ჩემპიონთა ლიგაზე გასულმა "ბოლონიამ" "ტულუზადან" 23 წლის ნიდერლანდელი ფორვარდი ტაის დალინგა შეიძინა, რომელმაც "მანჩესტერ იუნაიტედში" გადასული ასევე ნიდერლანდელი ჯოშუა ზირკზე უნდა შეცვალოს. გარიგების დეტალები ოფიციალურად არ გაჟღერებულა, თუმცა, თუ ნიკოლო სკირას დავუჯერებთ, ახალგაზრდა თავდამსხმელმა "როსობლუსთან" 2029 წლის ზაფხულამდე გააფორმა კონტრაქტი. ის წლიურად 1,6 მილიონ ევროს გამოიმუშავებს, ტრანსფერის ღირებულება კი 15 მილიონია.
გასულ სეზონში დალინგამ "ტულუზას" ფორმა ყველა ტურნირზე 44 შეხვედრაში მოირგო, სადაც 19 გოლი გაიტანა და 4 შედეგიანი გადაცემა გააკეთა.
