დუშან უჰრინი: ბუქარესტში სწრაფი გოლის გატანას შევეცდებით

თბილისის "დინამოსა" და ბუქარესტის "სტიაუას" შორის ჩემპიონთა ლიგის მესამე საკვალიფიკაციო ეტაპის პირველი მატჩის შემდეგ, რომელიც "დინამო არენაზე" 30 ივლისს გაიმართა და მასპინძლეთა მარცხით ანგარიშით 0:2 დასრულდა, დინამოელთა თავკაცმა შეხვედრის შესახებ ისაუბრა.

უპირველესად, დუშან უჰრინის მოსაზრებები იყო საინტერესო, ამიტომაც მისი მატჩის შემდგომი პრესკონფერენცია უფრო ვრცელი გამოდგა, ვიდრე "სტიაუას" თავკაცის, ლაურენციუ რეგეკამპფის საუბარი.

- "სტიაუას" გამარჯვებას ვულოცავ. ძლიერი მოწინააღმდეგე გვყავდა, რომელიც ყოველთვის გამოირჩეოდა სწრაფი და კომბინაციური ფეხბურთით. სანამ გოლს მივიღებდით, "დინამო" კარგად თამაშობდა, ამის შემდეგ კი მეტოქეს ბევრი საგოლე შანსი მიეცა.

-

რით შეუძლია "დინამოს" განმეორებით შეხვედრაში წარმატების მიღწევა?
- ბუქარესტში სწრაფი გოლის გატანას შევეცდებით.

- ჩისკოს შეცვლის მიზეზი რა იყო?
- მას შესაძლებლობების 50 პროცენტი გამოსდიოდა, ჯაბა დვალმა კი შედარებით უკეთესი შთაბეჭდილება დატოვა.

- მარცხის ერთ-ერთი მიზეზი "სტიაუას" დონის მეტოქეებთან თამაშის გამოცდილების ნაკლებობა ხომ არ იყო?
- შესაძლოა, ასეც იყოს. პენალტის ვერგატანამ კი გული ძალიან დამწყვიტა. რომ დავწინაურებულიყავით, შესაძლოა, მატჩი სულ სხვაგვარად დასრულებულიყო.

- მერებაშვილის თამაშით კმაყოფილი ხართ?
- მას თამაში ორივე ფლანგზე შეუძლია. შეხვედრის გარჩევისას უნდა ვკითხო, რატომ რჩებოდა სეთურიძე მარჯვენა ფლანგზე მარტო.

- ევროპის ლიგის პლეი ოფის წინ გუნდის შემადგენლობის გაძლიერებას ხომ არ გეგმავთ?
- ტრანსფერები ჩემი კომპეტენცია არ არის. კარგია, რომ რამდენიმე დღეში ირაკლი ძარია დაგვიბრუნდება, რომელსაც ტრავმის გამო ბოლო მატჩები გაუცდა.

ყოველდღიური სპორტული გაზეთი "ლელო"

ასევე იხილეთ:
დინამო-სტიაუა 0:2 - ასეთი დონის გუნდი ბოლოს როდის ვნახეთ? [VIDEO]