მბაპესა და "ლივერპულის" არშემდგარი რომანი - მოლაპარაკებები თვითმფრინავში

2017 წელს კილიან მბაპეს კარიერა რადიკალურად შეიცვალა. "მონაკოს" ვუნდერკინდზე ევროპის ყველა ტოპ-კლუბი ოცნებობდა, ფეხბურთელის ოჯახი კი ვარიანტებს დიდი ხანი განიხილავდა. ბოლოს კილიანი პსჟ-ში აღმოჩნდა, თუმცა დიდი შანსი გახლდათ იმისა, რომ თავი "ლივერპულში" ამოეყო.

სავარაუდო ტრანსფერზე დიდი ზეგავლენა ამერიკულმა კომპანია Nike-მა მოახდინა, რომელიც კილიანის "ენფილდზე" ჩაყვანას ცდილობდა. ჯერ კიდევ 2017 წელს ფეხბურთელს "ლივერპულის" მფლობელი ჯონ ჰენრი შეხვდა: მბაპეს ოჯახს კერძო თვითმფრინავი გაუგზავნა და მათთან ერთად ნიცის თავზე ორი საათი იფრინა. L'Equipe-ის ინფორმაციით, სწორედ ამ ხნის განმავლობაში გრძელდებოდა მოლაპარაკებები, თუმცა ბოლოს ფრანგი პარიზულ გრანდში აღმოჩნდა.

იმავე ინფორმაციას ფლობს "წითლების" ლეგენდა ჯეიმი კარაგერი. CBS Sports-თან ინტერვიუში ყოფილმა ფეხბურთელმა უნიჭიერესი ფრანგის მერსისაიდულ კლუბში გადასვლის შანსები მომავალშიც საკმაოდ იმედიანად შეაფასა.

"არ ვხუმრობ, ვეყრდნობი იმ ფაქტს, რომ 2017 წელს "ლივერპულში" თვლიდნენ, მბაპეს ხელში ჩაგდების ძალიან კარგი შანსები ჰქონდათ. ვიცი, რომ სხვა კლუბების მსგავსად, მას იურგენ კლოპი ესაუბრა.

როცა "წითლებმა" ჩემპიონთა ლიგა მოიგო, ბევრმა "ლივერპულს" ისე შეხედა, რომ კლოპსა "ენფილდის" მხარდაჭერასთან ერთად "რეალის" დონის კლუბად შეიძლებოდა ჩამოყალიბებულიყო. შემიძლია გარანტია მოგცეთ, რომ ის "რეალში" ნამდვილად ითამაშებს, მაგრამ ყოველთვის ვგრძნობდი, რომ "ლივერპული" ასეთი ფეხბურთელისთვის მომდევნო ნაბიჯის გადადგმამდე იდეალური ადგილი იყო", - ციტირებს კარაგერს The Mirror-ი.

პსჟ-სა და მბაპეს შორის კონტრაქტი 2022 წელს იწურება და კლუბი ახალი მოლაპარაკებებისთვის მზად არის. ფეხბურთელმა კი თქვა, რომ გადაწყვეტილებას ისევ ფეხბურთელთან ერთად მიიღებს.