სერია A-ს მე-20 ტურში "ინტერმა" ფლორენციაში 90+1-ე წუთზე საპასუხო გოლი გაუშვა ჯოვანი სიმეონესგან, მატჩი ფრედ, 1:1 დასრულდა, ლიდერებს "ნაპოლისა" და "იუვენტუსს" შესაბამისად 9 და 8 ქულით ჩამორჩა და ფაქტიურად ოქროს მედლებისათვის ბრძოლას ნეაპოლური და ტურინული გუნდები გააგრძელებენ."ნაპოლის" "მატჩს "ვერონასთან" "სან პაოლოზე" 40 ათასი ტიფოზი დაესწრო. თამაშის წინ გულშემატკივრებმა მაგრად იჩხუბეს და წესრიგის დამყარებისას რამოდენიმე პოლიციელი დაშავდა. რაც შეეხება შეხვედრას, პირველ ტაიმში სტუმრებმა მედგარი წინააღმდეგობა გაუწიეს ლიდერს, მაგრამ ნაანტრაქტევს მასპინძლებმა ორი უპასუხო გოლი გაუტანეს და 2:0 გაიმარჯვეს. "ნაპოლის" მწვრთნელი მაურიციო სარი ნამატჩევს ჩიოდა, რომ პირველობაზე ორკვირიანი პაუზა ნამეტანია და ფეხბურთელები შეიძლება ფორმიდან ამოვარდნენ.
"იუვენტუსმა" სტუმრად ფერნანდო ბერნარდესკის გოლით 1:0 დაამარცხა "კალიარი" და "ნაპოლის" ისევ 1 ქულით ჩამორჩება. მატჩის 49-ე წუთზე სრულიად უწყინარ სიტუაციაში ბარძაყის ტრავმა მიიღო "ბებერი ქალბატონის" თავდამსხმელმა პაულო დიბალამ, მოედანი თვალცრემლიანმა დატოვა და დღეს გაირკვევა რამდენად სერიოზულად დაშავდა.
"ლაციომ" გასვლაზე 5:2 მოუგო "სპალს", მისმა ფორვარდმა ჩირო იმობილემ კარიერაში პირველი პოკერი მიითვალა და 20 გოლით ჩემპიონატის ბომბარდირია.
"მილანმა" 1:0 ძლივს სძლია "სან სიროზე" ერთ-ერთ აუტსაიდერ "კროტონეს". ეს ერთადერთი და როსონერიში პირველი გოლი მცველმა ლეონარდო ბონუჩიმ გაიტანა. "მილანის" მწვრთნელმა ჯენარო გატუზომ განაცხადა, რომ ფეხბურთელებზე აუგი არ ეთქმის, მაგრამ 90 წუთი მაღალ დონეზე თამაში არ შეუძლიათ.
ახალი მწვრთნელის ვალტერ მაცარის ხელმძღვანელობით "ტორინომ" 3:0 გაანადგურა "ბოლონია".
"ბენევენტოს" საწყის 18 ტურში არ ქონდა გამარჯვება მოპოვებული და ახლა ზედიზედ 2 მატჩი მოიგო, "კიევოსთან" და "სამპდორიასთან", თუმცა მყარად უკავია უკანასკნელი ადგილი და ძნელი წარმოსადგენია სერია A-ში ადგილი შეინარჩუნოს.
