რონალდო და ევროპის ჩემპიონატი - რა უნიკალური მაჩვენებლების დაფიქსირებას ეცდება კრიშტიანო საქართველოს ნაკრებისა და სხვა გუნდების წინააღმდეგ

ლეგენდარული პორტუგალიელი შემტევი კრიშტიანო რონალდო ამ ზაფხულს კარიერაში მეექვსე ევროპის ჩემპიონატს ითამაშებს, რაც უნიკალური შედეგია.
მან თავისი ქვეყნის მაისურით ევროზე ასპარეზობა 2004 წელს დაიწყო, შემდეგ კი არცერთი ტურნირი არ გამოუტოვებია. აღსანიშნავია, რომ არ არსებობს არცერთი ფეხბურთელი, რომელსაც კარიერაში 4-ზე მეტ ევროპის ჩემპიონატზე ეთამაშა, კრიშტიანოს ანგარიშზე კი უკვე 5 ევრო მოდის.

რონალდო ამ ტურნირის საუკეთესო ბომბარდირია. მან მეტოქეთა კარი 14-ჯერ აიღო და მეორე ადგილზე მყოფ ლეგენდარულ მიშელ პლატინის 5 გოლით უსწრებს.

საინტერესოა, რომ ვეტერანი ვარსკვლავი ევროპის ჩემპიონატის საკვალიფიკაციო ეტაპისა და ფინალური ეტაპის ეგიდით ჩატარებული მატჩების ჯამითაც ბომბარდირია. მან 50 ბურთი შეაგდო და 2-ჯერ უსწრებს ზლატან იბრაჰიმოვიჩს, რომლის ანგარიშზეც 25 ზუსტი დარტყმა მოდის. 

"ალ ნასრის" შემტევს თავისი ქვეყნის მაისური ევროპის ჩემპიონატზე ყველაზე მეტჯერ მოურგია (25). II-III ადგილებზე ჟოაო მოუტინიო და კეპლერ პეპე არიან (19 მატჩი). ასევე, მან საკვალიფიკაციო ეტაპის ჩათვლითაც პორტუგალიელთა რიგებში ჯამში 64 შეხვედრა ჩაატარა, რაც აბსოლუტური რეკორდია და მეორე ადგილზე მყოფ ჯანლუიჯი ბუფონს (58) 6 მატჩით უსწრებს.