საქართველოს ახალგაზრდული ნაკრები უკვე მესამე დღეა, ავსტრიის ქალაქ კლაგენფურტთან ახლოს მდებარე დაბა ბლაიბერგში იმყოფება. გუშინ ოთარ გაბელიას გაწვრთნილებმა საერთაშორისო ოთხთა ტურნირ “ალპე ადრიაზე” პირველი შეხვედრა ისრაელის ახალგაზრდულ ნაკრებთან გამართეს.გაბელიამ მეტოქეს სამი თავდამსხმელი დაუპირისპირა. როგორც გუნდის მენეჯერმა ლევან რამიშვილმა გვაცნობა, ანგარიში მეორე ტაიმის 52-ე წუთზე ისრაელის ნაკრების ფეხბურთელმა ტემაჰ ზიონმა გახსნა, 62-ე წუთზე კი ზამირ ვესმა უპირატესობა გაზარდა - 2:0. 70-ე წუთზე არბიტრმა მოედნიდან ჩვენი ცენტრალური მცველი დავით ხოჭოლავა გააძევა, მაგრამ კაცნაკლულ ქართველებს მეტი აღარ გაუშვიათ.
ჩვენს ნაკრებს მატჩისწინა საღამოს
წინასწარ გამოცხადებულ სიას დაემატა აპოლონ ლემონჯავა, რომელზეც იანვარში ვწერდით. 19 წლის ლემონჯავა თავდამსხმელია, 6 წლიდან მოსკოვის “სპარტაკის” სკოლაში ვარჯიშობდა, შარშან კი “ფეიენოორდის” დუბლშემადგენლობაში 20 მატჩში 15 გოლი გაიტანა. ჰოლანდიური კლუბიდან სასამართლო გარჩევების შედეგად წასულმა ფეხბურთელმა ნახევარი ევროპა მოიარა და ერთ წელიწადში გასინჯეს ”პარტიზანში”, “შალკეში”, “ატალანტაში”, “ბორდოში”, “ვიტესში”, “მარსელში”, “ალანიაში”.
იტალიურ ინტერნეტ-პორტალ “კალჩო ლაინზე” 2010 წლის 19 აგვისტოთი დათარიღებული ინფომაციაა, ბერგამოს ”ატალანტას” ლემონჯავას აყვანა სურს და სავიზო პრობლემებს აგვარებსო - ეტყობა, ვერ მოაგვარეს. ბოლოს აპოლონი უგუნდოდ იყო და ინდივიდუალურად ვარჯიშობდა.
აპოლონი რუსებთან ინტერვიუში კი ამბობდა, რუსეთის ნაკრებში თამაშზე ვოცნებობო, მაგრამ საბოლოოდ საქართველოს ახალგაზრდულის ფორმა მოირგო.
ტურნირის მეორე შეხვედრაში რუმინეთმა ალბანეთი 1:0 დაამარცხა.
U21. ავსტრიის საერთაშორისო ტურნირი
საქართველო 0:2 ისრაელი
საქართველო: ზარქუა - კაკუბავა, კობახიძე (46. კანდელაკი), ხოჭოლავა, ი. კვეკვესკირი (46. ოთარაშვილი) - ძალამიძე (46. თარხნიშვილი), ნ. კვეკვესკირი (46. ლემონჯავა), ოქრიაშვილი (46. აფაქიძე) - ჭანტურია (46. შარაშენიძე), შეყილაძე (46. თექთურმანიძე), ქობალია (46. ილურიძე).
.
