როცა ჩვენი დროით შუაღამით მოსკოვის "სპარტაკი" "ამსტერდამ არენას" ეწვევა, სტუმართა მწვრთნელის ასისტენტ ანდრეი ტიხონოვს ბევრი რამ ექნება გასახსენებელი - 1998 წელს რუსეთის "სახალხო გუნდი" უეფას თასის მეოთხედფინალის სათამაშოდ ეწვია ჰოლანდიას, მაშინ ტიხონოვი "სპარტაკის" მაისურით გამოდიოდა და 27 წლის იყო, ხოლო მასპინძელთა რიგებში მათი დღევანდელი მწვრთნელი ფრანკ დე ბური და მისი ასისტენტი დანი ბლინდი ასპარეზობდნენ. მაშინ აშკარა ფავორიტი "აიაქსი" იყო, მაგრამ "სპარტაკმა" შეძლო ორივე დაპირისპირების მოგება და ნახევარფინალში გასვლა. ჰოლანდიაში წასვლის წინ ტიხონოვმა სწორედ პირველი მატჩი გაიხსენა: "მეტოქე დიდი გუნდი და
პირველ 15 წუთში დაგვანახა მეტოქემ, თუ რატომ იყო ფავორიტი. თითქმის სულ ისინი უტევდნენ, მაგრამ ჩვენ მეტოქე კონტრშეტევებზე დავიჭირეთ. სიმართლე გითხრათ, არ მახსოვს, როგორ ითამაშა ან ბლინდმა ან დე ბურმა, მთელი ყურადღება მათი ვარსკვლავისკენ გვქონდა - მიქაელ ლაუდრუპი მართლაც საოცარი ფეხბურთელი იყო. მისი ყოველი შეხება ბურთთან დიდებული იყო."
ჩვენი მხრიდან დავძენთ, რომ იმ თამაშში "აიაქსის" რიგებში შოთა არველაძე თამაშობდა, თურქული "ქაისერისფორის" ამჟამინდელი თავკაცი.
ფეხბურთის ქართველ გულშემატკივრებს კი უპირველესად ჯანო ანანიძის ამბავი გვაინტერესებს. შეძლებს თუ არა ჯანო კიდევ ერთხელ გაბრწყინებას, როგორც ეს მან წინა რაუნდში შვეიცარიაში მოახერხა, სადაც შესანიშნავი საჯარიმო დარტყმით კარიერაში პირველი გოლი გაიტანა ევროთასებზე და "სპარტაკს" მოაგებინა. კარპინმა ჰოლანდიაში 23 ფეხბურთელი იახლა და, ბუნებრივია, მათ შორის არის პატარა ქართველი ნახევარმცველიც, რომელიც ევროთასებს შემორჩენილი ერთადერთი ლეგიონერია.
"აიაქსს" ამ თამაშში არ ეყოლება მთავარი მეგოლე, მუნირ ელ ჰამდაუი, რომელსაც, როგორც ჰოლანდიური მედია ამტკიცებს, მთავარ მწვრთნელთან კონფლიქტი აქვს.
სხვა თამაშებიდან აღვნიშნავთ კიევის "დინამოსა" და "მანჩესტერ სიტის" დაპირისპირებას. გუშინ ინგლისელთა ბოსნიელმა ვარსკლავმა ედინ ჯეკომ აღიარა, რომ ანდრეი შევჩენკო მისი ერთ-ერთი კუმირია და მასთან მინდორზე შეხვედრას მოუთმენლად ელის: "რამდენიმე წლის წინ "მილანთან" თამაში მომიწია და მაშინ ავისრულე ნატვრა, შევჩენკომ მაისური გამიცვალა", - ამბობს ფეხბურთელი, რომელიც ახლა გაცილებით მეტად ფასობს, ვიდრე მისი კუმირი.
16 შემორჩენილი კლუბიდან, ვინც დუბლინური ფინალის საგზურისთვის ბრძოლას აგრძელებს, 4 ყოფილი საბჭოეთიდანაა (3 რუსული, 1 უკრაინული). როგორც ხედავთ, ამ ქვეყნების საკლუბო ფეხბურთის პროგრესი სახეზეა.
დღეს
ბრაგა-ლივერპული 22:00
ცსკა-პორტუ 22:00
ლევერკუზენი-ვილიარეალი 22:00
პსვ-რეინჯერსი 22:00
აიაქსი-სპარტაკი 00:05
ბენფიკა-პსჟ 00:05
დინამო კ.-მან. სიტი 00:05
ტვენტე-ზენიტი 00:05.
.
