ჩემპიონთა ლიგა. I ტური. A ჯგუფი: კრიშტიანომ მესის გაასწრო [VIDEO]

2015/16 წლების ჩემპიონთა ლიგის ჯგუფური ეტაპის პირველი გოლის ავტორი "პარი სენ-ჟერმენის" ძვირფასი ახალწვეული არგენტინელი ანხელ დი მარია გახდა- მან სადებიუტო გოლი ვერატის პასით შეაგდო, დი მარია მარჯვენა ფლანგიდან შეიჭრა და ბრწყინვალე გოლიც გაიტანა "მალმიოს" კარში.

ზლატან იბრაჰიმოვიჩის თამაში ძალზე საეჭვო იყო, თუმცა ყოფილი გუნდის წინააღმდეგ მან მაინც ითამაშა და 61-ე წუთზე საგოლე პასი გაუკეთა ედინსონ კავანის, ურუგვაელმა კომბინაცია თავურით დააგვრიგვინა - 2:0.

პსჟ-ს ყველა ლიგის მოგების ერთ-ერთ ფავორიტად მიიჩნევენ, ლორან ბლანიც ამბობს, რომ ტიტულისთვის ვიბრძოლებთო. როგორც ჩანს, ეს მხოლოდ ცარიელი სიტყვები არაა...

მადრიდში "რეალმა" 4:0 გაანადგურა "შახტარი", მაგრამ ტრავმის გამო, გარეთ ბეილი პირველივე ტაიმში დაკარგა, მეორეში კი - სერხიო რამოსი. უკრაინელთა უხეში შეცდომის წყალობით, ქარიმ ბენზემამ 30-ე წუთზე გახსნა ანგარიში.

"შახტარის" იმედები მეორე ტაიმის დასაწყისში დაიმსხვრა, როცა სტუმართა კარში უსამართლო პენალტი დაინიშნა, კრიშტიანო რონალდოს არც ამ და არც მოგვიანებით დანიშნული კიდევ ერთი 11-მეტრიანის შესრულება გასჭირვებია.

ბოლოს კი მადეირელმა სულაც ჰეთ თრიკი შეასრულა. ბოლო ორ შეხვედრაში რონალდომ 8 გოლი გაიტანა. კრიშტიანომ ჩემპიონთა ლიგაზე უკვე 80 გოლი გაიტანა, ის სამი გოლით უსწრებს ლეო მესის "რეალი" ისე იწყებს, როგორც ტურნირის ფავორიტს შეეფერება.

პსჟ-მალმიო 2:0
გოლები: 1:0 დი მარია (4), 2:0 კავანი (61)
პსჟ (4-3-3): ტრაპი - ვან დერ ვილი, ტ. სილვა, დ. ლუისი, მაქსველი - ვერატი, ტიაგო მოტა, მატუიდი - დი მარია (75. ლავეცი), იბრაჰიმოვიჩი (75. პასტორე), კავანი
მალმიო (5-3-2): ვილანდი - ტინერჰოლმი, არნასონი, ბენგტსონი, კარვალიო (46. როდიჩი), იოტუნი - ადუ (85. რაკიპი), ბერგეტი, ლევიცკი - როზენბერგი, ჯურჯიჩი
გაფრთხილება: ვერატი, ლუისი - ადუ, ბენგტსონი
კუთხური: 12-2; ჯარიმა: 9-14; თამაშგარე: 10-1; კარში დარტყმა: 21-4 (10-1); ბურთის ფლობა: 69%-31%.
მაყურებელი: 46 612

რეალი-შახტარი 4:0
გოლები: 1:0 ბენზემა (30), 2:0 რონალდო (55-პენ), 3:0 რონალდო (63-პენ), 4:0 რონალდო (81)
რეალი (4-2-3-1): ნავასი - კარვახალი, ვარანი (46. პეპე), ს. რამოსი (59. ნაჩო), მარსელო - მოდრიჩი, კროოსი - ისკო, ბეილი (31. კოვაჩიჩი), რონალდო - ბენზემა
შახტარი (4-2-3-1): პიატოვი - სრნა, კუჩერი, რაკიცკი, აზევედო - ფრედი, სტეპანენკო - მარლოში (75. კოვალენკო), ტეიშეირა, ტაისონი (67. მალიშევი) - გლადკი (82. ბერნარდი)
გაფრთხილება: - სტეპანენკო, სრნა, კუჩერი, მალიშევი
გაძევება: სტეპანენკო (50)
კუთხური: 6-2; ჯარიმა: 15-10; თამაშგარე: 1-2; კარში დარტყმა: 25-5 (9-1); ბურთის ფლობა: 50%-50%.
მაყურებელი: 66 389

მომდევნო ტური
30 სექტემბერი:
შახტარი-პსჟ, მალმიო-რეალი.

ყოველდღიური სპორტული გაზეთი "ლელო"