ფიფამ პრიზები დაარიგა - საუკეთესო ფეხბურთელად ლუკა მოდრიჩი დაასახელეს

როგორც მოსალოდნელი იყო, 2018 წლის მსოფლიოს საუკეთესო ფეხბურთელად "რეალისა" და ხორვატიის ნაკრების ნახევარმცველი ლუკა მოდრიჩი დაასახელეს.

ლონდონში ჩატარებულ საზეიმო ცერემონიალზე მას პლანეტის საუკეთესო ფეხბურთელის პრიზი გადასცეს.

"იუვენტუსის" თავდამსხმელმა რონალდომ იცოდა, რომ პრიზს არ გადასცემდნენ და ღონისძიებაზე დასწრება არ ისურვა. მან თავისი გუნდის ოთხშაბათს ჩასატარებელი თამაშისთვის მომზადება მოიმიზეზა.

ლონდონში გამგზავრება "ბარსელონას" ფორვარდმა ლეო მესიმაც გადაიფიქრა, რომელიც ჯილდოს პრეტენდენტთა სამეულშიც კი არ შეიყვანეს.

ფიფა გააღიზიანა ცერემონიალზე მსოფლიოს მართლაც ორი საუკეთესო ფეხბურთელის არყოფნამ. "ეს ფეხბურთის დისკრეტიდაციაა. ეს მათ არ ესმით. ეს სპორტს ვნებს", - განუცხადა ამ ორგანიზაციის ერთ-ერთმა მაღალჩინოსანმა "მარკას".

"ბარსას" დირექტორმა ხავიერ ბორდასმა განაცხადა, რომ პრეტენდენტებს შორის მესის არყოფნა ფიფას დისკრეტიდაციაა.

წლის საუკეთესო მწვრთნელად დიდიე დეშამი დაასახელეს, რომლის ხელმძღვანელობით საფრანგეთის ნაკრები მსოფლიოს ჩემპიონი გახდა.

საუკეთესო მეკარედ ბელგიელი ტიბო კურტუა მიიჩნიეს, რომელიც თავისი ქვეყნის ეროვნულ გუნდს მუნდიალის ნახევარფინალში გასვლაში დაეხმარა.

წლის საუკეთესო გოლის ავტორად "ლივერპულის" თავდამსხმელი მოჰამედ სალაჰი მიიჩნიეს - მის მიერ პრემიერლიგის 26-ე ტურში "ევერტონისთვის" გატანილი გოლი საუკეთესოდ აღიარეს და ფერენც პუშკაშის პრიზი გადასცეს.

საუკეთესო გულშემატკივრებად პერუს ნაკრების ქომაგები დაასახელეს.

ფიფას ფეირ-პლეის პრიზი გასულ სეზონში "ვერდერიდან" "ვენლოში" განათხოვრებულმა თავდამსხმელმა ლენარტ ტაიმ მიიღო, რომელმაც ლეიკეიმიით დაავადებულ ადამიანს სისხლი გადასცა.

ქალთა შორის საუკეთესო ფეხბურთელად მეექვსედ დაასახელეს "ორლანდო პრაიდისა" და ბრაზილიის ნაკრების ფორვარდი მარტა.

ქალთა გუნდის საუკეთესო მწვრთნელად ჩემპიონთა ლიგის გამარჯვებულის "ლიონის" თავკაცი რენალ პედროსი აღიარეს.

ფიფამ წლის სიმბოლურ ნაკრებში სალაჰი და ნეიმარი არ შეიყვანა

ლეო მესიმ პირველად მისცა რონალდოს ხმა