ანტუან გრიზმანმა "ატლეტიკო" ჩემპიონთა ლიგის ფინალში გაიყვანა!

დღეს, 3 მაისს, ჩემპიონთა ლიგის ნახევარფინალური ეტაპის განმეორებით მატჩში, რომელიც მიუნხენში "ბაიერნსა" და "ატლეტიკოს" შორის შედგა, მადრიდელებმა ჩემპიონთა ლიგის ფინლის საგზური მოიპოვეს.

შეგახსენებთ, რომ გუნდებს შორის პირველი შეხვედრა მადრიდში "ატლეტიკოს" გამარჯვებით 1:0 დასრულდა, ამიტომ ფინალში გასასვლელად მიუნხენელებს დღეს ორბურთიანი სხვაობით უნდა მოეგოთ, მაგრამ...

პირველმა ტაიმმა "ბაიერნის" სრული უპირატესობით ჩაიარა და "ატლეტიკოს" შანსიც კი არ მისცემია შეტევის. 31-ე წუთზე "ატლეტიკოს" კარის მიმართულებით სახიფათო ჯარიმა დაინიშნა, რომლის შესრულება ესპანელმა ხაბი ალონსომ ითავა. ალონსოს დარტყმული ფილიპე ლუისს მოხვდა, რის შემდეგაც ბურთი კარის ბადეში გაეხვა - 1:0.

"ბაიერნმა" შეტევა გააგრძელა და 3 წუთში თერთმეტმეტრიანიც მოიპოვა, მაგრამ თომას მიულერს იან ობლაკმა აჯობა, რითაც საკუთარ გუნდს შანსი დაუტოვა.

შესვენებაზე დიეგო სიმეონემ შეძლო და გუნდი გონს მოიყვანა. 54-ე წუთზე ფერნანდო ტორესის ბრწყინვალე გადაცემის შემდეგ ფრანგი ანტუან გრიზმანი მანუელ ნოიერთან პირისპირ გავიდა და თავისი შანსი ხელიდან არ გაუშვა - 1:1.

მატჩის 73-ე წუთზე თავისი გოლი გაიტანა "ბაიერნის" პოლონელმა ფორვარდმა რობერტ ლევანდოვსკიმაც. 83-ე წუთზე თერთმეტმეტრიანი ამჯერად "ბაიერნის" კარში დაინიშნა, მაგრამ აქაც მეკარემ იმარჯვა - ტორესის დარტყმული ნოიერმა მოიგერია. საბოლოოდ, 2:1 და "ატლეტიკო" მილანში მიემგზავრება, სადაც ლიგის ფინალი გაიმართება!

ჩემპიონთა ლიგის მეორე ნახევარფინალური შეხვედრა ხვალ, მადრიდში, "რეალსა"და "მანჩესტერ სიტის" შორის გაიმართება. შეხვედრა თბილისის დროით 2:45 საათზე დაიწყება.