საგიჟეთი F ჯგუფში: ორი 2:2 და საფრანგეთი, გერმანია და პორტუგალია გავიდნენ [VIDEO]

ევროპის ჩემპიონატზე დასკვნითი ტური F ჯგუფშიც გაიმართა, ჯგუფური ეტაპი დასრულდა და ყველა მერვედფინალისტი გაირკვა. ორივე მატჩში მოედანზე მოვლენები კალეიდოსკოპური სისწრაფით იცვლებოდა და საბოლოოდ პლეი-ოფში ფავორიტები შემდეგი თანმიმდევრობით გავიდნენ: საფრანგეთი, გერმანია, პორტუგალია, ხოლო მეტად სიმპათიური უნგრეთის გუნდი ჯგუფში ჩარჩა.


პორტუგალიამ მოულოდნელად პირველ ნომრად ითამაშა, რასაც ფრანგები, ალბათ, არ ელოდნენ და 30-ე წუთზე ლორისის კარში თერთმეტმეტრიანი დაინიშნა (მეკარე ბურთს ვერ შესწვდა და მუშტი თავში დანილოს მოარტყა), რომელიც რონალდომ გამოიყენა.

45-ე წუთზე კი მბაპე საჯარიმოში სემედოსთან შეჯახების შემდეგ წაიქცა, მსაჯმა პენალტი დანიშნა და ბენზემამ ანგარიში გაათანაბრა. ნაკრებში დაბრუნების შემდეგ ეს მისი პირველი გოლია - ბოლოს 2015 წელს გაიტანა.

მეორე ტაიმის დაწყებისთანავე ბენზემამ დუბლი შეასრულა და საფრანგეთი წინ გაიჭრა. მერე ამ მატჩში მესამე პენალტი დაინიშნა, ამჯერად გალთა კარში, რომელიც რონალდომ ზუსტად გამოიყენა. მან მიმდინარე ტურნირზე მეხუთე გოლი გაიტანა, ევროპირველობების ისტორიაში კი - ოცდამეერთე, რაც რეკორდია. ეროვნულ გუნდში მის ანგარიშზე 109 გოლია და მსოფლიო რეკორდსმენ ალი დაეის გაუთანაბრდა.

შემდეგ რუი პატრისიომ ორჯერ გადაარჩინა პორტუგალია - გატანა პოგბასა და გრიზმანს არ დაანება. დარჩენილ დროში გუნდები გარისკვას ერიდებოდნენ და მათთვის სასურველი ფრეც დაფიქსირდა.

ბუდაპეშტი. „პუშკაშ არენა“
პორტუგალია - საფრანგეთი 2:2


მიუნხენში მოულოდნელად სტუმრები დებიუტში სალაიმ თავურით დააწინაურა, რასაც მასპინძელთა შეტევები მოჰყვა. ჰუმელსმა ბურთი ხარიხას გაარტყა და პირველი ტაიმი მადიარებმა 1:0 მოიგეს.

66-ე წუთზე მეკარე გულაჩის შეცდომით ჰავერცმა ისარგებლა და ანგარიში გაათანაბრა, თუმცა ბუნდესგუნდის სიხარული ხანმოკლე აღმოჩნდა - პირისპირ გასულმა შაფერმა ნოიერის კარი დალაშქრა. 84-ე წუთზე კი გორეცკამ ანგარიში 2:2 გახადა და გერმანიას მერვედფინალის საგზური მოუპოვა.

მიუნხენი. „ალიანც არენა“
გერმანია - უნგრეთი 2:2

უნგრეთი მსოფლიოს ჩემპიონს ეომა და ქულაც მოიპოვა [VIDEO]