ბენფიკა-ბაიერნი 2:2 - დღეიდან "ბაიერნი" ლიგის მთავარი ფავორიტია? [VIDEO]

"ბენფიკამ" პირველ შეხვედრაშიც დაამტკიცა, რომ ხუმრობა "არწივებთან" არ შეიძლება და რუი ვიტორიას გუნდი 27-ე წუთზე დაწინაურდა კიდეც, მიუხედავად იმისა, რომ ტერიტორიულ-სათამაშო უპირატესობას თავიდანვე "ბაიერნი" ფლობდა - ხიმენესი ელიზეუს შორეულ შესანიშნავ პასს გამოეხმაურა და გამომდინარე იქიდან, რომ მანუელ ნოიერი კარიდან ცუდად გამოვიდა, ფაქტობრივად ცარიელ კარში გადაგზავნა ბურთი.

რეკორდმაისტერისთვის კარგი მოხდა ის, რომ სტუმრებმა შესვენებამდე მოახერხეს ანგარიშის გათანაბრება. ამ გუნდებს შორის პირველი შეხვედრის ერთ-ერთი გმირი ელდერსონი კარიდან ბოლომდე იდეალურად ვერ გამოვიდა და საბოლოოდ, მოგერიებული ბურთი საჯარიმოს მისადგომებთან მდგომ არტურო ვიდალს მიუვიდა, ჩილელიც იმ პოზიციიდან არ შეცდა.

მეორე ტაიმის დებიუტში კი პრინციპში, ყველაფერი გადაწყდა, როდესაც "ბაიერნმა" კუთხური მოაწოდა - ხავი მარინესმა საჰაერო ორთაბრძოლა მოიგო და ბურთი დააგდო, მას თომას მიულერზე გამოუვიდა პასი, რომელსაც ახლოდან გატანა არ გასჭირვებია.

კარგი "ბენფიკასთვის" და მისი გულშემატკივრებისთვის ის გახლდათ, რომ გუნდი არ დანებდა და ბრძოლა გააგრძელა, რაც 77-ე წუთზე ტალისკას გოლში აისახა.

შეცვლაზე შესულმა ბრაზილიელმა, უძლიერესი დარტყმით გაიტანა ჯარიმიდან და ანგარიში გაათანაბრა. თუმცა გერმანელები კიდევ ორი ბურთის გამშვებები არ იყვნენ და არც გაუშვეს.

"არწივების" ასეთი თამაში დასაფასებელია და ლისაბონელებს შეუძლია იამაყონ, რომ ასე ღირსეულად ითამაშეს წყვილში აშკარა ფავორიტის წინააღმდეგ, მაგრამ საბოლოო ჯამში, შემდეგ ეტაპზე უფრო ძლიერი გუნდი გავიდა, რომელმაც ორი მატჩის ჯამში უფრო დაიმსახურა მოგება.

ხოსეპ გვარიდოლას ყოფილი გუნდის, "ბარსელონას" გავარდნას თუ გავითვალისწინებთ, მიუნხენელებს ბევრი ალბათ, მთავარ ფავორიტადაც შერაცხავს, მაგრამ არც მადრიდის "რეალი" დაგვავიწყდეს და არც ის, რომ "სიტი" და დიეგო სიმეონეს "ატლეტიკო" უქმად ყოფნას არ აპირებენ.

ნახევრაფინალების წილისყრა პარასკევს ჩვენი დროით 14:30 საათზე გაიმართება.

ჩემპიონთა ლიგა. 1/4 ფინალი. საპასუხო მატჩი
ბენფიკა-ბაიერნი 2:2 (0:1)
გოლები: 1:0 ხიმენესი (27), 1:1 ვიდალი (38), 1:2 მიულერი (52), 2:2 ტალისკა (77)
ბენფიკა (4-2-3-1): ედერსონი - ელიზეუ (88. იოვიჩი), ჟარდელი, ნილსონ-ლინდელოფი, ალმეიდა - სანჩესი, ფეისა - კარსელა-გონსალესი, პიცი (58. გუედესი), სალვიო (68. ტალისკა) - ხიმენესი
ბაიერნი (4-3-3): ნოიერი - ლამი, კიმიხი, მარტინესი, ალაბა - ვიდალი, ჩაბი ალონსო (90. ბერნატი), ალკანტარა - დიეგო კოსტა, რიბერი (90+2. გიოტცე), მიულერი (84. ლევანდოვსკი)
გაფრთხილება: კარსელა-გონსალესი, ალმეიდა – მარტინესი
კუთხური: 3-6 ჯარიმა: 9-10 თამაშგარე: 2-3 კარში დარტყმა: 9(5)-16(7) ბურთის ფლობა: 32%-68%
მაყურებელი: 59 405

ყოველდღიური სპორტული გაზეთი "ლელო"