ფეხბურთი ფულზე მეტია - მუნდიალის საწყისი ტენდენციები და მომავლის ვარსკვლავები

უჩვეულო დროს ჩანიშნულმა მსოფლიო ჩემპიონატმა ნელ-ნელა, თუმცა პოზიტიური ენერგია მაინც შემოიტანა. პირველ ტურში ყველაფერი ვნახეთ - ლამაზი გოლები, ემოციები, მეკარის კარგი თამაში, სენსაციები... თუმცა, როგორც ხდება, ეს რამდენიმე უღიმღამო მატჩთან ერთად. ამ უდიდეს ფორუმს თვალს ყველა მაქსიმალურად ადევნებს და დეტალებზე ზედმეტი საუბარი საჭირო არცაა. მუნდიალი ყოველთვის გარკვეულ მიმართულებებსა და მომავლის ტენდენციებზე მიგვანიშნებს, შესაბამისად, მას ბევრი დაკვირვება უხდება.

შუა სეზონში ჩატარებულ ტურნირზე ვხედავთ, რომ მოთამაშეები კარგ ფორმაში არიან და რაც უნდა გადატვირთულ გრაფიკზე ვისაუბროთ, ზაფხულში ისინი გაცილებით გამოფიტული იყვნენ ხოლმე. წარმატებისთვის კარგი ფიზიკური მომზადება და ბოლომდე კონცენტრაცია ისევ ერთ-ერთი მთავარი მახასიათებლებია.



რა გამოიკვეთა? - მთავარი არა სტატისტიკური უპირატესობები, არამედ საგოლე შანსების მაქსიმალურად გამოყენებაა. გუნდები, რომლებიც ამას აღწევენ, შედეგსაც გვთავაზობენ. ამ გზით დაამარცხეს ფავორიტები საუდის არაბეთმა (არგენტინა) და იაპონიამ (გერმანია), თავის მხრივ, ესპანეთის ნაკრებმა კარში შვიდივე დარტყმა გოლად აქცია.

თუკი წინა წლებში ძლიერი მეტოქისგან თავის დასაცავად და ამავდროულად, წარმატების მისაღწევად, მხოლოდ დაცვაში ყრუდ ჩაჯდომა წარმოედგინათ, მუნდიალმა დაგვანახა, რომ მწვრთნელები სულ უფრო მეტს ფიქრობენ ასეთ სიტუაციებზე და გამოსავალს ეძებენ. ეს დამაფიქრებელია საქართველოს ნაკრებისთვისაც - ტურნირს ხომ ამ კუთხითაც ვაკვირდებით.


.
ჯერჯერობით, ყველაზე ცუდი გუნდი მასპინძელი კატარია. კატარი თუ ყატარი? - ჩვენ ეს საკითხი ადრევე ამოვწურეთ, თუმცა ყველაფერი იქამდე მივიდა, რომ საქმეში ენის დეპარტამენტიც კი ჩაერთო. სპორტული თვალსაზრისით ასეთი სუსტი მასპინძელი ამ ფორუმს ჯერ არ ჰყოლია. ყოველ შემთხვევაში, პირველმა შეხვედრამ ასე გამოაჩინა და დანარჩენს ვნახავთ. ფეხბურთი ფულზე მეტია - თქვეს ეკვადორელთა გამარჯვების შემდეგ ტურნირის კატარში გამართვით უკმაყოფილო გულშემატკივრებმა.

მომავალ მსოფლიო ჩემპიონატზე გუნდების ზრდით შეშფოთებული ვართ. მასპინძელთა სისუსტე გასაგებია, ამასობაში კი აზიური და აფრიკული ნაკრებები მშვენივარად გამოიყურებიან. ეს ფიფას იმის საბაბს აძლევს, გუნდების ზრდა სწორ პროექტად მიიჩნიოს.

ფავორიტები - ეს საკითხი ყველას აღელვებს. ამბობენ, კარგი სტარტი საქმის ნახევარიაო, თუმცა ყოველთვის ასე არ ყოფილა. 2010 წლის ესპანეთი, ქვას ქვაზე რომ არ ტოვებდა, ამის კარგი მაგალითი იყო (სასტარტო მატჩში შვეიცარიასთან წააგო). რამდენიმე ქვეყნის ნაკრებმა კარგად დაიწყო, თუმცა მეტოქესაც ხომ გააჩნია? მარცხისგანაც უმოკლეს დროში სწორი დასკვნების გამოტანაა საჭირო - ესაა, რაც სტარტზე ხელმოცარულებს სჭირდებათ. ასეთი ლიონელ მესის არგენტინაცაა, რომელიც მაინც მის მხრებზე აკიდებულ გუნდად გამოჩნდა. არადა, ბოლოს თითქოს ასე არ იყო...