Calciomercato-ს ინფორმაციით, იტალიის სერია A-ს ბინადარ "რომას" მომავალი სეზონისთვის მთავარი მწვრთნელის პოსტზე სამი კანდიდატურა ჰყავს. მოგეხსენებათ, "ჯალოროსის" ამჟამად კლაუდიო რანიერი ავარჯიშებს, რომელიც დაკავებულ პოსტზე მიმდინარე სეზონის დასრულების შემდეგ აუცილებლად დატოვებს.
"მგლების" სამიზნეები კარლო ანჩელოტი, მასიმილიანო ალეგრი, ან ჯან პიერო გასპერინი არიან. ამ დროისთვის უმუშევარი მხოლოდ ალეგრია, რომელიც გასულ ზაფხულს "იუვენტუსიდან" წამოვიდა და ამჟამად კლუბის გარეშეა.
შეგახსენებთ, რომ "რომაში" მიმდინარე სეზონი მთავარი მწვრთნელის რანგში დანიელე დე როსიმ დაიწყო, რომელიც იუვან იურიჩმა ჩაანაცვლა, ხორვატის ადგილი კი სწორედ რანიერიმ დაიკავა.
